Croeso

Cyflwyniad
Arbenigwyr gwybodaeth a thechnoleg yw Technegwyr y We ac mae eu ffocws ar ddatblygu gwefannau.  Fel arfer bydd y swydd yn golygu gweithio fel rhan o dîm dylunio a chyfathrebu.

Amgylchedd Gwaith
Fel rheol bydd y gwaith yn digwydd mewn swyddfa.

Gweithgareddau Dyddiol
Gallai'r dyletswyddau gynnwys:

• creu syniadau dylunio a darparu datrysiadau arloesol i'r holl gleientiaid;
• creu a chynnal dyluniadau hygyrch, dwyieithog, gwreiddiol, atyniadol, manwl a hawdd eu defnyddio;
• cynhyrchu deunyddiau hyrwyddo ar gyfer y cyngor, o'r cam cysyniadol hyd at greu gwaith celf. Gallai hyn gynnwys posteri, taflenni, adroddiadau, llyfrynnau, baneri, arddangosfeydd, deunydd fformat mawr a nwyddau pwynt gwerthu, gyda'r we a chyfryngau eraill;
• derbyn brîff gan gleientiaid, gan herio a datblygu pob brîff mewn modd adeiladol; 
• rheoli eich llwyth gwaith eich hun a blaenoriaethu llwyth gwaith er mwyn cwrdd â dyddiad cau'r cleient;
• cynnal lefel o wybodaeth gyfredol am systemau gweithredu a meddalwedd ddiweddaraf safonol y diwydiant (e.e. Dreamweaver, Flash, Quark Xpress, Adobe Illustrator ac Adobe Photoshop. Mac OS X) a chwilio am becynnau meddalwedd eraill posibl;
• uchafu potensial creadigol meddalwedd drwy fynd ati'n gyson i ddysgu a datblygu sgiliau a thechnegau newydd;
• sicrhau bod cofnodion am gynnydd pob gwaith dylunio'n cael eu cadw'n gyfredol a'u cwblhau. Sicrhau bod pob gwaith papur yn cael ei gadw gyda'r ffeiliau, e.e. proflenni terfynol, dyfynbrisiau ac archebion yn ymwneud â'r prosiect fel bod modd eu ffeilio wedi i'r prosiect gael ei gwblhau;
• sicrhau bod prosiectau'n cydymffurfio â pholisïau a chanllawiau statudol a mewnol, yn enwedig y rhai canlynol: Safonau dylunio a pholisïau Corfforaethol a rai'r sefydliadau Partneriaeth, Polisi Iaith Gymraeg, Y Comisiwn Cydraddoldeb a Hawliau Dynol a rhestr wirio'r RNIB.

Sgiliau a Diddordebau
Bydd gan Dechnegydd y We:

• ymwybyddiaeth weledol gryf a llygad fanwl;
• creadigrwydd;
• sgiliau cyfathrebu a chyflwyno;
• gallu i weithio mewn amgylchedd Apple Mac neu PC;
• sgiliau rhyngbersonol;
• llythrennedd TGCh;
• gallu i reoli prosiectau;
• sgiliau dylanwadu a negodi;
• gallu i gynhyrchu canlyniadau gwirioneddol a manwl o fewn terfynnau amser llym;
• gwybodaeth am ieithoedd codio'r we a ddefnyddir ar gyfer cyflwyno a gosod cyfryngau newydd a'r rhyngrwyd.

Gofynion Mynediad
Efallai y bydd angen i Dechnegwyr y We gael cymwysterau addysgol sylfaenol.  Efallai hefyd y byddant wedi graddio mewn dylunio graffeg ac efallai, yn ogystal, y bydd ganddynt gymwysterau penodol mewn dylunio amlgyfrwng.  Mae nifer o golegau yn y DU yn cynnig cyrsiau perthnasol ar bob lefel.

Cyfleoedd a Rhagolygon ar gyfer y Dyfodol
Gallai Technegydd y We symud ymlaen o fewn dwy i dair blynedd wrth iddo ddatblygu enw da a rhwydwaith o gysylltiadau.  Yn gyffredinol, gall datblygiad gyrfa fod yn ddibynnol ar symud swyddi yn aml er mwyn ehangu profiadau a datblygu portffolio.  Bydd y cyfleoedd yn amrywio yn ddibynnol ar faint y sefydliad.

Gwasanaethau a Gwybodaeth Bellach
Big Ambition Wales www.bigambitionwales.com
e-skills UK www.e-skills.com
The Chartered Institute for IT www.bcs.org
The UK Web Design Association (UKWDA) www.ukwda.org

Gallwch gael gwybodaeth bellach ar y maes gwaith hwn drwy Gyrfa Cymru (www.gyrfacymru.com) neu yn eich llyfrgell leol, y swyddfa yrfaoedd neu lyfrgell yrfaoedd eich ysgol.

Mae Gyrfa Cymru wedi cynhyrchu Sbotolau erthygl ar yrfaoedd mewn STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/