Cyflwyniad
Archwilio problemau a chynllunio ar gyfer eu datrys, cymeradwyo
meddalwedd a systemau, a chyd-drefnu gwaith datblygu er mwyn ateb
gofynion busnes a gofynion eraill, yw gwaith Dadansoddwr
Systemau. Mae felly'n gyfarwydd ag amryw byd o wahanol
ieithoedd rhaglennu, systemau gweithredu a phlatfformau caledwedd
gyfrifiadurol. Am eu bod yn aml yn dehongli gofynion
defnyddwyr yn nhermau anghenion technegol, dadansoddwyr systemau
yw'r ddolen gyswllt rhwng gwerthwyr a gweithwyr proffesiynol ym
maes technoleg gwybodaeth. Byddant hefyd yn gyfrifol weithiau
am ddatblygu gwaith dadansoddi costau ac am ddylunio ac amserlenni
goblygiad. Rhywun sy'n ysgrifennu ac yn diwygio meddalwedd
gyfrifiadurol yw Rhaglennwr. Mae tua 12,000 o ddadansoddwyr a
rhaglenwyr cyfrifiadurol yn gweithio mewn llywodraeth leol ym
Mhrydain heddiw.
Amgylchedd Gwaith
Bydd y rhan fwyaf o'r gwaith yn cael ei wneud mewn swyddfa, ond
bydd angen teithio ryw ychydig hefyd er mwyn cyfarfod â chwsmeriaid
ac ymgynghorwyr allanol neu werthwyr.
Gweithgareddau Dyddiol
Bydd y gwaith o ddadansoddi a datblygu systemau fel arfer yn cael
ei gynnal fesul prosiect. Bydd systemau cyfrifiadurol yn
cefnogi pob math o wasanaethau sy'n amrywio o fesur a rheoli
traffig i systemau rhestrau cyflogi. Tasg gyntaf y
dadansoddwr yw gosod meini prawf ar gyfer prosiect a chytuno ar
amserlenni a chostau. Bydd wedyn yn archwilio'r swyddogaeth
sydd i gael ei gosod ar system gyfrifiadurol, yn fanwl. Caiff
system fras ei llunio a'i chynnig wedyn, o bosibl gan ddefnyddio
offer meddalwedd i'w modelu. Bydd y dadansoddwr yn pwyso a
mesur p'un ai a fyddai'n well addasu'r systemau presennol ynteu
datblygu rhaglen newydd sbon. Yn ogystal â goruchwylio'r
broses o osod system newydd, bydd y dadansoddwr hefyd yn gyfrifol
am asesu ansawdd yn rheolaidd a hyfforddi staff yr adran ar gyfer
gweithredu a rheoli'r system newydd. Bydd rhaglenwyr yn
gyfrifol am dri maes penodol:
- cynnal a chadw'r systemau meddalwedd presennol;
- diwygio'r pecynnau masnachol presennol yn ôl anghenion yr
adran;
- datblygu a ffurfweddu pecynnau meddalwedd er mwyn gallu dod i
ben â thasgau penodol sy'n berthnasol i ofynion yr awdurdod
lleol.
Sgiliau a Diddordebau
Dylai'r ymgeisydd fod yn olau ac yn fedrus iawn ym maes technoleg
gwybodaeth a gallu cadw i fyny â maes sy'n newid o funud i
funud. Dylai allu cyfathrebu'n effeithiol ar bapur ac ar
lafar ac ymwneud yn dda â phob math o bobl wahanol gan gynnwys
aelodau etholedig, cydweithwyr yn y maes a staff cymorth.
Dylai fod yn barod i wrando ar gleientiaid er mwyn cael deall eu
gofynion a busnes defnyddwyr. Dylai allu gweithio fel rhan o
dîm ac ar ei ben ei hun pan fo angen. Dylai hefyd allu meddwl
yn rhesymegol ac yn eglur a mwynhau datrys problemau.
Gofynion Derbyn
Er ei bod fel arfer yn well gan gynghorau recriwtio pobl
brofiadol, bydd staff yn cael eu dyrchafu'r tu fewn i'r cyngor
hefyd o bryd i'w gilydd. Mae gradd arbenigol mewn
cyfrifiadureg neu gymhwyster dadansoddi systemau ar gyfer
graddedigion fel arfer yn ddigonol. Mae Cymwysterau
Galwedigaethol Cenedlaethol mewn Technoleg Gwybodaeth a
chymwysterau cyfatebol yr Alban yn cynnwys lefelau 1-4.
Astudiaethau cyfrifiadurol yw'r pwnc i'w astudio os ydych am
gael cymhwyster o'r Cyngor Addysg Busnes a Thechnoleg neu Awdurdod
Cymwysterau'r Alban. Er mwyn astudio ar gyfer Diploma
Cenedlaethol Uwch, bydd angen pedair TGAU/Gradd Safonol arnoch, a
dylech hefyd fod wedi dilyn cwrs Safon Uwch/Gradd Uwch mewn dau o'r
pynciau hynny ac ennill y cymhwyster mewn o leiaf un ohonynt.
Er mwyn astudio ar gyfer gradd, bydd angen o leiaf 5 TGAU/Gradd
Safonol arnoch, a dylech fod wedi astudio ar gyfer tair Safon
Uwch/Gradd Uwch a llwyddo mewn dwy ohonynt. Mae'n gyffredin i
ymgeiswyr aeddfed gael eu derbyn i'r alwedigaeth hon.
Rhagolygon a Chyfleoedd
Mae cyfle da i chi gael eich dyrchafu i swyddi uwch. Gallech
ddod yn rheolwr prosesu data, er enghraifft neu symud ymlaen i
swydd reoli gyffredinol.
Gall rhaglenwyr ddod yn ddadansoddwyr systemau. Am fod
mwy o systemau cyfrifiadurol yn cael eu gosod mewn cynghorau ar hyd
yr amser, y mae'n bosibl hefyd y bydd mwy o alw am
ddadansoddwyr. Serch hynny, cewch fod yn weddol sicr y bydd
galw am raglenwyr bob amser. Cewch fwy o wybodaeth am
yrfaoedd rhaglennu cyfrifiadurol drwy fynd i wefan Computeach.
Rhagor o Wybodaeth a Gwasanaethau
Cymdeithas Rheoli TGaCh www.socitm.gov.uk
e-sgiliau'r D.U www.e-skills.com
Sefydliad Rheoli Systemau Gwybodaeth www.imis.org.uk
Sefydliad Siartredig TG www.bcs.org
Cewch ragor o wybodaeth am y maes hwn hefyd drwy gysylltu â
Gyrfa Cymru (www.careerswales.com/) eich
llyfrgell leol, eich swyddfa yrfaoedd neu lyfrgell yrfaoedd eich
ysgol.
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/