Cyflwyniad
Mae traffig a chludiant yn gangen arbenigol o beirianneg sifil.
Mae peirianwyr sifil yn ddatryswyr problemau, sy'n gweithio er mwyn
datrys amrywiol broblemau sy'n deillio o gymdeithas dechnolegol
fodern megis llygredd, tagfeydd traffig, datblygiadau trefol,
cynllunio cymunedol, a dŵr yfed ac anghenion ynni. Maen nhw'n
ymwneud a dylunio ac adeiladu unrhyw beth nad yw'n adeilad -
ffyrdd, rheilffyrdd, meysydd awyr, pontydd, argae neu harbwr.
Mae peirianwyr cludiant yn beirianwyr ymarferol. Ond er nad ydynt
yn llunio polisïau, maen nhw'n cynllunio ac yn dylunio systemau i
symud pobl a nwyddau'n ddiogel ac yn effeithlon. Mae'r swydd
i'w chael ym mhob math o awdurdodau lleol.
Amgylchedd Gwaith
Mae hon yn swydd mewn swyddfa ac ar safle - mewn amrywiaeth o
leoliadau cyhoeddus sy'n ymwneud a thraffig. Mae'r wythnos waith
arferol yn 37 awr ond bydd galw am waith penwythnos a gyda'r nos
hefyd. Darperir dillad arbenigol megis hetiau caled, esgidiau cryf
a dillad gweladwy. Bydd angen i'r peiriannydd gario offer ac arfau
ar ymweliadau a safleoedd.
Gweithgareddau Dyddiol
Bydd y disgrifiad yn canolbwyntio ar y Peiriannydd Traffig er bod
peth tebygrwydd gyda mathau eraill o waith peirianneg yn ymwneud a
phriffyrdd a materion cludiant ehangach. Fel aelodau o dîm,
efallai y bydd y Peiriannydd Sirol yn gofyn iddynt weithio ar sawl
cynllun ar unwaith neu arbenigo mewn un neu ddau. Er enghraifft,
efallai y bydd peirianwyr traffig yn canolbwyntio ar ddod o hyd i
atebion i broblemau rheoli traffig mewn amgylchedd trefol
prysur. Efallai y bydd eu diwrnod yn cychwyn gydag arolwg o'r
broblem ar y safle, gwneud nodiadau a mesuriadau a thrafod hyn gyda
phobl leol. Efallai mai ffordd yng nghanol y dref fydd hon ble mae
nifer o ddamweiniau wedi digwydd. Efallai y byddant yn meddwl mai'r
ateb yw darparu arwyddion traffig gwell neu rai newydd a chroesfan.
Neu, efallai bod parcio neu dagfeydd traffig yn broblem. Efallai
bod angen lonydd beicio neu fwy o gyfleusterau parcio.
Yn ôl yn y swyddfa, bydd y peirianwyr yn drafftio cynigion ar
gyfer atebion newydd i broblemau, atebion diogel, effeithlon
sy'n rhoi gwerth am arian mewn ymgynghoriad a'r holl bartïon sydd
ynghlwm, gan gynnwys swyddogion eraill yn yr adran gwasanaethau
amgylcheddol. Unwaith y bydd cytundeb, byddant yn cynllunio ac yn
dylunio cynlluniau gwella amgylcheddol. Efallai y bydd cyfarwyddyd
y peiriannydd hefyd yn cynnwys cyfrifoldeb dros ffyrdd diogel i'r
ysgol, cludiant gwledig a theithio heb gar megis ar reilffyrdd a
meysydd awyr. Unwaith y bydd y gwaith adeiladu'n cychwyn, mae
peirianwyr traffig yn monitro cynnydd er mwyn sicrhau bod y gwaith
yn cael ei wneud yn iawn a'i fod yn ateb y safonau a'r canllawiau
angenrheidiol. Byddant yn dosbarthu rhai agweddau ar y gwaith i
gynorthwywyr peirianneg a thechnegwyr ac yn goruchwylio eu
perfformiad.
Sgiliau a Diddordebau
Mae'r rhinweddau angenrheidiol yr un fath ag y disgwylir i bob
peiriannydd eu cael:
- gallu ymarferol;
- y gallu i ddatrys problemau - a mwynhau hynny!
- creadigrwydd;
- y gallu i feddwl yn rhesymegol;
- sgiliau gwaith tîm;
- sgiliau ysgrifennu a mathemategol effeithiol;
- gallu cyfrifiadurol.
Gofynion Mynediad
Mae gradd neu HNC mewn Peirianneg Sifil, Peirianneg Drydanol neu
gymhwyster priodol arall yn hanfodol. Mae'n rhaid i
Beirianwyr Sifil gwblhau Cynllun Cymhwyster Proffesiynol gan
Sefydliad y Peirianwyr Sifil - mae hyn yn cynnwys hyfforddi,
profiad ymarferol ac arholiadau. Mae'n ddymunol hefyd cael o
leiaf 4 blynedd ar ôl cymhwyso mewn rheolaeth traffig.
Rhagolygon a chyfleoedd i'r dyfodol
Mae cyfleoedd posibl yn y sector cyhoeddus a phreifat yn
cynnwys:
- contractwyr adeiladu;
- cwmnïau ymgynghori peirianneg;
- cwmnïau gweithgynhyrchu;
- llywodraeth genedlaethol;
- gwaith cyhoeddus ac adrannau amgylcheddol;
- datblygwyr eiddo;
- gwasanaethau cyhoeddus - nwy, dwr, trydan;
- diwydiannau adnoddau;
- peirianneg cynnal a chadw'r priffyrdd.
Mae sawl cwmni'n cynnig prentisiaeth i rai sy'n gadael yr ysgol
yn ogystal â noddi israddedigion. Gyda'r rhain, fel mewn gwaith
gyda'r awdurdod lleol, gall peirianwyr fynd yn eu blaen i reoli
prosiectau a swyddi Penaethiaid neu Beirianwyr Sirol. Yn y sector
preifat daw rhai yn bartneriaid mewn cwmnïau neu sefydlu eu cwmnïau
eu hunain. I'r rhai sydd a'r sgiliau priodol, mae'n bosibl
darlithio mewn prifysgolion a sefydliadau addysg bellach.
Gwybodaeth a Gwasanaethau Pellach
Cyngor y Peirianwyr www.engc.org.uk
GoSkills www.goskills.org
Sefydliad Peirianwyr Corfforedig y Priffyrdd www.ihie.org.uk
Sefydliad Siartredig y Priffyrdd a Chludiant www.ciht.org.uk
Sefydliad y Peirianwyr Sifil www.ice.org.uk
SEMTA www.semta.org.uk
www.discoverengineering.org
Mae modd cael rhagor o wybodaeth am y maes hwn trwy wefan
Gyrfaoedd Cymru (www.careerswales.com/), y
llyfrgell leol, swyddfa gyrfaoedd eich bro neu lyfrgell eich
ysgol.
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/