Cyflwyniad
Mae ymgynghorwyr cyflogaeth yn helpu amrywiaeth o bobl i ddod o
hyd i swyddi yn yr ardal. Byddan nhw'n ymwneud â phobl anabl,
y rhai sy'n byw mewn ardaloedd difreintiedig, pobl o dras
leiafrifol neu'r rhai sydd heb waith ers cyfnod maith. Bydd
ymgynghorydd cyflogaeth yn gweithio mewn prosiect penodol megis
menter adfywio economi'r fro neu raglen dod o hyd i swyddi ar gyfer
pobl ac arnyn nhw anableddau dysgu, yn aml.
Amgylchiadau'r gwaith
Mewn swyddfa y bydd ymgynghorydd cyflogaeth yn gweithio fel arfer,
er y gallai dreulio peth amser yn ymweld â chyflogwyr. 37 awr
yw'r wythnos safonol, a hynny yn ôl oriau gwaith arferol er bod
trefniadau amser hyblyg mewn sawl cyngor lleol.
Gweithgareddau beunyddiol
Mae ymgynghorwyr cyflogaeth yn ymwneud ag amrywiaeth eang o
weithgareddau cyflogi a datblygu megis:
- cysylltu â chyflogwyr lleol ynglŷn â swyddi allai fod ar gael a
chydweithio'n agos â nhw mewn rhaglenni cyflwyno a hyfforddi
gweithwyr newydd;
- chwilio papurau newydd a gwefannau am swyddi sy'n addas i'w
clientiaid;
- asesu medrau ymgeiswyr i weld a ydyn nhw'n gweddu i'r swyddi
sydd ar gael gan eu helpu i lunio CV a chais a pharatoi ar gyfer
cyfweliad;
- cadw golwg ar gynnydd ymgeiswyr llwyddiannus gan eu hyfforddi
a'u mentora yn eu swyddi newydd a gofalu bod y cyflogwyr yn cynnal
rhaglenni cyflwyno a hyfforddi yn ôl y drefn y cytunwyd arni;
- gweithio ar y cyd â chyrff pwysig eraill megis Canolfan Byd
Gwaith, adrannau gwasanaethau cymdeithasol a datblygu economaidd y
cyngor lleol, ysgolion a cholegau'r ardal, gwasanaethau gyrfaoedd,
asiantaethau recriwtio staff, rhieni a chynhalwyr.
Medrau a diddordebau
Dyma'r rhai hanfodol:
- medrau cyfathrebu ardderchog;
- agwedd dringar wrth gydweithio ag amrywiaeth helaeth o
bobl;
- gallu trafod telerau;
- gallu gweithio o'ch pen a'ch pastwn eich hun;
- gwybod am effaith gwaith a diweithdra;
- cymhelliant cryf, brwdfrydedd ac ymroddiad i wella sefyllfa
pobl;
- ymroi i hybu cyfleoedd cyfartal ac amrywioldeb.
Meini prawf derbyn
Does dim meini prawf penodol a gallai profiad fod yn bwysicach na
chymwysterau, yn aml. Byddai peth profiad o gynghori a
hysbysu pobl neu drin a thrafod unigolion yn ddefnyddiol. Pe
baech chi'n ymwneud â phobl anabl, gallai fod angen profiad o
weithio ym maes gofal. Gallai rhai cynghorau fynnu Cymhwyster
Galwedigaethol Cenedlaethol (lefel 2 neu 3) ym maes cynghori a
chyfarwyddo.
Gobeithion a chyfleoedd yn y dyfodol
Gallai fod cyfleoedd i gyrraedd swyddi rheoli uwch. Gallai
fod cyfleoedd i ddatblygu gyrfa yn rhai o adrannau eraill y cyngor
megis y gwasanaethau cymdeithasol, y gwasanaethau i'r ifainc,
gwasanaeth yr wybodaeth i blant, datblygu economaidd, adfywio ac
addysg.
Rhagor o wybodaeth a gwasanaethau
Cymdeithas Addysg a Chyfarwyddyd am Yrfaoedd:
www.agcas.org.uk
Cymdeithas Proffesiynolion Ymddiriedolaeth Addysg a Phlant:
www.aspect.org.uk
Sefydliad Datblygu Gyrfaoedd: www.icg-uk.org
Swyddi addysg: www.eteach.com
Estyn www.estyn.gov.uk
Rhwydwaith Sefydliadau Hyfforddi Awdurdodau Rhanbarthol a Lleol
Ewrop: www.ento.org
Cyngor Addysgu Cyffredinol Cymru: www.gtcw.org.uk
Hyfforddiant ac Addysg Athrawon Cymru:
www.teachertrainingcymru.org
Efallai bod rhagor am hyn ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.