Uwch swyddog safonau masnach

Cyflwyniad
 Gall staff safonau masnach effeithio'n fawr ar fywydau pobl a chael llawer o foddhad trwy roi trefn ar fasnachwyr drwg - gan hybu cyfiawnder a diogelu defnyddwyr.  Dyw'r swydd ddim yn ymwneud â chosbi bob amser, fodd bynnag.  Maen nhw'n rhoi cyngor a chymorth i'r gymuned hefyd, gan osgoi problemau yn hytrach na'u datrys.  Mae uwch swyddogion safonau masnach yn cyflawni'r un gorchwylion â swyddogion safonau masnach ond gallai fod rhaid iddyn nhw reoli prosiectau ychwanegol a llywio timau.  Maen nhw'n cael defnyddio'r gyfraith i hybu amgylchiadau teg a chyfiawn a chwalu arferion amheus.  Maen nhw'n gweithio ym mhob awdurdod lleol ar wahân i gynghorau dosbarth.

Amgylchiadau'r gwaith
Yn ogystal â gweithio yn y swyddfa, fe fydd uwch swyddogion safonau masnach yn ymweld â mannau masnachu megis siopau, tafarnau, bwytai, gwestyau, ffatrïoedd a marchnadoedd.  Gallai fod angen gweithio mewn mannau brwnt a swnllyd, neu yn yr awyr agored, a gwisgo dillad arbennig weithiau i ddiogelu'r traed, y llygaid, y clustiau a'r pen.  Ar ben hynny, fe fyddan nhw'n mynd i wrandawiadau yn y llys.  37 awr yw'r wythnos safonol, er y bydd rhaid gweithio y tu allan i'r oriau hynny ar adegau.

Gweithgareddau beunyddiol
Bydd uwch swyddog safonau masnach yn treulio'r rhan fwyaf o'i amser yn cynnal ei arolygiadau.  At hynny, rhaid ymweld â masnachwyr i gynnig cyngor a chyfarwyddyd, ymchwilio i gyhuddiadau a chwynion, cofnodi canlyniadau gwaith a pharatoi achosion ar gyfer erlyn.  Yn aml, bydd yn cario ac yn defnyddio cyfarpar megis dyfeisiau profi, pwyso a mesur.  Gallai uwch swyddog gyfarwyddo swyddogion sy'n ymweld â mannau masnachu tra bo'n gwneud y gwaith papur mae'i angen i ddibenion erlyn ac yn trefnu prosiectau arbennig mewn meysydd megis:

  • gwerthu nwyddau megis sigaréts ac alcohol i bobl ifanc o dan oed;
  • gwanhau diodydd mewn tafarnau;
  • codi tâl am gwrw a phetrol yn ôl mesuriadau anghywir;
  • codi tâl am bethau megis glo, tywod a cherrig yn ôl mesuriadau anghywir;
  • camarwain pobl wrth werthu gwyliau pecyn;
  • gwerthu nwyddau ffug;
  • gwerthu nwyddau anniogel.

Rhaid pennu targedau yn ôl amcanion y cyngor ac amserlenni erlyn, hefyd.  Ar wahân i gwrdd ag amryw fathau o fasnachwyr, bydd angen cydweithio'n agos â swyddogion iechyd yr amgylchedd, yr heddlu, Tollau a Chyllid EM, sefydliadau masnach, ynadon, barnwyr, cyfreithwyr a'r cyhoedd.
 
Medrau a diddordebau
Dyma'r rhinweddau hanfodol:

  • gallu ymarferol;
  • ystyried pethau'n fanwl;
  • natur ofalgar;
  • gallu rheoli prosiectau;
  • hyder;
  • gallu trin a thrafod pobl o bob lliw a llun;
  • tringarwch;
  • cymeriad cadarn;
  • cyfathrebu'n dda ar lafar a thrwy lythyr.

Meini prawf ymgeisio
Mae pedair lefel i gymwysterau Sefydliad y Safonau Masnach ynglŷn â materion defnyddwyr a safonau masnach: Tystysgrif Sylfaenol Materion Defnyddwyr a Safonau Masnach; Tystysgrif Modiwlau Materion Defnyddwyr a Safonau Masnach; Diploma Materion Defnyddwyr a Safonau Masnach; Diploma Uwch Materion Defnyddwyr a Safonau Masnach.  Mae modd naill ai astudio wrth weithio, gan ennill y cymwysterau bob yn dipyn, neu astudio ar gyfer gradd achrededig trwy un o'r sefydliadau isod:

  • Prifysgol Fetropolitan Manceinion
  • Diploma Ôl-raddedigion Prifysgol Fetropolitan Manceinion
  • Athrofa Prifysgol Cymru, Caerdydd
  • Prifysgol Glannau Tees
  • Coleg Prifysgol y Frenhines Fererid, Caeredin
  • Cynulliad Rhanbarthol De-orllewin Lloegr (dysgu o hirbell)

Gobeithion a chyfleoedd yn y dyfodol
Er nad oes ond hyn a hyn o lwybrau dyrchafu, maen nhw'n weddol eglur.  Mae modd i rywun profiadol gael ei ddyrchafu'n brif swyddog safonau masnach ar ôl rheoli tîm ac adran.  Mae rhai cyfleoedd arbenigol mewn cwmnïau preifat mawr ym meysydd diogelu ansawdd a gofynion y gyfraith er lles defnyddwyr, hefyd.

Rhagor o wybodaeth a gwasanaethau
Sefydliad y Safonau Masnach: www.tradingstandards.gov.uk
Cymdeithas y Gyfraith: www.lawsociety.org.uk
Sefydliad Gwyddoniaeth a Thechnoleg Bwyd (bwyd manwerth): www.ifst.org
Sefydliad Siartredig Iechyd yr Amgylchedd www.cieh.org/about_us/related_organisations.html

Mae modd cael rhagor o wybodaeth am y maes hwn trwy wefan Gyrfaoedd Cymru (www.careerswales.com/), y llyfrgell leol, swyddfa gyrfaoedd eich bro neu lyfrgell eich ysgol

Related Links