Cyflwyniad
Pan fo'r tywydd yn braf, hyd yn oed, mae digon o waith i
beirianwyr draenio. Pan fo'n wlyb, mae'r galw'n cynyddu eto
fyth. Gallai peiriannydd o'r fath arwain tîm o beirianwyr
draenio arbenigol, hefyd. Mae'n waith ymestynnol. Mae'r
swydd hon mewn awdurdodau o bob math - yn adran yr amgylchedd/adran
y priffyrdd sy'n gyfrifol am wasanaethau peirianneg, draenio,
adeiladau, priffyrdd a'r dirwedd.
Amgylchiadau'r gwaith
Mae peth gwaith yn y swyddfa a rhywfaint yn yr awyr agored, gan
gynnwys teithio'n lleol. Rhaid gweithio beth bynnag fo'r
tywydd ac, yn aml, mewn lleoedd annymunol gan wisgo dillad diogelu
megis oferôls, esgidiau cryf a siacedi melyn (wrth weithio ar y
ffyrdd). Rhaid defnyddio offer arbenigol megis camerâu cylch
cyfyng a thaclau i'w rheoli trwy radio i ddod o hyd i dyllau a
phroblemau tebyg. Yn y swyddfa, fe fyddan nhw'n defnyddio
meddalwedd gyfrifiadur.
Gweithgareddau beunyddiol
Nod peiriannydd draenio yw rhoi gwasanaeth o'r radd flaenaf i'r
cyhoedd, adrannau'r cyngor a'r sector preifat ynglŷn â materion
draenio. I wneud hynny, rhaid datrys neu osgoi amryw
broblemau sy'n ymwneud â draenio'r ffyrdd, carthffosydd cyhoeddus a
phreifat, draenio tir a glanhau cafnau. Ar unrhyw ddiwrnod
arferol, bydd angen trefnu'r tîm i ymateb yn glou i argyfyngau neu
gyflawni gorchwylion draenio yn ôl rhaglen. Gallai glaw trwm
a llifogydd lenwi carthffosydd cyhoeddus gan beryglu iechyd yn
ogystal â thorri ar draws cyflenwad y dŵr.
Efallai y bydd angen cydweithio â swyddogion iechyd yr
amgylchedd neu gwmnïau dŵr i ddatrys y broblem. Yn ystod
llifogydd difrifol, bydd peirianwyr yn ceisio gofalu bod
gwasanaethau cyhoeddus yn gweithredu mor arferol ag y bo
modd. I'r perwyl hwnnw, gallai fod angen codi pontydd dros
dro lle nad oes modd defnyddio'r ffyrdd a'r strydoedd i gyrraedd
mannau cyhoeddus, neu osod pibellau ychwanegol i gario'r dŵr
ymaith.
Yn ddelfrydol, fe fydd y peiriannydd wedi rhagweld y problemau a
gosod sustemau draenio arbennig mewn ardaloedd lle mae perygl
llifogydd. Mae prosiectau ar gyfer carthffosydd cyhoeddus a
sustemau draenio'r ffyrdd yn rhai parhaus sy'n anelu at rwystro
problemau rhag digwydd. Mae contractwyr ac adeiladwyr yn
dibynnu ar y peirianwyr i wneud yn siwr bod sustemau draenio
priodol ar y tir lle byddan nhw'n codi tai, ffatrïoedd, canolfannau
hamdden ac ati.
Medrau a diddordebau
Mae angen y canlynol ar gyfer y swydd hon:
- gallu ymarferol;
- manwl gywirdeb;
- gallu rheoli prosiectau;
- gallu trin a thrafod ffigurau;
- hyder;
- gallu cyd-dynnu â phobl o wahanol gefndiroedd.
Ar ben hynny, mae eisiau cymhelliant i ddiogelu'r amgylchedd a'r
cyhoedd a'r gallu i gyfathrebu'n dda.
Meini prawf derbyn
Fel arfer, mae angen gradd prifysgol neu gymhwyster cyfwerth ym
maes adeiladu neu beirianneg, ynghyd â phrofiad perthnasol.
Gan fod rhaid goruchwylio pobl, fe allai fod angen peth profiad o
reoli, hefyd. Byddai cymhwyster galwedigaethol megis
tystysgrif astudiaethau rheoli o gymorth. Mae modd astudio ar
gyfer cymhwyster o'r fath yn y gwaith, weithiau.
Gobeithion a chyfleoedd yn y dyfodol
Er bod peirianneg draenio yn faes cyfyng, mae'r gobeithion o ran
dyrchafu yn eithaf da. Ar ôl cael profiad a rhagor o
gymwysterau, bydd swyddi uwch ar gael yn ogystal â swyddi mewn
agweddau eraill ar beirianneg. Mae modd cael dyrchafiad yn
brif beiriannydd. Ar ben hynny, mae cyfleoedd y tu allan i'r
awdurdodau lleol - mewn cwmnïau dŵr a chwmnïau peirianneg preifat,
er enghraifft. Mae'n syniad da astudio ar gyfer aelodaeth o
Sefydliad Peirianwyr y Priffyrdd neu gyrff proffesiynol arbenigol
megis Sefydliad y Peirianwyr Adeiladu, hefyd.
Rhagor o wybodaeth a gwasanaethau
Cymdeithas y Peirianwyr Adeiladu: www.abe.org.uk
Sefydliad Peirianwyr y Priffyrdd: www.ihie.org.uk
Sefydliad y Peirianwyr Sifil: www.ice.org.uk
SEMTA www.semta.org.uk
Fe gewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/