Cyflwyniad
Mae gwaith technegwyr amlosgfa yn amrywiol.
Gallant helpu'r broses alaru drwy sicrhau bod popeth yn
mynd yn ddidrafferth. Mae swyddi o'r fath ar gael ym
mhob awdurdod lleol. Ar hyn o bryd mae angladdau'n troi'n fwy
unigryw, gan ddathlu bywyd yr ymadawedig drwy gerddoriaeth,
darlleniadau a theyrngedau gweledol yn hytrach na seremoni
draddodiadol. Gall yr ymadawedig ddewis cael band jazz yn yr
amlosgfa yn hytrach nag emynau, a dewis i'w lwch gael ei wasgaru
dros y môr yn hytrach nag yn yr Ardd Gofio. Rôl technegydd yr
amlosgfa yw sicrhau bod yr holl ddymuniadau hyn yn cael eu
gwireddu.
Amgylchedd Gwaith
Fel arfer yr oriau yw 9-5 o ddydd Llun i ddydd Gwener,
ond cynhelir rhai gwasanaethau ar y penwythnos. Mae
technegwyr amlosga yn treulio'r rhan fwyaf o'u hamser dan do, gyda
llawer o amser ar eu traed. Mae'r rhan fwyaf o dasgau'n
cynnwys codi a chario. Efallai bydd angen gwneud rhywfaint o waith
yn yr awyr agored hefyd. Rhaid i'r technegwyr wisgo'n
drwsiadus, yn addas i'r achlysur.
Gweithgareddau Dyddiol
Caiff y gwaith ei gyflawni mewn amlosgfa. Mae gan dechnegwyr
amlosgfa lawer o rolau gwahanol y mae'n rhaid iddynt eu cyflawni ym
mhob amlosgiad. Bydd Technegwyr Amlosgfa yn gyfrifol am redeg
yr amlosgfa o ddydd i ddydd a sicrhau bod pob amlosgiad yn cael ei
wneud yn unol â gofynion statudol a rheoleiddiol.
Mae Technegwyr Amlosgfa yn gyfrifol am gynnal pob gwasanaeth yn
unol â chyfarwyddiadau a gyflwynir gan deulu'r ymadawedig, sicrhau
y caiff y capel ei lanhau a'i baratoi cyn y gwasanaeth, paratoi a
gweithredu ceisiadau cerddorol a gweledol ar system gerddoriaeth
ddigidol yn unol â cheisiadau gan deulu'r ymadawedig. Byddant
yn cwrdd â cortege yr angladd ac yn tywys y galarwyr i mewn ac
allan o'r capel.
Mae Technegwyr Amlosgfa hefyd yn cynnal a chadw cyfarpar amlosgi
a monitro allyriadau. Unwaith y bydd yr angladd drosodd, mae
technegwyr yn gyfrifol am yr amlosgiad, gan sicrhau y caiff holl
weddillion yr ymadawedig eu cadw, a storio a gwaredu'r gweddillion
sydd wedi'u hamlosgi.
Ymysg agweddau eraill y swydd mae cadw cofnodion a dyletswyddau
gweinyddol, mynd ag ymwelwyr i gofebion presennol a helpu i gynnal
y tiroedd. Yn eu gwaith beunyddiol byddant yn gweithio
fel rhan o dîm, a fydd yn cynnwys gweithwyr gweinyddol, ac yn dod i
gysylltiad â gweithwyr y fynwent, swyddogion profedigaeth,
cofrestrwyr y cyngor, cyfarwyddwyr angladdau, trefnwyr angladdau,
gyrwyr hers, cyfeillion a pherthnasau'r ymadawedig, swyddogion
crefyddol ac ati.
Sgiliau a Diddordebau
Mae angen i holl staff yr amlosgfa:
- allu delio'n gydymdeimladol â phobl sy'n galaru, gan fod yn
bwyllog a chwrtais.
- bod yn gorfforol ffit
- meddu ar rywfaint o wybodaeth am arddio
- meddu ar synnwyr digrifwch.
Gofynion Mynediad
Nid oes unrhyw ofynion academaidd ffurfiol, ond mae angen
rhywfaint o sgiliau darllen ac ysgrifennu. Rhaid i bob
ymgeisydd fod yn barod i ymgymryd â hyfforddiant proffesiynol.
Cydnabyddir y Cynllun Hyfforddi Technegwyr Amlosgfa (a redir ar
y cyd gan Ffederasiwn Awdurdodau Amlosgi Prydain a'r Sefydliad
Rheoli Mynwentydd ac Amlosgfeydd - ICCM) i safon BTEC, a gall y
technegydd gyflawni'r cwrs hwn o bell ar ei liwt ei hun. Mae ICCM
hefyd yn cynnig y Cynllun Hyfforddi Gweithredwyr Mynwent. Mae
cymhwyster City in Guilds mewn Cynnal a Chadw Mynwentydd hefyd ar
gael. Mae cyrsiau gohebiaeth hefyd ar gael ar gyfer y rheini sydd
eisoes yn gweithio yn y proffesiwn.
Rhagor o Wybodaeth a Gwasanaethau
Sefydliad Pêr-eneinwyr Prydain www.bioe.co.uk
City and Guilds www.city-and-guilds.co.uk
Ffederasiwn Awdurdodau Amlosgi Prydain www.fbca.org.uk
Sefydliad Rheoli Mynwentydd ac Amlosgfeydd www.iccm-uk.com
Cymdeithas Amlosgi Prydain Fawr www.cremation.org.uk
Mae modd cael rhagoro wybodaeth am y maes hwn trwy wefan
Gyrfaoedd Cymru (www.careerswales.com/) y
llyfrgell leol, swyddfa gyrfaoedd eich bro neu lyfrgell eich
ysgol.