Croeso

Cyflwyniad
Mae swyddogion ystadau'n gyfrifol am ofalu bod tir ac adeiladau'r cyngor yn cael eu rheoli mor effeithlon ag y bo modd.  Mae swyddogion o'r fath ym mhob cyngor lleol - mae dros 3,000 yn y Deyrnas Gyfunol ar hyn o bryd.

Amgylchiadau'r gwaith
36 awr yw'r wythnos safonol.  Gallai fod rhaid mynd i gyfarfodydd pwyllgorau gyda'r nos, hefyd.  Mewn swyddfa y byddwch chi'n gweithio gan amlaf, ond gallai fod rhaid teithio i gyfarfodydd neu safleoedd weithiau.  Bydd oriau hyblyg, gwaith rhan-amser a chyfle i rannu swydd ar gael mewn rhai cynghorau.

Gweithgareddau beunyddiol
Mae swyddogion ystadau'n ymwneud ag amryw ddyletswyddau ynglŷn â thir ac adeiladau'r cyngor, gan gynnwys:

• asesu rhenti sy'n ddyledus;
• adnewyddu prydlesau;
• ystyried ceisiadau darpar denantiaid;
• monitro cytundebau tenantiaeth a gofalu bod tenantiaid yn cadw at amodau prydles;
• rheoli adeiladau - gan drefnu ac archwilio atgyweiriadau a gofalu bod pob adeilad yn cael ei ddefnyddio ar gyfer y dibenion priodol;
• asesu'r posibiliadau ynglŷn â defnyddio safleoedd y cyngor - gan gynnwys marchnata a gwerthu tir ac adeiladau neu eu rhoi ar osod;
• cynnal trafodaethau manwl gyda thirfeddianwyr neu unigolion a chwmnïau perthnasol eraill ynglŷn â phrynu safleoedd yn orfodol;
• llunio adroddiadau a chyfrifon i'w rhoi gerbron pwyllgorau'r cyngor.

Medrau a diddordebau
Dyma'r rhai hanfodol:

• cyfathrebu'n effeithiol ar lafar ac ar bapur;
• medrau trefnu da;
• gallu dadansoddi gwybodaeth ysgrifenedig ac ystadegol yn gywir;
• medrau negodi da;
• medrau cyflwyno da;
• agwedd dringar a phwyllog;
• gallu trin a thrafod cyfrifiadur.

Meini prawf derbyn
Er nad oes cymwysterau penodol, bydd y rhan fwyaf o gyflogwyr yn mynnu TGAU (A*-C) mewn o leiaf bum pwnc yn ogystal â thystysgrifau Safon Uwch - o bosibl - ac Uwch Dystysgrif Genedlaethol mewn pwnc sy'n ymwneud â thai.  Fe fydd angen trwydded yrru fel arfer, hefyd.  Gallai rhai cyflogwyr fynnu gradd ym maes tirfesur neu reoli tai.  A chithau'n swyddog ystadau, efallai y bydd rhaid astudio ar gyfer Lefel 4 Cymhwyster Galwedigaethol Cenedlaethol ym maes rheoli tir neu dai.
 
Mae modd astudio ar gyfer cymwysterau dau gorff proffesiynol: Sefydliad Brenhinol y Tirfesurwyr Breiniol a Sefydliad Cyllid, Graddio a Phrisio.

Dyma feini prawf Sefydliad Brenhinol y Tirfesurwyr Breiniol:

• Mae angen gradd i gofrestru'n fyfyriwr.  I astudio ar gyfer gradd prifysgol, fe fydd angen TGAU (A*-C) mewn o leiaf bum pwnc a thystysgrifau Safon Uwch (neu gymhwyster cyfwerth) mewn dau bwnc.
• Ar ôl ennill gradd berthnasol, bydd angen o leiaf ddwy flynedd o brofiad yn ôl strwythur cyn yr asesiad terfynol.
• Rhaid i raddedigion heb gymhwyster perthnasol ddechrau trwy ddilyn cwrs achrededig amser llawn am flwyddyn (neu ddwy flynedd os rhan-amser).
• Ar y llaw arall, mae modd osgoi'r astudio ychwanegol i gyd trwy ennill gradd neu ddiploma megis BSc 'Rheoli Ystadau'.  Bydd cymhwyster Cyngor Addysg Busnes a Thechnoleg (neu rywbeth cyfwerth) ym maes defnyddio tir neu reoli ystadau yn eich galluogi i osgoi rhywfaint o'r astudio ychwanegol.

Gobeithion a chyfleoedd ar gyfer y dyfodol
Bydd dyrchafu'n dibynnu ar ehangder a gorchwylion yr adran.  Yn adrannau'r amryw gynghorau lleol, mae llwybr eglur at swyddi rheolwyr a chyfleoedd i arbenigo mewn agweddau penodol.

Rhagor o wybodaeth a gwasanaethau
Asset Skills: www.assetskills.org
Sefydliad Breiniol Adeiladu: www.ciob.org.uk
Sefydliad Breiniol Tai: www.cih.org
Construction Skills: www.citb-constructionskills.co.uk
Inside Housing: www.insidehousing.co.uk
Sefydliad Cyllid, Graddio a Phrisio: www.irrv.org.uk
Sefydliad Brenhinol y Tirfesurwyr Breiniol: www.rics.org/uk/ 
Coleg Rheoli Ystadau: www.cem.ac.uk
The Surveyor: www.surveyormagazine.com

Gallai fod rhagor o wybodaeth ar wefan Gyrfaoedd Cymru (www.careerswales.com/), yn llyfrgell eich bro neu yn swyddfa/llyfrgell gyrfaoedd eich ysgol.