Croeso

Cyflwyniad
Mae archwilwyr yn adolygu ac yn gwerthuso gweithgareddau cynghorau i ofalu bod adnoddau'n cael eu defnyddio mewn modd effeithlon a chost-effeithiol.  Yn yr adran ariannol gorfforaethol neu'r adran archwilio fewnol maen nhw'n gweithio, fel arfer.

Amgylchiadau'r gwaith
Maen nhw'n gweithio yn y swyddfa gan amlaf, er y bydd angen ymweld â gwahanol adrannau yn y cyngor.

Gweithgareddau beunyddiol
Mae archwilwyr yn gofalu bod adrannau'r cyngor yn defnyddio eu hadnoddau yn y modd gorau a'u bod yn cadw at weithdrefnau eglur ar gyfer dyrannu arian gwladol, megis rhoi cytundebau ar gynnig yn deg.  Mae'r gwaith yn debygol o gynnwys: 

• trefnu a chynnal adolygiadau o waith adrannau'r cyngor;
• llunio profion archwilio, pennu'r ffordd orau o archwilio darn enghreifftiol o gofnodion adran a gwirio bod y gweithdrefnau'n effeithlon;
• adolygu sustemau pob adran i weld a yw gweithdrefnau rheoli pobl ac arian yn dda;
• llunio a chynnal adolygiadau eraill i asesu pa mor gywir ac agored yw'r gweithgareddau;
• cynnal ymchwiliadau penodol fyddai'n canfod ac yn atal twyll;
• dod i gasgliadau yn sgîl gwaith o'r fath, ysgrifennu adroddiadau, pennu argymhellion ac, mewn rhai achosion, llunio a chynnal gweithdrefnau ychwanegol yn ôl eich casgliadau;
• cynghori rheolwyr am y ffordd fwyaf cost-effeithiol o drin a thrafod rhyw fater.

Medrau a diddordebau
Mae angen y canlynol ar archwilwyr: 

• medrau cyfathrebu da - gallu esbonio gweithdrefnau cymhleth wrth sawl math o bobl;
• gallu llunio adroddiadau eglur a chryno;
• gallu trefnu gwaith yn dda a thrin a thrafod gwybodaeth fanwl;
• gallu blaenoriaethu gorchwylion a gweithio o'ch pen a'ch pastwn eich hun;
• gallu gweithio mewn tîm;
• gallu trin a thrafod cyfrifiaduron yn ôl safon uchel;
• mwynhau trin a thrafod symiau;
• gallu dod i benderfyniadau a'u cyfiawnhau o flaen pobl eraill.