Diddanu'ch cymuned trwy reoli'r celfyddydau ym myd
llywodraeth leol
Cyflwyniad
Mae swyddogion y celfyddydau ym maes llywodraeth leol yn
ymwneud â threfnu, llunio a chynnal achlysuron a rhaglenni yn y
celfyddydau. Eu rôl yw helpu i gynnal mentrau datblygu'r
celfyddydau yn yr ardal a chodi nifer y rhai sy'n cymryd rhan yn y
celfyddydau.
Amgylchiadau'r gwaith
Mae swyddogion y celfyddydau'n gweithio mewn swyddfa ond
mae angen iddyn nhw deithio i gyfarfodydd ac achlysuron mewn
gwahanol leoedd megis theatrau, sinemâu, neuaddau cyngerdd,
orielau, canolfannau celf, stiwdios ac, weithiau, amgueddfeydd a
llyfrgelloedd. Gallai fod rhaid gweithio yn yr awyr agored
mewn achlysuron megis carnifalau a chyngherddau ar adegau,
hefyd.
Gweithgareddau beunyddiol
Mae rôl swyddog y celfyddydau'n amrywio, a gall gynnwys
rhai o'r gorchwylion isod neu bob un ohonyn nhw:
- llunio, trefnu, hybu a chynnal rhaglen o achlysuron a mentrau'r
celfyddydau allai gynnwys cyngherddau, gwyliau, dramâu i blant,
arddangosfeydd ac ati;
- rheoli cyllidebau prosiectau penodol yn y celfyddydau;
- helpu i godi arian ar gyfer y celfyddydau - gan gynnwys denu
noddwyr a buddsoddwyr;
- annog amrywiaeth helaeth o gynulleidfaoedd i gymryd rhan mewn
prosiectau ac achlysuron sy'n ymwneud â'r celfyddydau - er
enghraifft, annog pobl ifanc i ymuno â gweithgareddau drama a
dawnsio neu hyrwyddo amrywioldeb diwylliannol trwy amryw achlysuron
codi ymwybyddiaeth;
- llunio strategaethau marchnata effeithiol i hybu achlysuron a
phrosiectau yn y celfyddydau;
- hysbysu a chynghori mudiadau lleol sy'n ymwneud â'r
celfyddydau;
- gweithio ar y cyd â sefydliadau eraill megis colegau, cylchoedd
drama a dawnsio ac ati i ddatblygu a hybu'r celfyddydau yn yr ardal
a'r rhanbarth.
Medrau a diddordebau
Mae angen y canlynol ar swyddogion y
celfyddydau:
- cyfathrebu'n dda;
- marchnata'n dda;
- trefnu gweithgareddau a rheoli prosiectau'n rhagorol;
- rheoli cyllidebau'n effeithiol;
- syniadau creadigol ac arloesol;
- peth gwybodaeth am y celfyddydau a modd eu hariannu.
Meini prawf ymgeisio
Er nad oes gofynion lleiaf yn y maes hwn, mae gan y rhan fwyaf o
swyddogion y celfyddydau ym myd llywodraeth leol radd sydd wedi'i
seilio ar y celfyddydau neu farchnata. Mewn rhai achosion,
fodd bynnag, bydd profiad o weinyddu ym maes y celfyddydau yn
bwysicach.
Mae Cyngor Annibynnol y Theatr yn cynnig cyrsiau hyfforddi
byrion mewn amryw bynciau sy'n ymwneud â'r celfyddydau.
Gallai prentisiaethau a chyrsiau Cymwysterau Galwedigaethol
Cenedlaethol fod ar gael mewn pynciau megis medrau diwylliannol a
chreadigol.
Gobeithion a chyfleoedd yn y dyfodol
Mae modd i swyddog dros y celfyddydau gael ei ddyrchafu'n
rheolwr yn adran y celfyddydau. Ar y llaw arall, gallai symud
i rolau cyfathrebu, marchnata neu reoli prosiectau yn rhai o
adrannau eraill y cyngor lleol megis hamdden, twristiaeth neu
addysg.
Rhagor o wybodaeth a gwasanaethau
Cyngor y Celfyddydau: www.artscouncil.org.uk
Datblygu Celfyddydau'r DG (gan gynnwys AD:uk Cymru) ww.artsdevelopmentuk.org
Medrau Creadigol a Diwylliannol: www.ccskills.org.uk Cyngor
Annibynnol y Theatr: www.itc-arts.org
Mae Gyrfa Cymru wedi cynhyrchu erthygl Sbotolau ar yrfaoedd yn y
diwydiannau creadigol:
https://www.careerswales.com/cy/golwg-ar-diwydiannau-creadigol/
Mae modd cael rhagor o wybodaeth am y maes hwn trwy wefan
Gyrfaoedd Cymru (www.careerswales.com/)
y llyfrgell leol, swyddfa gyrfaoedd eich bro neu lyfrgell eich
ysgol.