Helpu'ch cymuned i gyfathrebu â byd llywodraeth
leol
Cyflwyniad
Mae swyddog materion y wasg ym maes llywodraeth leol yn gyfrifol
am hybu enw da'r cyngor ymhlith y cyfryngau a meithrin perthynas
dda â'r cyfryngau hynny. Fe elwir swyddogion materion y wasg
yn swyddogion materion cyfathrebu a'r cyfryngau weithiau.
Amgylchiadau'r gwaith
Yn y swyddfa mae swyddogion materion y wasg yn gweithio gan amlaf,
er y gallai fod rhai cyfarfodydd allanol.
Gweithgareddau beunyddiol
Mae swyddog materion y wasg ym myd llywodraeth leol yn meithrin
perthynas â'r cyfryngau lleol i gyfleu rôl a delfryd y cyngor,
gofalu bod y cyfryngau'n sôn am y cyngor mewn modd teg a chytbwys a
hybu enw da'r cyngor ymhlith trigolion y fro, adrannau gwladol a
chwmnïau lleol.
Gallai'r dyletswyddau amrywio yn ôl ehangder y rôl, ond bydd
swyddogion materion y wasg yn ymwneud â'r gorchwylion isod, fel
arfer:
- cynnal ymchwil, a llunio a chyhoeddi datganiadau i'r wasg yn
ymateb i ymholiadau'r cyfryngau;
- pennu pa straeon fydd yn berthnasol a gofalu bod y cyfryngau
rhanbarthol, lleol, cenedlaethol ac arbenigol yn eu trafod;
- cydweithio'n agos ag amryw adrannau'r cyngor i ofalu bod y
cyfryngau'n sôn am waith pwysig;
- paratoi a defnyddio strategaethau trin a thrafod y wasg mewn
argyfyngau megis llunio datganiadau dros dro, gweithredu'n
llefarydd yn y cyfryngau a gofalu eu bod yn trafod straeon a allai
fod yn niweidiol mewn modd craff a chyflym;
- trefnu sesiynau hysbysu, cynadleddau i'r wasg a sesiynau tynnu
lluniau;
- cydweithio'n agos â swyddogion materion y wasg a'r cyfryngau yn
y cyrff sy'n bartneriaid i'r cyngor;
- hyfforddi a chynghori swyddogion ac aelodau sy'n cynrychioli'r
cyngor yn y cyfryngau ac a allai gael eu cyfweld.
Medrau a ddiddordebau
Mae angen y canlynol:
- medrau ysgrifennu a golygu rhagorol;
- gallu deall gwybodaeth gymhleth ac amrywiol a'i dehongli i bobl
eraill;
- gallu cyfathrebu'n dda ar lafar a thrafod telerau;
- gallu ymdopi â phwysau;
- medrau da o ran trin a thrafod amser a threfnu gwaith;
- medrau ardderchog ynglŷn â marchnata a chysylltiadau
cyhoeddus.
Meini prawf derbyn
Fel arfer, bydd angen gradd mewn maes megis newyddiaduraeth,
marchnata neu gysylltiadau cyhoeddus. Ar y llaw arall, gallai
fod angen cymwysterau proffesiynol Sefydliad Breiniol Marchnata,
Sefydliad Breiniol Cysylltiadau Cyhoeddus neu Gyngor Cenedlaethol
Hyfforddi Newyddiadurwyr. Gallai rhai cynghorau ofyn am
brofiad o weithio ym maes marchnata a chyfathrebu, hefyd.
Gobeithion a chyfleoedd yn y dyfodol
Y llwybr arferol yw dechrau'n gynorthwywr cysylltiadau cyhoeddus
neu gyfathrebu a mynd yn swyddog materion y wasg wedyn. Mae'n
bosibl cael eich dyrchafu'n uwch swyddog cyfathrebu neu bennaeth
cyfathrebu a marchnata ar ôl profiad perthnasol. Gallai fod
modd symud i adrannau eraill ac arbenigo mewn cyfathrebu ynglŷn â
rhai meysydd penodol megis gwasanaethau i blant neu wasanaethau'r
amgylchedd.
Rhagor o wybodaeth a gwasanaethau
Sefydliad Breiniol Marchnata: www.cim.co.uk
Sefydliad Breiniol Cysylltiadau Cyhoeddus: www.cipr.co.uk
Sefydliad yr Addysg am Gyfathrebu, Hysbysebu a Marchnata: www.camfoundation.com
Cyngor Cenedlaethol Hyfforddi Newyddiadurwyr: www.nctj.com
Fe gewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.