Cyflwyniad
Mae cysylltiadau cyhoeddus yn ymwneud â chyfleu delwedd gadarnhaol
i'r cyhoedd - trwy'r cyfryngau (papurau newydd, cylchgronau, y
radio a'r teledu) fel arfer. Mae cynorthwywyr cysylltiadau
cyhoeddus yn gweithio mewn awdurdodau lleol o bob math, gan ofalu
bod gwaith da'r cyngor yn hysbys ymhlith y cyhoedd. Gan fod y
cyfryngau'n fwyfwy pwysig yn ein cymdeithas ni, mae pwysigrwydd
maes cysylltiadau cyhoeddus - a nifer y swyddi sydd ynddo - ar
gynnydd.
Amgylchiadau'r gwaith
Mae rhywfaint o waith i'w wneud yn y swyddfa, ond rhaid mynd allan
yn aml i gwrdd â newyddiadurwyr a threulio peth amser yn yr
achlysuron sydd i'w hyrwyddo.
Gweithgareddau beunyddiol
Gwaith y cynorthwywyr cysylltiadau cyhoeddus yw helpu'r swyddogion
cysylltiadau cyhoeddus i gyflawni nodau'r tîm - sef hyrwyddo'r
cyngor ymhlith pobl y fro a/neu'r wlad a gofalu bod yr wybodaeth
briodol yn hysbys i'r cyhoedd a'r cyfryngau. Gall y gwaith
fod yn rhagweithredol:
- casglu gwybodaeth am ddigwyddiadau sydd i ddod a gwaith y
cyngor;
- llunio datganiadau i'r wasg;
- cael sêl bendith er mwyn eu cyhoeddi;
- eu hanfon at newyddiadurwyr a phobl eraill sydd ar y rhestr
bostio;
- ffonio newyddiadurwyr i weld a yw stori o ddiddordeb iddyn
nhw;
- anfon gwybodaeth ddilynol atyn nhw;
- trefnu sesiynau tynnu lluniau a chyfweliadau, gan gynnwys
achlysuron lansio;
- darllen trwy bapurau newydd a chylchgronau, gan gasglu pigion i
ddangos ble mae erthyglau wedi'u cyhoeddi;
neu'n ymatebol:
- ymateb i geisiadau newyddiadurwyr am wybodaeth;
- cynnal ymchwil i ddata - ar gais cydweithwyr ac adrannau eraill
o'r cyngor, er enghraifft.
Gallai fod angen cynnal ymchwil i gytundebau newydd trwy ffonio
papurau newydd, cylchgronau, gorsafoedd radio a sianeli teledu i
siarad â'r bobl briodol. Fe allai fod rhaid gweithio yn ôl
amserlenni caeth yn yr adran (pan fo rhywbeth ar fin digwydd) a
gyda newyddiadurwyr (pan fo dogfen neu raglen ar fin cael ei
chyhoeddi/darlledu). Wrth drefnu achlysur, gallai fod angen dod o
hyd i rywle addas ar ei gyfer, dod o hyd i enwogion a threfnu
lluniaeth. Yn ystod achlysur, gallai fod rhaid gofalu am y
wasg, y ffotograffwyr neu'r pwysigion.
Medrau a diddordebau
Mae angen y canlynol:
- medrau cyfathrebu da (ar lafar ac ar bapur fel ei gilydd) -
ynghyd â'r gallu i ennyn diddordeb newyddiadurwr fel y bydd yn
fodlon cyhoeddi erthygl;
- meddwl rhesymegol - gallu cyfleu hanfod stori'n gryno;
- gallu trin a thrafod amryw orchwylion yr un pryd;
- gallu gweithio'n dda o dan bwysau ac yn ôl amserlenni;
- rhadlonrwydd;
- dyfalbarhad - i wneud yn siwr eich bod yn cyfleu'ch neges.
Meini prawf derbyn
Does dim llwybr safonol i'r maes hwn. Gallai Cymhwyster
Galwedigaethol Cenedlaethol yn astudiaethau'r cyfryngau fod yn
ddefnyddiol yn ogystal â chymwysterau Cyngor Addysg Busnes a
Technoleg a/neu ddiploma/tystysgrif mewn maes megis busnes, cyllid
neu farchnata. Fe fydd rhai cynghorau'n mynnu gradd.
Mae nifer o gyrsiau prifysgol ac iddyn nhw gysylltiadau cyhoeddus,
marchnata neu astudiaethau'r cyfryngau yn brif bwnc. Mae
diplomâu i ôl-raddedigion a graddau meistr ym maes cysylltiadau
cyhoeddus, hefyd. Ar ôl eich penodi, cewch chi astudio ar
gyfer cymwysterau Sefydliad yr Addysg am Gyfathrebu, Hysbysebu a
Marchnata neu Sefydliad Breiniol Marchnata.
Gobeithion a chyfleoedd yn y dyfodol
Mae nifer y cynorthwywyr cysylltiadau cyhoeddus yn amrywio'n
sylweddol yn ôl pa mor fawr yw'r awdurdod lleol. Mae'n bosibl
cael dyrchafiad yn swyddog cysylltiadau cyhoeddus ac, yn y pen
draw, yn gyfarwyddwr cysylltiadau cyhoeddus. Mae modd symud i
awdurdodau eraill ar gyfer dyrchafiad, hefyd. Mae swyddi
cysylltiadau cyhoeddus y tu allan i faes llywodraeth leol - er
enghraifft, yn y byd masnachol. Gallai rolau marchnata a
hysbysebu fod o ddiddordeb, hefyd.
Rhagor o wybodaeth a gwasanaethau
Sefydliad Breiniol Cysylltiadau Cyhoeddus: www.cipr.co.uk
Sefydliad Breiniol Marchnata: www.cim.co.uk
Sefydliad yr Addysg am Gyfathrebu, Hysbysebu a Marchnata: www.camfoundation.com
Fe gewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.