Helpu'ch cymuned chi ynglŷn â chyfathrebu ym maes
llywodraeth leol
Cyflwyniad
I weithredu'n effeithiol, rhaid i bob sefydliad mawr gyfathrebu'n
dda yn fewnol, a rôl swyddog cyfathrebu mewnol yw gofalu bod y
rheolwyr, y staff a'r amryw adrannau'n cyfathrebu â'i gilydd mewn
modd eglur ac effeithlon. Mewn rhai cynghorau, gelwir
gweithwyr o'r fath yn swyddogion cyfathrebu corfforaethol.
Amgylchiadau'r gwaith
Yn y swyddfa mae swyddogion cyfathrebu mewnol yn gweithio, er bod
rhaid iddyn nhw fynd i gyfarfodydd mewn sawl adran o'r
cyngor. Felly, gallai fod angen teithio rhwng gwahanol
adeiladau. 37 awr yw'r wythnos safonol, fel arfer.
Gweithgareddau beunyddiol
Mae swyddogion cyfathrebu mewnol yn gyfrifol am lunio a defnyddio
strategaeth cyfathrebu mewnol y cyngor. Mae'n bwysig i staff
cyfathrebu mewnol ofalu eu bod yn gyfarwydd â rôl, delfryd ac
amcanion y cyngor a'r modd mae'i adrannau'n cynnig
gwasanaethau. Dyma orchwylion y gallai fod angen eu
cyflawni:
- gofalu bod amrywiaeth o ddulliau cyfathrebu ar gael i'r staff
fel y gallan nhw gadw golwg ar newyddion pwysig yn y cyngor, rhannu
gwybodaeth a chodi pryderon trwy gyfrwng - er enghraifft -
cyfarfodydd eu timau a'u rheolwyr, cyfarfodydd unigol â rheolwyr,
papurau hysbysu a negeseuon diweddaru trwy ebost;
- rheoli gwaith llunio a lledaenu cylchlythyr mewnol y cyngor gan
gynnwys ysgrifennu a golygu'r cynnwys, trefnu i luniau gael eu
tynnu a goruchwylio'r dylunio a'r argraffu (lle bo copïau
caled);
- rheoli gwaith llunio mewnrwyd y cyngor gan gynnwys cydweithio
ag arbenigwyr TG ynglŷn â'r diwyg a'r dylunio, a chydweithio â
swyddogion ledled y cyngor i greu cynnwys addas;
- ymgynghori â staff y cyngor i hel eu sylwadau am ddulliau
cyfathrebu mewnol a gofyn iddyn nhw awgrymu ffyrdd o'u gwella;
- defnyddio adborth y staff i argymell a chyflwyno mentrau newydd
a fydd yn gwella'r cyfathrebu mewnol;
- cynghori a chyfarwyddo'r staff am ddefnyddio brand ac enw'r
cyngor;
- trefnu a rheoli seminarau a hyfforddiant fel y gall y staff
ddysgu rhagor am amcanion y cyngor a'i adrannau;
- cydweithio â swyddogion ledled y cyngor mewn prosiectau penodol
megis Buddsoddwyr mewn Pobl, Fframwaith Gwella Cydraddoldeb Cymru
ac ymgysylltu â gweithwyr.
Medrau a diddordebau
Dyma'r rhai hanfodol:
- gallu cyfathrebu'n dda â phobl o bob lliw a llun;
- medrau da ynglŷn ag ysgrifennu a golygu deunydd;
- meddwl arloesol a chreadigol;
- medrau da ynglŷn â rheoli prosiectau;
- manwl gywirdeb;
- gallu esbonio materion cymhleth.
Meini prawf derbyn
Gallai fod modd dechrau'n weithiwr dibrofiad a chael eich dyrchafu
maes o law. Fe fyddai angen addysg o safon dda megis 5 TGAU
A*-C gan gynnwys mathemateg a Saesneg neu Gymraeg. Gallai
peth profiad o waith swyddfa ym maes gweinyddu neu ofalu am
gwsmeriaid fod o gymorth, hefyd.
Fel arfer, byddai angen ar swyddog cyfathrebu mewnol ym myd
llywodraeth leol radd neu gymhwyster cyfwerth mewn pynciau megis
marchnata, cysylltiadau cyhoeddus, gweinyddu busnes, astudiaethau
busnes neu astudiaethau'r cyfryngau. Fe fyddai un o
gymwysterau proffesiynol perthnasol Sefydliad Breiniol Marchnata
neu Sefydliad Breiniol Cysylltiadau Cyhoeddus o fantais, ond
efallai y cewch chi gyfle i astudio ar eu cyfer yn y gwaith.
Gobeithion a chyfleoedd yn y dyfodol
Gallech chi ddechrau'n gynorthwywr cyfathrebu neu farchnata a
chael eich dyrchafu'n swyddog cyfathrebu mewnol wedyn. Gallai
fod cyfleoedd i symud i rolau gwahanol yn adran marchnata a
chyfathrebu'r cyngor megis swyddog cyfathrebu, swyddog y wasg neu
swyddog achlysuron. Efallai y bydd cyfleoedd i fynd ymlaen i
swyddi uwch megis rheolwr cyfathrebu, hefyd. Mae modd symud i
waith marchnata mewn adran megis y gwasanaethau i blant neu
wasanaethau'r amgylchedd.
Rhagor o wybodaeth a gwasanaethau
Sefydliad Breiniol Marchnata: www.cim.co.uk
Sefydliad Breiniol Cysylltiadau Cyhoeddus: www.cipr.co.uk
Sefydliad Hysbysebu a Marchnata Cyfathrebu: www.camfoundation.com
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.