Swyddog marchnata a datblygu cludiant cyhoeddus

Cyflwyniad
Nod y swydd hon yw annog rhagor o bobl i fynd i'r gwaith gyda'r bws a gadael eu ceir gartref er lles yr amgylchedd.  Mae swyddogion marchnata a datblygu cludiant cyhoeddus yn hyrwyddo gwasanaethau cludo lleol trwy gydweithio â chwmnïau'r bysiau i lunio ffyrdd effeithiol o farchnata cludiant.

Mae swydd hon mewn awdurdodau lleol o bob math - fel arfer, yn adran trafnidiaeth y gwasanaethau amgylcheddol.

Amgylchiadau'r gwaith
Mae peth gwaith yn y swyddfa a pheth teithio trwy'r ardal i weld gwaith yr adran ar lawr gwlad ac ymweld â mudiadau lle mae cyfle i hybu polisi cludiant y cyngor - er enghraifft, os yw cylch lleol yn cwrdd i brotestio am dagfeydd mewn tref neu ddinas.  37 awr yw'r wythnos safonol, a gallai fod rhaid gweithio gyda'r nos a thros y Sul.

Gweithgareddau beunyddiol
Mae'r swyddogion yn rhan o dîm cludo teithwyr o dan arweiniad rheolwr.  Fel arfer, bydd cynlluniwr cludiant a swyddog cludiant y cyngor yn y tîm hwnnw, hefyd.  Y prif ddyletswyddau yw helpu i wneud y canlynol:

  • meithrin partneriaethau gyda chwmnïau bysiau;
  • llunio strategaeth hysbysu pobl am gludiant cyhoeddus;
  • hyrwyddo tocyn y bydd pob cwmni'n ei gydnabod yn ôl Deddf 'Trafnidiaeth' 2000 a Deddf 'Cystadlu' 1998 - un tocyn, unrhyw fws;
  • sefydlu cynlluniau tocynnau mantais i ddisgyblion a hen bobl;
  • sefydlu mentrau hybu tocynnau mantais;
  • marchnata a hysbysebu gwasanaethau bysiau gan gynnwys gosod mannau gwybodaeth mewn lleoedd allweddol;
  • meithrin partneriaethau gyda chynghorau tref a bro i hybu cludiant gwledig;
  • sefydlu fforwm cwmnïau a gweithwyr lleol i hybu cynlluniau teithio;
  • dadansoddi gwasanaethau'n fanwl gywir yn ôl prif ardaloedd cyflogaeth y sir a gwella'r gwasanaethau hynny trwy feithrin cysylltiadau agos â chwmnïau a gweithwyr;
  • cynnal arolygon o'r rhai nad ydyn nhw'n defnyddio bysiau ac, ar ôl dehongli'r canlyniadau, llunio rhaglenni i wneud cludiant cyhoeddus yn fwy deniadol.

Medrau a diddordebau
Dyma'r rhai hanfodol:

  • cyfathrebu'n dda ar lafar ac ar bapur;
  • llunio mentrau marchnata a hysbysebu effeithiol;
  • negodi'n effeithiol;
  • dadansoddi materion a phennu dewisiadau;
  • datrys problemau;
  • deall egwyddorion gofalu am gwsmeriaid;
  • cyd-dynnu â phobl o bob lliw a llun;
  • siarad yn gyhoeddus mewn cyfarfodydd.

Byddai disgwyl ichi ddeall yn eglur pa mor werthfawr yw technoleg gwybodaeth o ran trefnu a marchnata cludiant, hefyd.  Byddai o fantais pe baech chi'n gyfarwydd â'r deddfau ynglŷn â chludiant cyhoeddus.

Meini prawf derbyn
Ar gyfer y swyddi uwch, dylai fod gradd gyda chi.  Mae profiad o weithio mewn tîm, rheoli prosiectau a defnyddio pecynnau TG yn hanfodol ar gyfer swyddi canolradd.  At hynny, byddai profiad o'r canlynol o gymorth:

  • llunio mentrau marchnata;
  • rhwydweithio ar draws sefydliadau a gweithio gyda chwmnïau cludiant cyhoeddus neu ddiwydiant tebyg;
  • trefnu a rheoli cyllidebau.

Gobeithion a chyfleoedd yn y dyfodol
Bydd cludiant yn fater pwysig i fyd llywodraeth leol drwy'r amser, a bydd cyfleoedd i ddatblygu gyrfa yn y maes hwn yn parhau.  Mae modd symud i swyddi cysylltiedig megis rheolwr cludiant teithwyr a chael eich dyrchafu wedyn yn ddirprwy bennaeth trafnidiaeth gan arwain at swydd pennaeth trafnidiaeth yn y pen draw.

Byddai swyddi rheolwyr mewn cwmnïau preifat perthnasol, gan gynnwys cwmnïau ymgynghorol trafnidiaeth a chludiant, ar gael hefyd.

Rhagor o wybodaeth a gwasanaethau
GoSkills: www.goskills.org
Sefydliad Breiniol Logisteg a Chludiant: www.ciltuk.org.uk
Sefydliad Breiniol Cysylltiadau Cyhoeddus: www.cipr.co.uk
Sefydliad Breiniol Priffyrdd a Thrafnidiaeth: www.iht.org
Sefydliad Logisteg a Chludiant: www.iolt.org.uk

Mae Gyrfa Cymru wedi cynhyrchu erthygl Sbotolau ar yrfaoedd yn y diwydiannau creadigol: https://www.careerswales.com/cy/golwg-ar-diwydiannau-creadigol/

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Related Links