Cyflwyniad
Mae swyddogion lles addysg cynghorau leol yn gweithio gydag
ysgolion, plant, rhieni, cynhalwyr ac asiantaethau i ofalu y gall
plant elwa'n llawn ar y cyfleoedd addysgol i gyd sydd ar gael iddyn
nhw. Maen nhw'n gyfrifol am hybu presenoldeb yn yr ysgol,
trin a thrafod absenoldeb a gweithio gyda phlant a allai gael eu
gwahardd.
Amgylchiadau'r gwaith
Mae'r rhan fwyaf o swyddogion lles addysg ym maes llywodraeth
lleol yn gweithio yn y swyddfa er y byddan nhw'n treulio cryn dipyn
o amser yn ymweld ag ysgolion neu yn cwrdd â phlant a'u teuluoedd
yn eu cartrefi nhw. 37 awr yw'r wythnos safonol er y gallai
fod angen ymweld â rhai pobl gyda'r nos.
Gweithgareddau beunyddiol
Mae gwasanaeth lles addysg cyngor lleol yn gyfrifol am hyrwyddo
presenoldeb yn yr ysgol a helpu i ddatrys unrhyw broblemau allai
achosi i ddisgybl golli'r ysgol. Ar ben hynny, mae gwasanaeth
lles addysg yn gyfrifol am ofalu bod y cyngor yn cyflawni ei
ddyletswyddau statudol ynglŷn â phresenoldeb yn yr ysgol, diogelu
plant a gwahardd disgyblion. Mae swyddogion lles addysg y
cynghorau lleol yn cyflawni amrywiaeth o orchwylion megis:
- ymweld ag ysgolion i nodi anawsterau ynglŷn â phresenoldeb
disgyblion a chytuno ar y camau y bydd yr ysgolion a gwasanaeth
lles addysg y cyngor yn eu cymryd i'w datrys;
- trin a thrafod achosion gan weithio'n agos gyda phlant,
rhieni/cynhalwyr a'r ysgol er mwyn gwella presenoldeb
disgyblion;
- diweddaru ffeiliau achosion a llunio adroddiadau'n gywir;
- cynghori, cyfarwyddo a hyfforddi staff ysgolion am faterion
lles addysg megis presenoldeb, gwahardd, erlid a chyfathrebu â
rhieni/cynhalwyr;
- cynghori a chyfarwyddo staff ysgolion am faterion diogelu
plant;
- cynghori a chyfarwyddo staff a llywodraethwyr ysgolion am
wahardd plant;
- archwilio cofrestrau presenoldeb yn fynych;
- cynnig amrywiaeth o gymorth a chynghorion i blant a'u teuluoedd
megis cymorth i ddisgyblion unigol, gweithio gyda grwpiau o
ddisgyblion a chynnal grwpiau cymorth i rieni a chynhalwyr;
- cydweithio ag adrannau eraill y cyngor ac asiantaethau allanol
yn ogystal â chyfeirio disgyblion at wasanaethau priodol
eraill.
Medrau a diddordebau
Dyma'r rhai hanfodol:
- medrau cyfathrebu ardderchog i feithrin perthynas dda â phlant,
rhieni, cynhalwyr a staff ysgolion;
- agwedd dringar;
- gallu dadansoddi sefyllfaoedd ac ymddygiad yn gywir;
- medrau da ynglŷn â thrin a thrafod amser;
- medrau da ynglŷn â llunio adroddiadau;
- ymroddiad i les ac addysg plant.
Meini prawf derbyn
Gallai'r meini prawf amrywio o'r naill awdurdod i'r llall ond fe
fydd y rhan fwyaf o gyflogwyr yn mynnu addysg o safon dda gan
gynnwys o leiaf 5 TGAU a 2 Safon Uwch neu gymwysterau
cyfatebol. Gallai fod angen cymhwyster megis diploma neu radd
ym maes gwaith cymdeithasol neu les addysg, statws athro cymwysedig
neu gymhwyster arall mewn maes megis cwnsela neu waith ieuenctid,
hefyd. At hynny, bydd y rhan fwyaf o gynghorau lleol yn mynnu
profiad perthnasol o weithio gyda phlant a theuluoedd.
Gobeithion a chyfleoedd yn y dyfodol
Gallai fod modd cael eich dyrchafu'n rheolwr yng ngwasanaeth lles
addysg neu yn adran addysg ehangach y cyngor lleol. Ar ôl
hyfforddiant a phrofiad perthnasol, fe allech chi arbenigo mewn
meysydd megis anghenion addysgol arbennig. Ar y llaw arall,
gallech chi ddod o hyd i swydd yn y gwasanaethau cymdeithasol i
blant neu'r gwasanaethau ieuenctid.
Rhagor o wybodaeth a gwasanaethau
Cymdeithas Gweithwyr Cymdeithasol Prydain: www.basw.co.uk
Cyngor Gofal Cymru: www.ccwales.org.uk
Gofal Cymuned: www.communitycare.co.uk
Gwirfoddolwyr Gwasanaeth Cymuned:
www.csv.org.uk/socialhealthcare
Adran Iechyd San Steffan: www.dh.gov.uk
Swyddi ym maes addysg: www.eteach.com
Cyngor Addysgu Cyffredinol Cymru: www.gtcw.org.uk
Cofrestrfa Hyfforddi Graddedigion yn Athrawon:
www.gttr.ac.uk
Cyngor Galwedigaethau Iechyd a Gofal: www.hpc-uk.org
Asiantaeth Cartrefi a Chymunedau:
www.homesandcommunities.co.uk
Medrau er Gofal: www.skillsforcare.org.uk
Cymdeithas Gofal Cymdeithasol:
www.socialcareassociation.co.uk
Hyfforddiant ac Addysg Athrawon Cymru:
www.teachertrainingcymru.org
Efallai bod rhagor am hyn ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.