Croeso

Cyflwyniad
Mae Swyddog Diogelwch Cymunedol a Warden yn berson rhannol-swyddogol mewn iwnifform sy'n cynnal patrôl o fewn cymunedau yn y gobaith o leihau troseddu, ymddygiad gwrthgymdeithasol ac ofn troseddau drwy gynnig tawelwch meddwl, cymorth a chefnogaeth er mwyn creu amgylchedd byw mwy diogel a dymunol o fewn ein cymunedau. Gall y swydd fod yn amrywiol iawn, a gall olygu gweithio gyda nifer o asiantaethau a grwpiau cymunedol.  Nid oes unrhyw gyfrifoldebau rheoli staff ond mae yna gyfrifoldeb i ddefnyddio a chadw eitemau bach o offer yn briodol ac i warchod systemau data.

Amgylchedd Gwaith
Mae mwyafrif y gwaith yn digwydd y tu allan ond ceir rhai dyletswyddau dan do ac mewn swyddfa. Bydd yna ryngweithio wyneb yn wyneb ag aelodau o'r cyhoedd.

Gweithgareddau Dyddiol
Mae dyletswyddau Swyddog Diogelwch Cymunedol a Warden yn cynnwys:

• darparu presenoldeb patrôl proffil uchel er mwyn atal niwsans cyhoeddus, ymddygiad gwrth-gymdeithasol a throsedd, ac annog ymddygiad da;
• darparu presenoldeb gweledol yn ein cymunedau er mwyn lleihau ofn troseddau a chynnig tawelwch meddwl i bobl leol a gwneud iddynt deimlo'n ddiogel a balch o le maent yn byw;
• datblygu ysbryd cymunedol, drwy fod yn agos-atoch, ymatebol a thrwy gyfathrebu newyddion positif a delio gyda phroblemau yn sydyn a phroffesiynol; 
• ymateb yn sydyn er mwyn atal neu roi terfyn ar broblemau trefn gyhoeddus neu ddiogelwch o fewn ein cymunedau, gan alw am gefnogaeth briodol lle bo angen; 
• cefnogi preswylwyr bregus o bob oed mewn modd cwrtais a sensitive;
• datblygu cysylltiadau â grwpiau ieuenctid a grwpiau cymunedol eraill a gweithio gyda hwy i leihau anhrefn;
• annog preswylwyr i gymryd cyfrifoldeb dros hysbysu'r awdurdodau am ymddygiad gwrth-gymdeithasol a deilliannau'r fath ymddygiad;
• hyrwyddo agwedd llawn gofal, cymorth a heb ragfarn tuag at breswylwyr, ymwelwyr, y cyhoedd a pharhau i fod yn gwrtais a boneddigaidd;
• casglu gwybodaeth am ymddygiad gwrth-gymdeithasol, amheus neu weithgaredd troseddol, a chyflwyno'r wybodaeth hon i'r swyddog partneriaeth priodol;
• cyflawni unrhyw ddyletswyddau eraill rhesymol a allai godi o fewn amodau a graddfa'r swydd yn unol â chyfarwyddyd y rheolwr llinell;
• adrodd ar faterion yn ymwneud â diogelwch cymunedol a godir gan bobl leol, neu broblemau amgylcheddol a welant o'u cwmpas, e.e. helyntion, peryglon, diffygion, tipio anghyfreithlon, baw ci, graffiti, sbwriel a fandaliaeth;
• bod yn llygaid a chlustiau ar ran y Cyngor drwy sylwi ar, ymchwilio i ac adrodd ar helyntion, yn cynnwys bod yn dyst proffesiynol a mynychu'r llys fel bo angen;
• bod yn barod i weithredu'n bositif yn y maes o safbwynt gwelliannau amgylcheddol neu gymunedol megis gwneud gwaith atgyweirio neu gynnal a chadw syml neu gael gwared ar achosion bychan o graffiti neu sbwriel;
• ysgrifennu adroddiadau cryno yn dilyn digwyddiad neu helynt a phrosesu gwybodaeth yn fanwl;
• cymryd rhan mewn, a chefnogi, digwyddiadau cymunedol neu fentrau lleol; 
• cynghori preswylwyr ar ddiogelwch eu cartref a mentrau atal troseddu eraill; 
• paratoi a dosbarthu taflenni fel bo angen;
• gwneud dyletswyddau gweinyddol a chlerigol sylfaenol yn ôl y gofyn;
• monitro sefyllfaoedd gan ddefnyddio CCTV neu offer arall;
• mynychu cyfarfodydd cymunedol yn ôl y gofyn, yn aml gyda'r nos;
• gwirio, cloi, datgloi ac adrodd ar ddiogelwch adeiladau a lleoliadau cyhoeddus eraill, fel bo angen;
• ymgymryd â dyletswyddau gorfodaeth, yn cynnwys rhoi cosbau penodedig am droseddau.

Sgiliau a Diddordebau
Bydd Swyddog Diogelwch Cymunedol a Warden yn:

• gallu defnyddio TG ar gyfer ysgrifennu adroddiadau, defnyddio'r we, e-bost a logio data;
• gallu cyfathrebu'n effeithiol gydag amrywiaeth eang o gynulleidfaoedd, yn llafar ac yn ysgrifenedig, a bydd yn gallu cynnig gwasanaeth effeithiol llawn gofal. Yn benodol, bydd yn arddangos gallu i wrando ar a deall anghenion preswylwyr a'u cefnogi mewn modd sensitif ac effeithiol;
• gallu gweithio'n effeithiol mewn sefyllfaoedd sensitif neu dan bwysau, gan ymdrin â gwrthdaro gyda thact a diplomyddiaeth er mwyn sicrhau diogelwch personol;
• gallu gweithio ar eich liwt eich hun neu fel rhan o dîm;
• gallu blaenoriaethu llwyth gwaith a chwblhau tasgau hyd eu diwedd; 
• meddu ar brofiad mewn swydd a oedd yn gofyn am weithio gyda'r cyhoedd a darparu gwasanaeth;
• meddu ar drwydded yrru lân lawn;
• gallu cyflawni holl ddyletswyddau'r swydd yn cynnwys cerdded hyd at 8 milltir ar droed yn ddyddiol;
• barod i dderbyn rhaglen hyfforddiant.

Gofynion Mynediad
Rhaid i Swyddog Diogelwch Cymunedol a Warden gael pum TGAU a bod wedi pasio'r arholiadau Mathemateg a Saesneg, neu gyfatebol.  Mae'n hanfodol bod Swyddog Diogelwch Cymunedol/Warden wedi derbyn achrediad Cynllun Achredu Diogelwch Cymunedol Prif Gwnstabl Gwent.  Mae'r swydd hon yn ddarostyngedig i broses sgrinio gynhwysfawr yn cynnwys gwiriad datgelu uwch gyda'r Gwasanaeth Datgelu a Gwahardd.

Cyfleoedd a Rhagolygon ar gyfer y Dyfodol
Bydd cyfleoedd swyddi'n dibynnu ar bob awdurdod lleol ac ar os ydynt yn gweithredu Cynllun Warden Cymunedol ai peidio.  Am fwy o wybodaeth am swyddi gwag, edrychwch ar wefan y Cyngor y mae gennych ddiddordeb ynddo.

Gwasanaethau a Gwybodaeth Bellach
All Wales Community Safety Advisory Board www.wlga.gov.uk/all-wales-community-safety-forum

Gallwch gael gwybodaeth bellach ar y maes gwaith hwn drwy Gyrfa Cymru (www.gyrfacymru.com) neu yn eich llyfrgell leol, y swyddfa yrfaoedd neu lyfrgell yrfaoedd eich ysgol.