Swyddog datblygu’r chwaraeon

Astudiaeth achos >>

Helpu cymunedau i ddatblygu gweithgareddau corfforol a chwaraeon ym myd llywodraeth leol.

Cyflwyniad
Mae timau datblygu'r chwaraeon ym myd llywodraeth leol yn gyfrifol am hybu, llunio, cynnig a rheoli rhaglenni a mentrau fel y bydd rhagor o bobl yn cymryd rhan yn y chwaraeon ym mhob rhan o'r gymuned.

Amgylchiadau'r gwaith
Mae swyddogion datblygu'r chwaraeon yn gweithio yn y swyddfa ac yn treulio peth amser yn ymweld â chyfleusterau chwaraeon a hamdden ar gyfer cyfarfodydd neu weithgareddau penodol, hefyd.  37 awr yw'r wythnos safonol, er y gallai fod angen gweithio gyda'r nos a thros y Sul.

Gweithgareddau beunyddiol
Mae swyddogion datblygu'r chwaraeon yn gyfrifol am baratoi, defnyddio a monitro cynllun y cyngor ar gyfer datblygu'r chwaraeon, gan ofalu bod y cyngor yn hyrwyddo chwaraeon ac yn annog pobl ym mhob rhan o'r gymuned i gymryd rhan ynddyn nhw.  Maen nhw'n ymgynghori â'r cyhoedd a phartneriaid ynglŷn â chyfleoedd i ddatblygu'r chwaraeon er mwyn gwella gwasanaethau a chynyddu nifer y rhai sy'n eu defnyddio.

Gallai dyletswyddau swyddog datblygu'r chwaraeon amrywio yn ôl ei gyfrifoldebau, ei rôl a'r lle mae'n gweithio ynddo.  Dyma rai gorchwylion nodweddiadol:

  • trefnu a hybu gweithgareddau a mentrau mynych ar gyfer grwpiau penodol megis helpu pobl ifanc i ddarganfod a datblygu eu doniau o ran chwaraeon neu gynnig gweithgareddau corfforol i bobl hŷn;
  • trefnu a hybu gweithgareddau mawr megis rhedeg er hwyl, marathonau, campau i'r ifanc, cystadlaethau pêl-droed, diwrnodau i deuluoedd a chystadlaethau mabolgampau;
  • cydweithio'n agos â'r ysgolion ynglŷn â strategaethau addysg gorfforol a'r chwaraeon a meithrin cysylltiadau rhwng clybiau chwaraeon ac ysgolion;
  • helpu mentrau megis Chwaraeon Cymru;
  • cyflwyno a chydlynu mentrau hyfforddi personol a mentora;
  • dod o hyd i ffynonellau arian ar gyfer prosiectau ym myd y chwaraeon;
  • cydweithio â phartneriaid a chlybiau chwaraeon yr ardal ynglŷn â chyfleoedd i gymryd rhan mewn gweithgareddau.

Medrau a diddordebau
 Mae angen y canlynol:

  • diddordeb a gallu yn y chwaraeon;
  • medrau cyfathrebu ardderchog (ar lafar ac ar bapur fel ei gilydd);
  • medrau trefnu da;
  • gallu gweithio mewn tîm;
  • syniadau creadigol ynglŷn â defnyddio strategaethau a chynlluniau;
  • gallu ysgogi pobl eraill

Meini prawf derbyn
Mae'r rhan fwyaf o gynghorau'n mynnu gradd neu ddiploma genedlaethol uwch ym maes datblygu'r chwaraeon, gwyddorau'r chwaraeon neu bwnc cysylltiedig.  Ar y llaw arall neu ar ben hynny, gallai fod angen cymwysterau perthnasol megis hyfforddwr (cymwysterau galwedigaethol cenedlaethol, o bosibl), prentisiaeth neu gymwysterau cymorth cyntaf.  Mae mudiadau gwirfoddol yn cynnig cyfleoedd i hyfforddi ym myd y chwaraeon, a bydd profiad o'r fath yn werthfawr pan foch chi'n ymgeisio am swydd.  Mae cymwysterau proffesiynol ar gael trwy ISPAL a'r Sefydliad dros Reoli Chwaraeon a Hamdden.

Gobeithion a chyfleoedd yn y dyfodol
Gallai fod cyfleoedd i fynd yn rheolwr yn adran y gwasanaethau hamdden.

Rhagor o wybodaeth a gwasanaethau
Sefydliad Breiniol Rheoli Chwaraeon a Gweithgareddau Corfforol: www.cimspa.co.uk
Skills Active: www.skillsactive.com
Chwaraeon Cymru: www.sportwales.org.uk

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Related Links