Cyflwyniad
Mae adfywio'n weithgaredd pwysig i awdurdodau lleol. Mae
modd cymryd amryw gamau yn y maes hwn megis datblygu dociau neu
gychwyn busnesau yn y gymuned. Mae adfywio'n cwmpasu datblygu
economaidd, cymdeithasol ac amgylcheddol ac, o ganlyniad, mae angen
amrywiaeth helaeth o fedrau ar swyddogion adfywio. Boed helpu
cymuned i sefydlu cwmni newydd, cynghori grwpiau neu gwmnïau am
baratoi cais am grant, cael gafael ar arian i wella tai neu
ddatblygu cyfundrefnau cludiant - dyma orchwylion nodweddiadol i
swyddog adfywio.
O achos natur amrywiol a diddorol adfywio, ynghyd â'r ffaith ei
fod yn ddatblygiad cymharol ddiweddar ym mhrif frwd gwaith
awdurdodau lleol, gallai fod yn rhan o strwythurau sydd ar waith
ers tro. Yn y trefi, gallai fod yn rhan o uned adnewyddu
trefol, tîm datblygu economaidd neu weithgaredd datblygu
cymunedol. Fel arfer, fe fydd adfywio o dan adain adrannau
cynllunio er y gallai rhai awdurdodau lleol ofyn i asiantaethau
allanol gynnal prosiectau adfywio ar eu rhan.
Amgylchiadau'r gwaith
Er bod gan swyddogion adfywio eu swyddfa, fe fyddan nhw'n treulio
llawer o amser yn y gymuned gan ymweld â chwmnïau preifat,
sefydliadau cyhoeddus a mudiadau cymunedol. O achos natur
amryfal y gwaith, mae angen gweithio gyda phobl o bob lliw a llun -
plant, prif weithredwyr, gweithwyr a gwleidyddion - mewn amrywiaeth
o amgylchiadau. Beth bynnag fo'r gorchwyl boed siarad mewn
cyfarfod cyhoeddus, helpu cymuned i godi sbwriel neu fynd i
gyfarfod ar safle adeiladu, mae angen bod yn graff i ofalu eu bod
yn gwisgo'r dillad priodol ac yn amlygu arbenigedd
proffesiynol. 37 awr yw'r wythnos safonol fel arfer, er y
gallai fod angen gweithio gyda'r nos a thros y Sul weithiau.
Gweithgareddau beunyddiol
Bydd swyddogion adfywio'n helpu grwpiau lleol i ddechrau a
datblygu prosiectau adfywio. Felly, rhaid adnabod problem,
asesu'r sefyllfa â'i datrys, weithiau. Ymhlith gweithgareddau
mae cynnig cynghorion a gwybodaeth i helpu grwpiau i gael gafael ar
arian (cymunedau a busnesau fel ei gilydd). Gall fod angen
trefnu hyfforddiant i rai grwpiau neu annog cymunedau i fanteisio
ar arian allanol fel y gallan nhw elwa i'r eithaf ar bob cyfle.
Un o brif rannau gwaith swyddog adfywio yw cysylltu'n aml ag
amrywiaeth eang o gydweithwyr a sefydliadau allanol megis
gwasanaethau cynghori am fusnes, siambrau masnach neu arianwyr
elusennol. Ar ben hynny, mae rhaid bod yn effro i newidiadau
gwleidyddol, effaith polisïau a'r modd mae camau lleol yn cyd-fynd
â'r strategaethau ehangach. Rhwydweithio a phartneriaethau
sy'n ategu gwasanaeth adfywio. Un o'r prif rolau eraill yw
hybu twristiaeth genedlaethol a rhyngwladol i ddenu incwm er lles
cwmnïau a chymunedau lleol. Er bod llawer o swyddogion
adfywio'n ymwneud â rôl gyffredinol, bydd rhai'n arbenigo mewn
meysydd megis helpu prosiectau sy'n cynnig arian ar gyfer
tai/cludiant neu roi cymorth i gymunedau a chwmnïau.
Medrau a diddordebau
Gall swyddogion adfywio ddod o sawl cefndir ond y prif ofynion
yw'r gallu i weithio'n dringar gyda phobl a grwpiau o bob lliw a
llun. Rhaid ymrwymo i hybu cyfleoedd cyfartal, hefyd.
Wrth helpu cwmnïau a chymunedau i ddatblygu, bydd angen trin a
thrafod gwybodaeth gymhleth, llunio adroddiadau a pharatoi
ceisiadau o bob math. Felly, mae llythrennedd a rhifedd yn
hanfodol.
Mae'r gallu i weithio ar y cyd ymhlith y medrau pwysicaf, a
dylai swyddog adfywio fod yn fodlon gweithio mewn tîm. Gan
fod angen gweithio y tu allan i oriau gwaith ac ar safleoedd
allanol yn aml, fodd bynnag, mae rhaid bod yn un hyderus, cryf ei
gymhelliant sy'n gallu dod i benderfyniadau. I hwyluso
cynhwysiant ac annog pobl i ymgysylltu â phrosiectau heb deimlo'n
anesmwyth, mae'n bosibl y bydd gallu i siarad Cymraeg yn
ddefnyddiol iawn.
Meini prawf derbyn
Mae profiad yn y gwaith yn bwysig fel arfer, yn ogystal â'r gallu
i gael gafael ar arian, gwybodaeth drylwyr am gyfundrefnau
grantiau, cymorth i gwmnïau a chymunedau a medrau rheoli cyllidebau
a phrosiectau. O ran cymwysterau academaidd, bydd eisiau
gradd yn aml er y gallai rhai cyflogwyr dderbyn tystysgrifau Safon
A neu gymhwyster cyfwerth. Er ei bod yn annhebygol y bydd
angen gradd mewn pwnc penodol, bydd y rhan fwyaf o gyflogwyr yn
annog swyddogion adfywio i astudio ar gyfer cymwysterau ychwanegol
megis MSc mewn gwahanol bynciau - gwaith cymunedol, adfywio trefol,
datblygu diwydiannol ac ati.
Gobeithion a chyfleoedd yn y dyfodol
Mae gwaith adfywio trefi a rhanbarthau'n mynd rhagddo ledled y
Deyrnas Gyfunol a gallai fod angen i swyddogion symud i ardaloedd
eraill i ddod o hyd i gyfleon addas. Gallai fod modd
gweithio'n uniongyrchol i awdurdod lleol, sefydliad hyd braich neu
asiantaeth leol/gymunedol sydd o dan nawdd gwladol. Mae'n
bosibl datblygu gyrfa trwy asiantaethau cenedlaethol, Ewropeaidd a
rhyngwladol, cyrff cynllunio trefol neu ranbarthol neu asiantaethau
datblygu rhanbarthol.
Rhagor o wybodaeth a gwasanaethau
Canolfan Strategaethau Economaidd Lleol: www.cles.org.uk
Sefydliad Datblygu Economaidd: www.ied.co.uk
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.