Croeso

Rhagarweiniad
Mae timau gwella ysgolion mewn cynghorau lleol yn rhoi cyngor a chymorth i ysgolion mewn amrywiaeth o feysydd gan gynnwys: rheoli ac arwain ysgolion; cwricwlwm ac asesu; gwella ysgolion; a datblygiad proffesiynol staff. Cylch gwaith cynghorydd gwella ysgolion yw cefnogi, cynghori a herio'r ysgol o ran ei hymdrech mewn perthynas â gwella parhaus drwy raglen o ymweliadau drwy gydol y flwyddyn. Mae cynghorwyr gwella ysgolion yn gweithio i gynghorau unedau, cynghorau sir a chyngorau metropolitanaidd.

Amgylchedd Gwaith
Mae cynghorwyr gwella ysgolion yn gweithio o swyddfa yn bennaf, ond maent yn treulio llawer o amser yn ymweld ag ysgolion ac yn mynd i gyfarfodydd gyda gweithwyr proffesiynol eraill.

Gweithgareddau o Ddydd i Ddydd
Mae cynghorwyr gwella ysgolion yn gweithio'n agos gyda grŵp dynodedig o ysgolion yn yr ardal leol yn rhoi cymorth, yn herio ac yn ymyrryd pan fydd yn briodol. Efallai y bydd ymweld â'r ysgol yn cynnwys rhai o'r tasgau canlynol:

• arsylwi gwersi ac awgrymu ffyrdd o wella perfformiad athrawon;
• gwerthuso cynnydd a chyrhaeddiad disgyblion;
• trefnu hyfforddiant yn y gwasanaeth ar gyfer athrawon a phenaethiaid;
• rhoi cymorth yn y cyfnod sy'n arwain at arolygiadau ESTYN (swyddfa Arolygiaeth Ei Mawrhydi ar gyfer Addysg a Hyfforddiant yng Nghymru);
• llunio cynlluniau gweithredu ar ôl arolygiadau ESTYN wedi'u seilio ar feysydd dynodedig ar gyfer gwella;
• defnyddio data ysgolion a data cymharol i helpu ysgolion i bennu targedau y mae modd eu cyflawni, ond sy'n heriol o ran cyrhaeddiad disgyblion, addysgu a dysgu, arwain a rheoli, cynllunio adnoddau a datblygiad proffesiynol;
• monitro cynnydd ysgol yn erbyn targedau;
• hyrwyddo unrhyw fentrau cyngor fel cynlluniau llythrennedd, neu raglenni anghenion arbennig;
• rhoi cyfeiriad strategol:
• cynghori Cyrff Llywodraethu ar berfformiad ysgol, strategaethau gwella a phenodiadau Pennaeth a Dirprwy Bennaeth;
• cynnal adolygiadau ar gyfer ysgolion penodol sy'n cael anawsterau a darparu cymorth ar eu cyfer

Efallai y bydd cynghorwyr gwella ysgolion hefyd yn gysylltiedig ag amrywiaeth o weithgareddau eraill yn ymwneud â pholisïau plant a phobl ifanc ac addysg y cyngor, fel:

• llunio adroddiadau ac argymhellion yn dangos i ba raddau y mae safonau a thargedau a bennir gan y Llywodraeth yn cael eu bodloni gan y cyngor a'i ysgolion;
• ymgysylltu ag arolygwyr ESTYN;
• gweithio gyda phrifysgolion lleol a darparwyr hyfforddiant i ddatblygu deunyddiau hyfforddiant ar gyfer hyfforddiant athrawon;
• asesu athrawon dan hyfforddiant.

Sgiliau a Diddordebau
Mae angen i gynghorwyr gwella ysgolion:

• feddu ar sgiliau rhyngbersonol ardderchog a gallu i feithrin cydberthynas ag amrywiaeth o bobl wahanol, o ddisgyblion, athrawon a phenaethiaid i lywodraethwyr a gweithwyr proffesiynol eraill;
• ymdrechu i sicrhau gwelliant parhaus mewn ysgolion;
• dealltwriaeth am sut mae ysgolion a'r system addysg yn gweithio;
• sgiliau gwrando da;
• gallu cymathu a dehongli gwybodaeth yn gyflym;
• sgiliau da o ran llunio adroddiadau.

Gofynion Mynediad
Y gofyniad lleiaf yw gradd gychwynnol a statws athro cymwysedig.
Mae profiad o weithio fel athro yn hanfodol ond efallai y bydd angen profiad fel uwch reolwr.

Posibiliadau a chyfleoedd yn y dyfodol
Mae llwybr dyrchafu diffiniedig amlwg at rôl uwch ymgynghorydd gwella a phrif ymgynghorydd gwella. Efallai y bydd llwybrau dyrchafu posibl i rôl prif swyddog addysg, neu bennaeth gwasanaethau plant. Mae cyfleoedd hefyd mewn meysydd cysylltiedig yn ymwneud â mentrau penodol ac arbenigedd fel Addysg y Blynyddoedd Cynnar, Llythrennedd a Rhifedd.

Rhagor o Wybodaeth a Gwasanaethau
Cymdeithas Gweithwyr Proffesiynol mewn Ymddiriedolaethau Addysg a Phlant www.aspect.org.uk
Cyngor Addysgu Cyffredinol Cymru www.gtcw.org.uk
ESTYN  www.estyn.gov.uk
Llywodraeth Cymru www.wales.gov.uk  
Swyddi addysg www.eteach.com
Yr Adran Addysg www.education.gov.uk

Mae modd cael rhagor o wybodaeth am y maes hwn trwy wefan Gyrfaoedd Cymru (www.careerswales.com/), y llyfrgell leol, swyddfa gyrfaoedd eich bro neu lyfrgell eich ysgol.