Cyflwyniad
Mae Swyddogion Datblygu Gwasanaethau Hamdden yn rhan o'r tîm
rheoli sy'n gofalu am wasanaethau hamdden a gynigir gan y
cyngor. Maent fel arfer wedi'u lleoli mewn maes penodol o'r
gwasanaethau hamdden, er enghraifft, parciau a chefn gwlad,
amgueddfeydd ac orielau, llyfrgelloedd a gwasanaethau gwybodaeth ac
ati. Mae Swyddogion Datblygu Gwasanaethau Hamdden yn gweithio
gyda gweithwyr proffesiynol eraill i ddylunio a datblygu ffyrdd o
wneud gwasanaethau hamdden y cyngor yn fwy effeithiol ac effeithlon
ac yn fwy poblogaidd gyda'r cyhoedd.
Amgylchedd Gwaith
Mae Swyddogion Datblygu Gwasanaethau Hamdden yn gweithio yn
swyddfeydd y cyngor, ond yn aml mae'n rhaid iddynt ymweld ag
amrywiaeth o safleoedd hamdden. Maent fel arfer yn gweithio
wythnos 37 awr safonol, gyda rhywfaint o waith gyda'r nos ac ar
benwythnosau.
Gweithgareddau Dyddiol
Mae dyletswyddau Swyddog Datblygu Gwasanaethau Hamdden yn amrywio
yn unol â'i faes gwaith penodol yn y gwasanaethau hamdden.
Fodd bynnag, gallai fod angen iddo gyflawni unrhyw rai o'r tasgau
canlynol:
- ymgynghori ag adrannau eraill, aelodau'r cyngor, sefydliadau
lleol, grwpiau cymunedol a staff gwasanaethau hamdden a gwrando ar
eu hawgrymiadau ar gyfer gwelliannau i wasanaethau hamdden cyfredol
a datblygiadau ar gyfer rhai newydd;
- ystyried ffyrdd o annog mwy o bobl i ddefnyddio gwasanaethau
hamdden, er enghraifft, ystyried datblygu teithiau natur mewn
parciau ac yng nghefn gwlad;
- ysgrifennu adroddiadau yn seiliedig ar ymgynghoriadau a rhannu
a chyflwyno gwybodaeth a syniadau i reolwyr a chynghorwyr;
- rheoli projectau hamdden newydd i sicrhau eu bod yn rhedeg yn
ddidrafferth, gan gynnwys cysylltu ag ymgynghorwyr, contractwyr a
chydweithwyr yn y cyngor;
- gwerthuso gwasanaethau hamdden yn barhaus, gan roi sylw penodol
i gost-effeithiolrwydd;
- paratoi amcanbrisiau ar gyfer cyllidebau a gwariant
monitro;
- cynnal gweithgareddau marchnata i hyrwyddo gwasanaethau
hamdden;
- ymateb i gwynion cwsmeriaid;
- efallai y bydd yn rheoli tîm bach o staff ym maes datblygu
gwasanaethau hamdden.
Sgiliau a Galluoedd
Mae angen i Swyddogion Datblygu Gwasanaethau Hamdden:
- fod yn llawn dychymyg ac arloesol;
- meddu ar y gallu i annog pobl i gymryd rhan mewn gweithgareddau
a phrojectau;
- meddu ar sgiliau cyfathrebu yn ysgrifenedig ac ar lafar;
- gallu trefnu a blaenoriaethu baich gwaith;
- gweithio gyda phobl a chymunedau i ddarparu gwasanaethau;
- meddu ar sgiliau trafod;
- meddu ar sgiliau rhifedd.
Gofynion Mynediad
Gallai gradd mewn pwnc perthnasol fel rheoli hamdden neu ddatblygu
chwaraeon fod yn angenrheidiol. Fodd bynnag, yn aml mae
profiad perthnasol blaenorol mewn gwasanaethau hamdden/rôl reoli yn
bwysicach. Gallai cymhwyster proffesiynol perthnasol ac
aelodaeth o'r Sefydliad Siartredig dros Reoli Chwaraeon a
Gweithgarwch Corfforol (CIMPSA) hefyd fod o fudd. Gall fod yn
bosibl gweithio tuag at N/SVQ perthnasol yn y gwaith.
Cyfleoedd yn y Dyfodol
Gallai fod cyfleoedd i symud i lefel reoli uwch, yn y gwasanaethau
hamdden neu fan arall yn y cyngor, er enghraifft, llyfrgelloedd neu
barciau a chefn gwlad. Gall hefyd fod yn bosibl symud i rolau
datblygu polisi a rheoli perfformiad eraill yng nghanolfan
gorfforaethol y cyngor.
Rhagor o Wybodaeth a Gwasanaethau
Sefydliad Siartredig dros Reoli Chwaraeon a Gweithgarwch Corfforol
www.cimspa.co.uk
SkillsActive www.skillsactive.com
Gallwch gael rhagor o wybodaeth am y maes gwaith hwn drwy Yrfa
Cymru (www.gyrfacymru.com)
neu yn eich llyfrgell leol, swyddfa gyrfaoedd neu lyfrgell
gyrfaoedd eich ysgol.