Cyflwyniad
Mae pob adran o'r cyngor yn gweithio yn ôl cyllideb - hyn
a hyn o arian sydd i'w wario yn ystod y flwyddyn o dan amodau llym.
Gwaith swyddog cymorth cyllidebol yw cydweithio â staff yr
amryw adrannau i gymharu'r costau â'r arian sydd ar gael a chadw
golwg ar y gwariant yn rhan o gynllun gwario'r cyngor i gyd.
Amgylchiadau'r gwaith
Yn y swyddfa y byddwch chi'n gweithio. Mae
swyddogion cymorth cyllidebol yn treulio'r rhan fwyaf o bob dydd
wrth gyfrifiadur. Yn ystod gweddill yr amser, byddan nhw'n
cysylltu â chydweithwyr mewn gwahanol adrannau.
Gweithgareddau beunyddiol
Dechrau'r cylch cyllidebol yw siarad â rheolwyr unedau
unigol yr amryw adrannau i nodi eu gwariant cyfredol ac amcangyfrif
faint y byddan nhw'n ei wario yn ystod y flwyddyn nesaf. Ar
ôl gwneud hynny, bydd modd pennu'r cyllidebau, gan eu newid yn ôl
yr angen yn ystod y flwyddyn.
Yn ystod y flwyddyn, bydd swyddogion cymorth cyllidebol yn
cofnodi'r gwariant ym mhob cyllideb, yn cadw golwg ar y gwariant ac
yn paratoi adroddiadau misol fydd yn cyfleu darlun o wariant y
cyngor i gyd.
Ar ddiwedd y flwyddyn, byddan nhw'n casglu gwybodaeth am
gredydwyr a dyledwyr cyn cau pen y mwdwl ar gyfrifon pob adran.
Medrau a diddordebau
Dyma'r rhai hanfodol:
- gallu trin a thrafod gwybodaeth fanwl;
- ffordd drefnus a rhesymegol o fynd ati;
- meddwl dadansoddol er mwyn gwneud synnwyr o ystadegau
helaeth;
- rhifedd - rhaid ichi allu trin a thrafod ffigurau;
- medrau trefnu;
- gallu cyfathrebu'n eglur â phobl o bob lliw a llun;
- bod yn gyfarwydd â rhaglenni a sustemau cyfrifiadurol.
Meini prawf ymgeisio
Mae'r meini prawf yn amrywio o'r naill gyngor i'r
llall. Mae rhai heb bennu unrhyw gymwysterau penodol ond mae
eraill yn mynnu gradd prifysgol. Bydd profiad ym meysydd
mathemateg, ystadegau a chyfrifeg yn ddefnyddiol, yn ogystal â'r
gallu i drin a thrafod meddalwedd megis taenlenni a rhaglenni
penodol y cyngor sy'n eich cyflogi. Gallai fod modd astudio
ar gyfer Cymhwyster Galwedigaethol Cenedlaethol ac efallai y bydd
hyfforddiant proffesiynol ar gael.
Gobeithion a cyfleoedd yn y dyfodol
Gallech chi gael eich dyrchafu'n rheolwr ac, ar ôl ennill
rhagor o gymwysterau, efallai y bydd yn bosibl cael swydd ym maes
cyfrifeg.
Rhagor o wybodaeth a gwasanaethau
Sefydliad Breiniol Cyfrifyddion Arian Cyhoeddus: www.cipfa.org.uk
Mae modd cael rhagor o wybodaeth am y maes hwn trwy wefan
Gyrfaoedd Cymru (www.careerswales.com/)
y llyfrgell leol, swyddfa gyrfaoedd eich bro neu lyfrgell eich
ysgol.