Croeso

Cyflwyniad
Mae swyddogion ailgylchu'n helpu i achub yr amgylchedd - maen nhw'n paratoi ac yn defnyddio cynlluniau gweithredu amgylcheddol ac yn cynnal cynlluniau ailgylchu gwastraff megis gwydr, papur a chaniau.  Mae gan bob cyngor rywun sy'n gyfrifol am bolisïau ailgylchu, naill ai yn y gwasanaethau amgylcheddol neu adran glanhau'r strydoedd.  Weithiau, bydd yn cyfuno'r gwaith â meysydd megis rheoli gwastraff, iechyd yr amgylchedd neu fentrau cymunedol.

Amgylchiadau'r gwaith
Er mai swyddfa yw'r ganolfan, bydd peth gweithio yn yr awyr agored megis teithio i archwilio mannau ailgylchu, chwilio am safleoedd newydd ac ymweld â chwmnïau.  37 awr yw'r wythnos safonol, fel arfer.  Gallai fod cyfleoedd i weithio'n rhan-amser a rhannu swydd.

Gweithgareddau beunyddiol
Yn ôl pob tebyg, bydd y dyletswyddau fel a ganlyn:

• ceisio gwella strategaethau ailgylchu hirsefydlog a datblygu ffyrdd newydd o gasglu ac ailgylchu gwastraff yn ôl targedau gwladol;
• cydweithio â rhai o adrannau eraill y cyngor megis glanhau a chynllunio i ychwanegu at nifer y mannau ailgylchu;
• cael gwybod am fentrau ailgylchu newydd trwy ddarllen cyfarwyddebau'r cyngor, cadw golwg ar bolisïau Undeb Ewrop, mynd i gynadleddau a chyfarfodydd a chynnal ymchwil;
• rheoli cytundebau â chwmnïau sy'n cludo gwastraff i'w ailgylchu gan gysylltu â nhw dros y ffôn a thrafod telerau;
• cynghori cwmnïau lleol am gael gwared ar wastraff;
• ateb ymholiadau'r cyhoedd a thrin a thrafod cwynion - er enghraifft, os yw safle ailgylchu'n orlawn;
• goruchwylio gwaith dosbarthu bagiau, biniau a blychau ailgylchu;
• teithio'r ardal i archwilio safleoedd/canolfannau ailgylchu mewn meysydd parcio, archfarchnadoedd ac ati gan ofalu bod contractwyr yn gwagu biniau ac yn clirio gwydr a chaniau;
• annog pob un o adrannau'r cyngor i ailgylchu gwastraff;
• hysbysebu mentrau ailgylchu'r cyngor trwy siarad â'r wasg leol, ysgrifennu datganiadau i'r wasg a rhoi cyfweliadau i sianeli radio lleol;
• llunio posteri, taflenni a llawlyfrau ailgylchu yn ogystal â rhoi gwybodaeth ar gyfer gwefan y cyngor;
• paratoi adroddiadau sydd i'w rhoi gerbron aelodau'r cyngor.

Mae rhagor am fis ym mywyd uwch swyddog ailgylchu mewn awdurdod leol ar wefan Gwella a Datblygu Llywodraeth Leol
 
Medrau a diddordebau
Mae angen y canlynol:

• bod yn effro i faterion amgylcheddol a deall deddfau'r Deyrnas Gyfunol ac Undeb Ewrop ynglŷn ag ailgylchu;
• agwedd ragweithredol ynglŷn â rheoli gwastraff, polisïau ailgylchu a materion amgylcheddol;
• medrau cyfathrebu da a'r gallu i roi cyflwyniadau eglur;
• natur ddarbwyllol a medrau negodi da;
• gallu ysgrifennu adroddiadau;
• gallu trefnu a chynllunio;
• gallu cynnal ymchwil, dadansoddi'r canlyniadau a dyfeisio atebion ymarferol.

Meini prawf derbyn
Mae rhai cynghorau'n mynnu gradd mewn pwnc perthnasol megis astudiaethau neu wyddorau amgylcheddol a rheoli gwastraff.  Mae'r mwyafrif yn gofyn am gefndir ym maes rheoli ac ailgylchu gwastraff.  Ar gyfer rhai swyddi uwch, gallai fod rhaid bod yn aelod o Sefydliad Breiniol Rheoli Gwastraff.  Efallai y bydd modd astudio ar gyfer Cymhwyster Galwedigaethol Cenedlaethol neu gymwysterau proffesiynol Sefydliad Breiniol Rheoli Gwastraff ar ôl cael y swydd.

Yn ddelfrydol, byddai trwydded yrru gyda chi, hefyd.

Gobeithion a chyfleoedd yn y dyfodol
Mae modd cael eich dyrchafu'n uwch reolwr ym maes rheoli ac ailgylchu gwastraff.  Ar ôl cael rhagor o hyfforddiant a chymwysterau, gallai fod yn bosibl symud i feysydd eraill yn y gwasanaethau amgylcheddol megis iechyd yr amgylchedd, cynllunio neu drwyddedu.  Gallech chi symud i rôl sy'n ymwneud â chynnal ymchwil neu ddatblygu polisïau mewn adran arall, hefyd.

Rhagor o wybodaeth a gwasanaethau
Sefydliad Breiniol Rheoli Gwastraff: www.ciwm.co.uk
Medrau Ynni a Chyfleustodau: www.euskills.co.uk
Cymdeithas Gwasanaethau Amgylcheddol: www.esauk.org
Recycle Now www.recyclenow.com
Bwrdd Hyfforddi a Chynghori Diwydiant Rheoli Gwastraff: www.wamitab.org.uk

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.