Cyflwyniad
Dyma swydd sy'n ymwneud â thrin a thrafod meysydd chwarae.
Cyfrifoldeb am ardd enfawr! Mae awdurdodau lleol yn gyfrifol
am lunio a rheoli amryw fannau yn yr awyr agored megis coetir,
parciau, mannau cerddwyr a gerddi adeiladau cyhoeddus.
Mae gofalwr cwrs golff yn gyfrifol am gynnal a chadw tair neu
bedair milltir o ardal wledig ar gyfer y chwaraewyr a phobl eraill
allai fynd am dro yno gyda eu cŵn. Er mai cwrs golff yw e yn
llygaid rhai, mae'n hawl tramwy i bobl eraill. Weithiau, bydd
y ddwy garfan yn groes i'w gilydd. Mae'r cŵn yn hoff iawn o'r
tywod a'r glaswellt!
Mae gweithwyr meysydd chwarae ym mhob cyngor lleol, er bod
cwmnïau preifat yn cyflawni rhai gorchwylion - megis clirio coetir
garw - trwy gytundeb. 'Garddwr' yw enw'r swydd hon mewn rhai
cynghorau lleol.
Amgylchiadau'r gwaith
Mae'n anochel y byddwch chi yn yr awyr agored gan amlaf oni bai
bod y tywydd heb ganiatáu hynny. Mewn tywydd gwael, cewch chi
gyfle i gynnal a chadw'r offer. Fe fydd digon o gerdded ar
hyd y cwrs hefyd, a thipyn o waith dwylo â'r offer er bod cerbydau
torri glaswellt ar gyfer y lleiniau. Mae ffordd wahanol o
gynnal a chadw'r cyrsiau ar lan y môr gan eu bod braidd yn wastad a
thywodlyd fel arfer. Bydd cerbyd ar gyfer cludo'r offer a'r
gweithwyr trwy'r parc.
Ar wahân i waedd y golffwyr, dim ond yr adar a'r gwynt sy'n cadw
sŵn yno. Mae'n weithle iach er y gallai fod yn anodd ar
adegau achos bod y tywydd yn gyfnewidiol, yr un fath â hwyliau rhai
chwaraewyr a allai'ch beirniadu'n hallt os nad ydyn nhw'n fodlon ar
gyflwr y lleiniau. Mae dillad ac esgidiau diogelu ar
gael. Bydd yr oriau'n amrywio - 45 bob wythnos yn ystod yr
haf a 32 bob wythnos yn y gaeaf. Bydd rhaid dechrau'r gwaith
yn gynnar drwy gydol y flwyddyn, ar yr amod bod y tywydd yn
dda.
Gweithgareddau beunyddiol
Y prif orchwylion yw torri'r glaswellt a bodloni'r cyngor lleol
a'r golffwyr trwy osgoi ymyrryd yn y chwarae. Gall fod yn
anodd gweithio o gwmpas chwaraewyr gan fod angen torri ar draws y
gwaith nes eu bod wedi mynd heibio.
Mae llawer mwy i'r swydd na hynny, fodd bynnag. Rhaid
gofalu am y lleiniau trwy dynnu gwlith a baw cwningod a thrin y
glaswellt â chemegion arbennig fel y bydd yn tyfu'n addas.
Rhaid clirio a thacluso'r tywod hefyd, yn ogystal â chodi sbwriel a
gwagio'r biniau bob dydd. Mae arferion mochyn daear ac
anifeiliaid eraill yn effeithio ar rai nodweddion. Rhaid
ailwampio twmpathau bob hydref a gwanwyn, ehangu'r mannau cychwyn a
gosod glaswellt newydd. Y prif amcan yw gwella'r cwrs golff
yn ôl amodau cyllidebol llym y cyngor lleol.
Bydd gweithiwr meysydd chwarae yn cwrdd â rheolwyr y cyngor,
pwyllgor y cwrs, golffwyr a cherddwyr yn fynych. Rhaid
gweithio ar eich pen eich hun ac yn rhan o dîm fel ei gilydd.
Medrau a diddordebau
Dyma'r rhai hanfodol:
- gallu ymarferol;
- manwl gywirdeb;
- diddordeb yng nghefn gwlad;
- gallu trin a thrafod symiau;
- agwedd dringar a'r gallu i gyd-dynnu â phobl.
Rhaid gweithio o'ch pen a'ch pastwn eich hun am y gallech chi
fod ar eich pen eich hun drwy'r dydd. Ar ôl gorffen gorchwyl,
dylech chi allu penderfynu beth i'w wneud nesaf yn ôl yr amser a'r
tywydd heb gyfarwyddiadau. Rhaid bod yn heini, hefyd!
Meini prawf derbyn
Dechreuodd y rhan fwyaf o weithwyr meysydd chwarae yn hyfforddeion
yn syth ar ôl gadael yr ysgol. Er nad oes angen cymwysterau
galwedigaethol, bydd y rhan fwyaf o weithwyr yn astudio mewn coleg
ar gyfer tystysgrif Sefydliad y Ddinas a'r Urddau.
Gobeithion a chyfleoedd yn y dyfodol
Dyma faes cyfyng a chystadleuol. Ar ôl cyrraedd swydd pen
gweithiwr, y cam nesaf fyddai rheolwr cwrs golff, o bosibl.
Mae modd cael dyrchafiad trwy symud i adran sy'n ymwneud â chynnal
a chadw mathau eraill o feysydd, symud i gyngor arall neu symud i
erddi/cyrsiau golff preifat. Rheolwr cytundebau yw'r swydd
uchaf.
Rhagor o wybodaeth a gwasanaethau
Sefydliad y Ddinas a'r Urddau: www.city-and-guilds.co.uk
Sefydliad Gweithwyr Meysydd Chwarae: www.iog.org
Lantra: www.lantra.co.uk
Cymdeithas Gofalwyr Cyrsiau Golff Prydain: www.bigga.org.uk
Gallai fod rhagor o wybodaeth ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.