Cyflwyniad
Prif swyddogaeth gyrrwr / cynorthwy-ydd gofal yw cludo pobl hŷn,
pobl sydd ag anableddau a'r sawl sydd â salwch tymor hir, rhwng eu
cartrefi a chanolfannau gofal oriau dydd neu ganolfannau
gweithgareddau. Yn ogystal â chludo teithwyr, mae gofyn bod y
gyrwyr / cynorthwywyr gofal yn sicrhau bod cleientiaid yn ddiogel
ac yn gyfforddus yn ystod y daith.
Yr Amgylchfyd Gwaith
Mae gyrwyr / cynorthwywyr gofal yn treulio cryn dipyn o amser y tu
allan ac mewn cerbyd (bws bach sydd wedi'i addasu ar gyfer pobl
anabl neu deithwyr hŷn yn amlach na pheidio). Er bydd gofyn
weithiau i yrwyr / cynorthwywyr gofal weithio ar eu pennau'u
hunain, maen nhw'n rhan o dîm ac efallai bydd gofyn iddyn nhw roi
cymorth i yrwyr eraill, er enghraifft os oes rhywun wedi torri i
lawr. Efallai bydd cydymaith yn gallu rhoi cymorth o ran rhoi gofal
i deithwyr hefyd.
Gall yr oriau gwaith amrywio yn ôl y galw. Gall diwrnod arferol
fod rhwng 8.30am a 11.00am yn cludo pobl i ganolfannau neu
weithgareddau ac wedyn rhwng 3.00pm a 5.00pm yn eu cludo nhw yn ôl
i'w cartrefi. Mae rhai awdurdodau yn cyflogi gyrwyr amser llawn.
Efallai bydd gofyn gweithio gyda'r nos neu ar y penwythnos.
Byddwn ni'n darparu gwisg, gan gynnwys dillad llachar a dillad
diogelwch megis tabard a menyg. Yn ogystal â hynny, efallai byddwn
ni'n darparu ffonau symudol a phecyn cymorth cyntaf.
Gweithgareddau bob dydd
Mae'r diwrnod nodweddiadol yn dechrau gyda gwirio'r cerbyd (olew,
dŵr, pwysedd teiars a thanwydd). Mae'r gyrrwr / cynorthwy-ydd gofal
yn derbyn rhestr o enwau a chyfeiriadau teithwyr ac yn cynllunio'r
llwybr mwyaf cyfleus ar gyfer casglu teithwyr. Gan ddibynnu ar
nifer y teithwyr, lefel y gofal sydd ei angen a maint y cerbyd,
gall gymryd nifer o oriau i gasglu pawb a'u cludo nhw yn ddiogel.
Hwyrach y bydd angen mwy nag un daith. Gan ddibynnu p'un ai ydyn
nhw'n mynd â chleientiaid i ganolfan oriau dydd neu i weithgaredd
penodol, efallai bydd gyrwyr / cynorthwywyr gofal yn gwneud llwybr
gwahanol bob dydd.
Mewn theori dylai cleientiaid fod yn barod i adael y tŷ, ond yn
ymarferol efallai bydd gofyn i yrwyr / cynorthwywyr gofal roi
cymorth i rai cleientiaid wrth adael y cartref, gan ofalu'u bod nhw
yn gwisgo cot, bod y tŷ dan glo a bod yr allweddi yn ddiogel mewn
bag neu boced. Yn ogystal â hynny, gall gymryd peth amser i ofalu
bod cadeiriau olwyn yn sownd a bod teithwyr yn gwisgo
gwregysau.
Ar gyrraedd y ganolfan, bydd y gyrrwr / cynorthwy-ydd gofal yn
rhoi cymorth i deithwyr ddod allan o'r cerbyd yn ddiogel. Gall hyn
gynnwys codi a gostwng y lifft neu ramp i ganiatáu i'r sawl sy'n
defnyddio cadeiriau olwyn adael y cerbyd a rhoi help llaw i eraill
ddisgyn yn ddiogel. Yn hwyrach yn y dydd, bydd y
gyrrwr/cynorthwy-ydd gofal yn cludo cleientiaid yn ôl i'w
cartrefi. Mae gofyn bod gyrwyr / cynorthwywyr gofal yn cadw'r
cerbyd yn lân ac yn daclus.
Sgiliau a Diddordebau
Bydd gyrwyr / cynorthwywyr gofal angen:
- bod yn yrwyr gofalus a diogel;
- dangos gofal tuag at deithwyr;
- parodrwydd i siarad â phobl ac yn awyddus i wneud i deithwyr
deimlo'n gyfforddus;
- synnwyr cyffredin;
- bod yn gorfforol iach;
- amynedd.
Gofynion Mynediad
Mae gofyn bod gyda chi drwydded yrru lawn. Fel arfer, bydd gofyn i
chi fod yn gyrru ers blwyddyn o leiaf. Gan ddibynnu ar y math o
gerbyd bydd gofyn i chi'i yrru, efallai bydd gofyn i chi gael math
penodol o drwydded yrru neu gymryd prawf gyrru ychwanegol.
Gallai profiad blaenorol o weithio gyda phobl ym maes cymorth /
gofal cymdeithasol fod yn ddefnyddiol iawn. Mewn achosion penodol,
fe allai hyn fod yn hanfodol. Mae rhai cynghorau yn gofyn am
gymhwyster NVQ Lefel 2 mewn Gofal.
Byddwch chi'n cael hyfforddiant o ran gyrru'r cerbydau. Mae modd
cael hyfforddiant mewn materion eraill hefyd, megis cymorth cyntaf,
diogelwch tân a symud a thrafod cleientiaid. Mae'n bosibl bydd
cyfle i ddilyn cwrs NVQ/SVQ mewn Gofal yn ystod eich cyfnod yn y
swydd.
Cyfleoedd a Rhagolygon ar gyfer y dyfodol
Gyda sawl blwyddyn o brofiad a sgiliau da o ran trefnu a rheoli
pobl, mae'n bosibl dod yn flaen yrrwr neu'n rheolwr trafnidiaeth yn
gyfrifol am fflyd o gerbydau a gyrwyr. Yn ogystal â hynny, efallai
y bydd hi'n bosibl symud i swyddi gofal cymdeithasol penodol.
Rhagor o Wybodaeth a Gwasanaethau
Cyngor Gofal Cymru www.cgcymru.org.uk
Gofal Cymuned www.communitycare.co.uk
Gwirfoddolwyr Gwasanaethau Cymuned www.csv.org.uk/socialhealthcare
Yr Adran Iechyd www.dh.gov.uk
Cyngor Iechyd a Phroffesiynau Gofal Iechyd www.hpc-uk.org
Asiantaeth Cartrefi a Chymunedau www.homesandcommunities.co.uk
Sgiliau Gofal www.skillsforcare.org.uk
Cymdeithas Gofal Cymdeithasol www.socialcareassociation.co.uk
I gael rhagor o fanylion am y maes gwaith yma, cysylltwch â
Gyrfa Cymru (www.gyrfacymru.com) neu alw
heibio i'ch llyfrgell leol, swyddfa gyrfaoedd neu lyfrgell
gyrfaoedd yr ysgol.