Gweithiwr chwarae

Cyflwyniad
Hoffech chi helpu plant 10 oed i lunio mygydau Calan Gaeaf, dyfarnu gêm bêl-droed gyfeillgar neu oruchwylio 20 o blant ar wibdaith i amgueddfa leol?  Os felly, efallai mai gweithiwr chwarae yw'r swydd i chi.  Mae gweithwyr chwarae'n rheoli mannau chwarae y tu allan i'r ysgol a chynlluniau chwarae yn ystod y gwyliau lle caiff plant rhwng 4 a 16 oed ddod i chwarae a chymysgu gyda phlant a phobl ifanc eraill.  Mae cyfleusterau o'r fath yn cynnig lle diogel i blant cyn yr ysgol ac wedyn ac yn ystod y gwyliau.  Mae gan yr awdurdodau lleol ryw 1,700 o weithwyr chwarae a threfnwyr cynlluniau chwarae gwyliau'r Pasg a'r haf.

Amgylchiadau'r gwaith
Fel arfer, mae cynlluniau chwarae'n mynd ymlaen mewn cyfleusterau chwarae antur, canolfannau chwarae, canolfannau cymunedol, neuaddau ysgol a neuaddau pentref.  Dim ond yn ystod tymhorau'r ysgol y bydd rhai cynlluniau chwarae ar gael.  Ar y llaw arall, dim ond yn ystod gwyliau'r ysgol y bydd eraill yn gweithredu.  Mae rhai ar gael drwy gydol y flwyddyn.  35-39 awr yw'r wythnos safonol i staff amser llawn fel arfer, ac mae angen gweithio gyda'r nos yn aml i gynnal y gwasanaeth ar ôl oriau'r ysgol.  Bydd y gweithle'n un swnllyd a blêr ar adegau - ond, os ydych chi'n hoffi bod gyda phlant, byddwch chi'n gyfarwydd â hynny.  Gallai'r gwaith fod braidd yn gorfforol - paratoi cyfarpar cyn bod y plant yn cyrraedd, tacluso popeth ar ôl iddyn nhw adael ac, wrth gwrs, cadw i fyny gyda nhw!

Gweithgareddau beunyddiol
Mae'r dyletswyddau'n amrywio ychydig yn ôl y math o brosiectau, pryd a ble maen nhw'n mynd ymlaen ac oedrannau'r plant sydd yno.  Fel arfer, fodd bynnag, fe fydd gwaith o'r fath yn ymwneud â:

  • siarad â'r plant ynglŷn â sut yr hoffen nhw dreulio eu hamser;
  • llunio rhaglen symbylol o weithgareddau i'r plant;
  • croesawu'r plant a'u rhieni;
  • pennu rheolau sylfaenol a gofalu bod y plant yn gwybod amdanyn nhw;
  • paratoi'r lle cyn bod y plant yn cyrraedd - rhoi deunyddiau megis papur a phaentiau ar gael a gofalu bod cyfarpar chwarae mewn cyflwr da a diogel;
  • dyfeisio syniadau ar gyfer achlysuron megis y Pasg neu Galan Gaeaf - er enghraifft, addurno wyau neu drefnu parti gwisg ffansi;
  • trefnu gweithgareddau celfyddydau/crefftau/adrodd straeon, gêmau timau, cystadlaethau, cerddoriaeth, gweithgareddau awyr agored a gwibdeithiau a chymryd rhan ynddyn nhw;
  • annog y plant i gymryd rhan yn y gweithgareddau;
  • goruchwylio'r chwarae a hwyluso diogelwch a lles y plant;
  • peth glanhau a thacluso ar ôl y gweithgareddau;
  • cyflawni gorchwylion syml cymorth cyntaf lle bo angen;
  • goruchwylio gweithwyr llai profiadol;
  • gorchwylion sylfaenol ynglŷn â gweinyddu a rheoli arian mân.

Medrau a diddordebau
Mae angen y canlynol:

  • hoffi gweithio gyda phlant;
  • llawer o egni a brwdfrydedd;
  • amynedd a natur thringar;
  • medrau trefnu da;
  • llawer o ddychymyg;
  • natur wyliadwrus;
  • medrau cyfathrebu da;
  • gweithio'n dda mewn tîm.

Meini prawf derbyn
Does dim angen cymwysterau academaidd o raid, er y gallai peth profiad perthnasol megis gwaith gwirfoddol gyda phlant neu fagu teulu fod yn fanteisiol neu'n ofynnol.  Mae rhai cyflogwyr yn mynnu cymwysterau gwaith chwarae megis Tystysgrif/Diploma CACHE, Tystysgrif Lefel 2 'Gofal ac Addysg y Blynyddoedd Cynnar' Sefydliad y Ddinas a'r Urddau neu Gymhwyster Galwedigaethol Cenedlaethol (Lefel 2/3) ym maes gwaith chwarae, gofal ac addysg y blynyddoedd cynnar neu addysg a gwaith chwarae.  Mae prentisiaethau ar gael mewn rhai ardaloedd.  Unwaith eich bod mewn swydd, efallai y bydd gofyn ichi astudio ar gyfer Cymhwyster Galwedigaethol Cenedlaethol ym maes gwaith chwarae (lefelau 2 a 3) neu waith chwarae a gofal a datblygu'r blynyddoedd cynnar (lefel 4).   Cymhwyster Galwedigaethol Cenedlaethol (Lefel 3/4) 'Gofal/Addysg y Blynyddoedd Cynnar' fyddai'n briodol i'r rhai sy'n gyfrifol am reoli tîm.

Ymhlith y cymwysterau uwch mae Diploma Addysg Uwch (DipHE) 'Gwaith Chwarae' (cwrs amser llawn dwy flynedd) a BA (Anrh.) 'Astudiaethau Proffesiynol ym maes Gwaith Chwarae'.  Mae bwriad i bennu llwybr ymgymhwyso sy'n cydnabod profiad a dysg, ac mae cymhwyster i weithwyr cynlluniau chwarae yn ystod gwyliau'r ysgol ar y gweill, hefyd.

Gobeithion a chyfleoedd yn y dyfodol
Gall gweithwyr chwarae gael eu dyrchafu'n oruchwylwyr neu'n rheolwyr yn ogystal â symud i rolau megis gweithiwr datblygu chwarae, hyfforddiant chwarae a thriniaeth chwarae.  Fe fyddai profiad o'r fath yn ddefnyddiol i'r rhai a hoffai symud i feysydd tebyg megis addysg y blynyddoedd cynnar, gofal plant, cynorthwywr dysgu a gwaith ieuenctid, fodd bynnag.  Mae modd mynd yn athro trwy radd sylfaen, hefyd.  Ar ben hynny, mae cyfleoedd i weithwyr chwarae mewn mudiadau gwirfoddol ac ysbytai.

Rhagor o wybodaeth a gwasanaethau
SkillsActive: www.skillsactive.com
Cyngor Cymwysterau Gofal ac Addysg Plant: www.cache.org.uk
Chwarae Cymru: www.playwales.org.uk

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Related Links