Gweithiwr addysg yr awyr agored

Cyflwyniad
Nid popeth ym maes addysg sy'n digwydd y tu mewn i'r ysgol.  Mae gwasanaethau cymunedol yn helpu pobl ifanc i feithrin medrau yn yr awyr agored megis dringo.  Nid dim ond medrau corfforol y gall disgyblion eu meithrin chwaith - mae modd magu hyder a dysgu sut mae cynnal perthynas trwy weithio mewn grwpiau.  Mae'r swydd hon yn y rhan fwyaf o awdurdodau lleol.

Amgylchiadau'r gwaith
Mae'r gwaith yn mynd rhagddo y tu allan i adeiladau'r ysgol.  Bydd gweithwyr addysg yr awyr agored yn gweithio mewn canolfan arbennig neu barc, yn aml.  37 awr yw'r wythnos safonol gan gynnwys peth gwaith gyda'r nos, dros y Sul, yn ystod gwyliau'r ysgol ac mewn canolfannau preswyl.  Yn aml, byddwch chi'n gweithio'n rhan-amser neu yn ôl yr angen.  Gallai'r gwaith fod yn ymestynnol (o safbwynt corfforol) a braidd yn swnllyd a bywiog ar adegau.

Gweithgareddau beunyddiol
Diben y swydd yw cynnig gweithgareddau antur megis dringo i bobl ifanc, ysgolion ac asiantaethau eraill megis clybiau ieuenctid a chymuned.  Dyma'r gweithgareddau y gallai canolfan eu cynnig:

  • dringo (waliau yn yr awyr agored);
  • dringo waliau symudol;
  • datblygu timau;
  • cyrsiau rhaffau uchel ac isel;
  • datrys problemau mewn gweithgareddau antur;
  • crwydro ceunentydd;
  • rafftio;
  • ogofa;
  • cymwysterau mordwyo;
  • pontio ysgolion;
  • elfennau awyr agored TGAU;
  • medrau allweddol;
  • beicio mynydd;
  • saethyddiaeth;
  • cystadlaethau pen ffordd;
  • canŵa mewn pwll nofio (o dan do) neu mewn afon;
  • prosiectau arwain chwaraeon (i bobl ifanc ddi-waith).

Dyma'r dyletswyddau penodol:

  • gweithio gyda phobl ifanc, oedolion a grwpiau i'w helpu nhw i ddatblygu'n bersonol ac yn gymdeithasol a chynnig cymorth priodol i'w galluogi nhw i feithrin hunan-barch;
  • cynnal sesiynau gyda'r rhai 'anniddig' - pobl ac arnyn nhw anghenion arbennig megis problemau ymddygiadol, troseddwyr ifanc, pobl ac arnyn nhw anableddau corfforol neu feddyliol a'r rhai sy'n perthyn i dras leiafrifol;
  • gweithio gyda'r cyhoedd gan gynnig cyfleoedd i feithrin medrau newydd a chael achrediad;
  • gofalu bod pob anturiaeth addysgol yn un ddiogel, pwrpasol a chyffrous yn ôl gweithdrefnau Awdurdod Trwyddedu'r Gweithgareddau Antur a'r ganolfan;
  • cyfrannu syniadau i helpu i lunio cyfleoedd addysgol yn yr awyr agored;
  • cydweithio â'r tîm i godi incwm ac arian o ffynonellau allanol i dalu costau cynnal y ganolfan;
  • bod yn gyfrifol am gynnal a chadw offer a chyfleusterau, a'u diogelwch;
  • helpu i farchnata cyfleusterau ymhlith y cyhoedd;
  • cymryd rhan mewn rhaglenni amgylcheddol.

Medrau a diddordebau
Dyma'r rhai hanfodol:

  • hyblygrwydd a pharodrwydd i ymaddasu yn ôl newidiadau;
  • gallu cynnal hyfforddiant yn ôl cynllun datblygu personol;
  • gallu trefnu a chyflawni gwaith yn effeithiol;
  • gallu cyfathrebu'n fedrus;
  • iechyd a chryfder corfforol;
  • ymwybyddiaeth o'r modd mae pobl yn cydweithio mewn grwpiau (ar gyfer gweithgareddau datblygu timau ac ati);
  • deall agweddau pobl ifanc a'r materion sy'n effeithio arnyn nhw;
  • agwedd dringar ond proffesiynol tuag at bobl;
  • gallu amrywio dulliau arwain yn ôl natur y client a'r sefydliad;
  • gallu adnabod cryfderau pobl mewn sefyllfaoedd ffurfiol ac anffurfiol;
  • medrau trefnu a gweinyddu da.

Meini prawf derbyn
Bydd angen cymwysterau o leiaf ddau gorff llywodraethu megis un o dystysgrifau Cyngor Mynydda Prydain, tystysgrif Undeb Canŵa Prydain (lefel 1 neu'n uwch) neu dystysgrif Cangen Cymru Undeb Canŵa Prydain.  Mae'n hanfodol eich bod wedi gweithio gyda phobl ifanc mewn sefyllfaoedd anffurfiol a ffurfiol a gyda grwpiau ac unigolion.  Mae profiad o raglenni gweithgareddau addysg yr awyr agored a thimau amlochrog yn bwysig, hefyd.

Gobeithion a chyfleoedd yn y dyfodol
Mae cyfleoedd i gael dyrchafiad yn amryw agweddau addysg yr awyr agored, boed le ffurfiol neu anffurfiol.  Gallech chi gael eich dyrchafu'n arweinydd tîm, er enghraifft.  Mae amryw swyddi yn y gwasanaethau cymunedol, hefyd.

Rhagor o wybodaeth a gwasanaethau
Cyngor Mynydda Prydain: www.thebmc.co.uk
Canŵa Cymru: www.canoewales.com
Gwirfoddolwyr Gwasanaeth Cymunedol: www.csv.org.uk
Gwybodaeth am waith gwirfoddol: National Council for Voluntary Youth Services
Asiantaeth Genedlaethol yr Ifainc: www.nya.org.uk
Skills Active: www.skillsactive.com

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Related Links