Cyflwyniad
Mae hamdden yn boblogaidd bellach, ac mae'r awdurdodau lleol wedi
ymateb i alw cynyddol pobl am weithgareddau corfforol, cymdeithasol
a diwylliannol. Mae sawl swydd ar gynnig mewn canolfannau
hamdden a chymuned, theatrau, neuaddau cyhoeddus, llyfrgelloedd,
orielau, amgueddfeydd a swyddfeydd hysbysu ymwelwyr. Bydd
dyletswyddau gofalwr adeilad yn amrywio rhwng gwaith derbynfa a
glanhau. Mae'r swydd hon ym mhob awdurdod lleol.
Amgylchiadau'r gwaith
Bydd y rhan fwyaf o'r gwaith o dan do yng nghanolfannau hamdden ac
adloniant y cyngor lleol. Gallai fod dyletswyddau mewn
achlysuron yn yr awyr agored megis gwyliau cerddoriaeth a drama,
weithiau. Bydd angen codi a chario pethau trymion,
hefyd. 37 awr yw'r wythnos safonol. Rhaid gweithio
shifftiau ac oriau anarferol, er y bydd lwfans am hynny.
Gweithgareddau beunyddiol
Mae gan ofalwyr adeiladau amrywiaeth helaeth o ddyletswyddau sy'n
angenrheidiol i gadw canolfannau hamdden ac adloniant y cyngor
lleol mewn cyflwr o'r radd flaenaf. Maen nhw'n gyfrifol am
baratoi mannau ar gyfer achlysuron megis arddangosfeydd celf,
cynadleddau, darlithoedd, ymgynnull cymunedol, cyngherddau ac
ati. Rhaid trefnu dodrefn, gosod llwyfannau, glanhau'r
adeilad, diogelu'r mynedfeydd a gofalu y bydd popeth yn mynd yn
esmwyth er boddhad y cwsmeriaid. Ble bynnag y bydd yr
achlysur, bydd gofalwr adeilad yn gyfrifol am y canlynol:
- trefnu a pharatoi'r cyntedd, yr awditoria a'r ystafelloedd
cyfarfod gan gynnwys trefnu cadeiriau a byrddau ar gyfer
arlwyo;
- glanhau, tacluso, cynnal a chadw, trwsio, seddau, cyfarpar a
chelfi ym mhob man mewnol ac allanol;
- diogelu cyffredinol megis cloi a datgloi adeiladau, casglu
arian mân a mynd ag e i'r banc;
- archwilio tocynnau, dogfennau adnabod ac ati;
- bod ar ddyletswydd wrth ddrws y llwyfan gan gynnwys derbyn pobl
a nwyddau ac ateb y ffôn;
- casglu llythyrau ac offer a'u cludo i adeiladau eraill;
- gosod posteri cyhoeddusrwydd ac arwyddion y tu allan i
adeiladau;
- glanhau'r prif ystafelloedd, y tai bach a'r ystafelloedd
gwisgo;
- cadw golwg ar drefniadau argyfwng ym mhob rhan o'r
adeilad.
Yn ystod oriau agor (yn arbennig yn ystod perfformiadau a phan
fo cyfleusterau wedi'u llogi), gofalwr yr adeilad fydd y brif
ddolen gyswllt â'r cyhoedd ynglŷn â thaclusrwydd, glanweithdra a
mynediad. Mae disgwyl iddo fod yn gwrtais wrth gwrdd â phobl,
gan eu cyfarch yn briodol a diwallu eu hanghenion.
Medrau a diddordebau
Dyma'r rhai hanfodol:
- codi a symud pethau trymion megis dodrefn a chyfarpar y
llwyfan;
- sefyll am oriau yn ystod dyletswyddau diogelu;
- bod o gymorth ac yn gwrtais dros y ffôn ac yn bersonol;
- dringo ysgol a gweithio mewn mannau eithaf uchel;
- gweithio gyda'r hwyr, dros nos, dros y Sul ac yn ystod gwyliau
banc;
- gweithio shifftiau hir o bryd i'w gilydd.
Meini prawf derbyn
Mae llythrennedd sylfaenol a phrofiad o waith porthor a/neu gynnal
a chadw - yn ogystal â gweithio gyda'r cyhoedd - yn hanfodol.
Gobeithion a chyfleoedd yn y dyfodol
Mae angen gofalwyr a phorthwyr bob amser yn yr awdurdodau lleol ac
yn y sector preifat. Bydd dyrchafiad ar gael pan fo swydd yn
wag. Gallai gofalwr adeilad gael ei ddyrchafu'n uwch ofalwr
adeilad, rheolwr adeilad neu swyddog ar ddyletswydd.
Rhagor o wybodaeth a gwasanaethau
Asset Skills: www.assetskills.org
Sefydliad Breiniol Rheoli Chwaraeon a Gweithgareddau Corfforol:
www.cimspa.co.uk
Sefydliad Cynnal, Cadw a Rheoli Adeiladau: www.abe.org.uk
Efallai bod rhagor am hyn ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.
Medrau a diddordebau