Croeso

Cyflwyniad
Y derbynnydd yw'r gweithiwr y bydd y rhan fwyaf o ymwelwyr yn ei weld gyntaf.  Mae derbynyddion yn holl adeiladau'r cyngor ac mae'n bwysig iddyn nhw fod yn gyfeillgar ac yn groesawgar - gall eu hagwedd effeithio ar y modd y bydd ymwelydd yn gweld y cyngor i gyd.

Amgylchiadau'r gwaith
Mae'r rhan fwyaf o dderbynyddion yn gweithio wrth gownter derbynfa yng nghyntedd un o adeiladau'r cyngor.  Gall fod gofyn i rai wisgo dillad unffurf.

37 awr yw'r wythnos safonol fel arfer, er y gallai fod rhaid gweithio shifftiau weithiau - gyda'r nos a thros y Sul.

Gweithgareddau beunyddiol
Gall dyletswyddau amrywio yn ôl yr adeilad neu'r adran.  Efallai y bydd rhaid gweithio fel a ganlyn, fodd bynnag:

• agor a chau'r dderbynfa yn ôl gweithdrefnau diogelwch perthnasol;
• cyfarch ymwelwyr, cofnodi eu henwau a gwirio â phwy maen nhw'n ymweld;
• ffonio'r swyddog hwnnw a rhoi gwybod iddo fod yr ymwelydd wedi cyrraedd (yn achos ymwelydd annisgwyl, dweud yr hoffai rhywun ei weld);
• gofyn i ymwelwyr lofnodi'r gofrestr wrth gyrraedd a gadael;
• rhoi bathodynnau i ymwelwyr i ddibenion diogelwch;
• defnyddio drws diogelwch i ofalu mai dim ond gyda chaniatâd y bydd pobl yn cael mynd i mewn i'r adeilad;
• ateb y ffôn a throsglwyddo galwadau mewnol ac allanol i'r swyddog priodol;
• derbyn negeseuon i weithwyr nad ydyn nhw wrth eu desgiau;
• llofnodi am barseli a phecynnau ar ran y cyngor;
• helpu i ddidoli a dosbarthu'r post;
• gofalu bod y dderbynfa'n lân ac yn daclus;
• cyflawni gorchwylion gweinyddol ac ysgrifenyddol megis teipio llythyrau a diweddaru cofnodion;
• archebu tacsis a negeswyr;
• neilltuo ystafelloedd cyfarfod;
• archebu deunydd ysgrifennu.

Medrau a diddordebau
Mae angen y canlynol:

• agwedd gyfeillgar a chroesawgar;
• gallu cyfathrebu'n dda â phobl o bob lliw a llun;
• gallu trosglwyddo negeseuon mewn modd eglur a chryno;
• gallu osgoi cynhyrfu o dan bwysau - er enghraifft, os yw'r ffôn yn canu yn y dderbynfa pan foch chi'n ymwneud ag ymwelwyr;
• medrau trefnu da a'r gallu i flaenoriaethu gorchwylion;
• gallu ymaddasu a symud o'r naill orchwyl i'r llall yn ôl yr angen;
• natur broffesiynol a'r gallu i ofalu am gwsmeriaid;
• gallu trin a thrafod cyfrifiaduron;
• medru'r Gymraeg.

Meini prawf derbyn
Does dim llwybr penodol i'r gwaith hwn.  Yn aml, bydd profiad o ofalu am gwsmeriaid a rhinweddau personol megis brwdfrydedd a medrau cyfathrebu da yn bwysicach na chymwysterau.  Bydd y rhan fwyaf o gyflogwyr yn mynnu addysg o safon dda, fodd bynnag, megis TGAU neu gymhwyster cyfwerth mewn pynciau megis mathemateg a Saesneg.

Gallai fod modd astudio ar gyfer Cymhwyster Galwedigaethol Cenedlaethol neu fwrw prentisiaeth mewn maes megis gweinyddu busnes neu ofal cwsmeriaid wedyn.

Gobeithion a chyfleoedd yn y dyfodol
Does dim llwybr dyrchafu unffurf yn y swydd hon - mae gwaith derbynnydd yn ffordd dda o feithrin amryw fedrau allai'ch arwain at nifer o feysydd.  Gallech chi benderfynu symud i rôl weinyddol mewn adran benodol neu ddatblygu gyrfa yn y gwasanaethau i gwsmeriaid.

Rhagor o wybodaeth a gwasanaethau
Sefydliad Trwydded Defnyddio Cyfrifiaduron Ewrop: www.ecdl.com
Sefydliad Gofal Cwsmeriaid: www.instituteofcustomerservice.com

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.