Cyflwyniad
Diben clerc yr uned yw cynnig cymorth clercaidd i swyddogion sy'n
gyfrifol am iechyd a diogelwch gweithwyr mewn siopau, ffatrïoedd,
bwytai, warysau, tafarnau, clybiau chwaraeon a stadia. Trwy
dynnu sylw at bethau allai fod yn beryglus a gweithredu cyn y
gallai damweiniau ddigwydd, mae swyddogion a staff iechyd
amgylcheddol yn hwyluso lles gweithwyr. Mae clercod yn rhan
bwysig o'r uned sy'n bwriadu datrys pob problem, nid achosi
problemau. Nod yr uned yw gwrando ar bobl fel y gall eu
hysgogi a'u harwain tuag at wella'r amgylchedd.
Amgylchiadau'r gwaith
Gan y byddwch chi'n gweithio mewn swyddfa, rhaid eistedd wrth
gyfrifiadur am oriau mewn man allai fod yn wyntog, yn llaith neu'n
swnllyd, heb ei awyru'n dda. Fe fydd rhaid codi a chario
ffeiliau, ymestyn a phlygu. Trwy weithio yn yr uned dros
faterion iechyd a diogelwch, fodd bynnag, gallwch chi ddisgwyl y
bydd problemau o'r fath yn cael pob ystyriaeth briodol. Rhaid
gwisgo'n daclus a gweithio 37 awr yr wythnos, er na fydd shifftiau
nac oriau anghymdeithasol.
Gweithgareddau beunyddiol
Y prif orchwylion yw trin a thrafod ymholiadau a chwynion y bydd
pobl yn eu cyflwyno naill ai trwy ymweld â'r uned, ffonio, anfon
llythyr neu roi adroddiad. Rhaid i'r clerc gadw a diweddaru
gwybodaeth, paratoi ystadegau, ffeilio (gan gynnwys ffeil
ariannol), archebu deunyddiau a defnyddio offer. Byddwch
chi'n treulio llawer o amser yn teipio, hefyd. Cyfrifiadur,
ffôn a pheiriannau argraffu, llungopïo a lamineiddio yw prif offer
y clerc, a bydd rhaid gweithio yn ôl amserlenni gweithwyr eraill
gan amlaf. Fe fyddwch chi'n ymwneud â'r cyhoedd a swyddogion
adrannau eraill bob dydd a gallai fod angen cymryd rhan mewn
prosiectau arbennig megis ymgyrchoedd er gweithleoedd iach neu
seminarau a chyrsiau o bryd i'w gilydd.
Medrau a diddordebau
Dyma'r rhai hanfodol:
- medrau ymarferol;
- medrau teipio;
- gallu trin a thrafod symiau a manylion;
- hyder;
- agwedd dringar;
- gallu cyd-dynnu â phobl o sawl cefndir;
- medrau trefnu da.
Byddai synnwyr digrifwch o gymorth hefyd, a dylech chi fod yn
weddol heini. Gan fod cynghorau lleol wastad yn cyflwyno
syniadau, mentrau a chynlluniau gweithredu, fe fydd yn bwysig ichi
allu ymaddasu yn ôl newidiadau a wynebu her.
Meini prawf derbyn
Dylech chi allu teipio'n gyflym, trin a thrafod bysellfwrdd a
defnyddio amryw raglenni cyfrifiadurol megis Microsoft
Windows. Mae hyfforddiant ar gael yn y gwaith. Gallai
profiad o ofalu am gwsmeriaid fod yn ddefnyddiol neu, weithiau, yn
hanfodol.
Gobeithion a chyfleoedd yn y dyfodol
Mae gobaith rhesymol y byddwch chi'n cael eich dyrchafu'n uwch
weinyddwr maes o law ar yr amod eich bod wedi gwella'ch cymwyseddau
technegol ac ysgwyddo rhagor o gyfrifoldebau. Mae cyfleoedd y
tu allan i'r awdurdodau lleol - Awdurdod Gweithredol Iechyd a
Diogelwch, er enghraifft - yn ogystal â chyfleoedd i symud i
feysydd cyffelyb (megis iechyd yr amgylchedd) ac adrannau
eraill.
Rhagor o wybodaeth a gwasanaethau
Asiantaeth Ewrop dros Iechyd a Diogelwch yn y Gwaith:
https://osha.europa.eu/en/campaigns/index_html
Sefydliad Diogelwch ac Iechyd Galwedigaethol: www.iosh.co.uk
Bwrdd Arholi Gwladol Diogelwch ac Iechyd Galwedigaethol:
www.nebosh.org.uk
Efallai bod rhagor am hyn ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.