Croeso

Cyflwyniad
Mae'r swydd bwysig hon yn rhan o'r gwasanaeth cynghori athrawon sydd â'r nod o wella perfformiad ysgolion drwy godi safonau ac effeithiolrwydd.  Drwy reoli gwaith y cynghorwyr, mae'r cynghorydd datblygiad yn sicrhau cynllunio gweithredol a darpariaeth cwricwlwm o ansawdd uchel.  Yn gryno, maent yn helpu i adeiladu system gydlynol o ddatblygiad proffesiynol parhaus (DPP).

Mae cynghorwyr yn atebol i'r Swyddog Gweithredol, Datblygiad Proffesiynol, ac yn gweithio ym mhob math o awdurdod, ac eithrio cynghorau dosbarth.

Amgylchedd Gwaith
Fel arfer mae cynghorwyr yn gweithio o ganolfannau datblygu proffesiynol ond, yn anochel, yn treulio llawer o amser yn teithio i ysgolion a chanolfannau hyfforddi yn yr ardal leol.  Byddant yn treulio 50% o'u hamser mewn ysgolion yn cyflwyno rhaglenni hyfforddi neu'n cyflawni gweithgareddau ymgynghorol.  Maent hefyd yn mynychu cynadleddau cenedlaethol a briffiau llywodraethol.

Gweithgareddau Dyddiol
Mae'r prif gyfrifoldebau a dyletswyddau fel a ganlyn:

• rheoli a chefnogi timau cynghori athrawon o ddydd i ddydd
• cydlynu a darparu rhaglenni sefydlu a DPP i gynghorwyr
• gweithio gyda chydweithwyr i ddylunio deunyddiau mewn perthynas ag arferion a meysydd gwaith perthnasol
• cydlynu ymchwil a blaenoriaethau datblygu'r timau cynghori, gan sicrhau bod y deunyddiau a gynhyrchir yn arwain at arferion da
• goruchwylio'r swyddog cyswllt (ymgynghorydd datblygu staff) ar y cyd â'r swyddog proffesiynol, gan gynnwys dyrannu cydweithwyr i ysgolion a sicrhau y darperir gwasanaethau
• llunio rhaglenni hyfforddi ar y cyd â'r swyddog proffesiynol ac arweinwyr tîm yn unol ag anghenion cydnabyddedig, ynghyd â defnyddio arbenigedd asiantaethau allanol
• cyfathrebu â swyddogion timau safonau mewn ysgolion sy'n peri pryder
• cynnal cysylltiadau rhwng yr awdurdod lleol ac asiantaethau i sicrhau rhaglenni cydlynol mewn perthynas â gwaith cynradd ac uwchradd â ffocws arbennig
• rheoli gweithdrefnau sicrhau ansawdd o fewn thimau cynghori athrawon.

Sgiliau a Diddordebau
Mae'n hanfodol eich bod chi'n:

• gallu rheoli tîm
• dangos ymrwymiad personol i gyfle cyfartal
• meddu ar ddealltwriaeth eang o faterion cyfredol sy'n wynebu awdurdodau lleol, cymunedau lleol a'r gwasanaethau addysg
• gallu cyfathrebu'n effeithiol
• meddu ar ymagwedd greadigol ac effeithiol at ddatrys problemau
• meddu ar brofiad o baratoi a chyflwyno adroddiadau
• gallu sicrhau bod systemau ar waith i gofnodi gwaith tîm ac adrodd arno
• ymwybodol o faterion sy'n ymwneud ag effeithiolrwydd ysgol 
• ymwybodol o sut i ddatblygu a chynnal gwasanaeth cymorth cwricwlwm a datblygiad proffesiynol a ddirprwywyd i ysgolion.

Gofynion Mynediad
Dylech gael:

• cymhwyster addysgu a chymhwyster proffesiynol terfynol 
• profiad addysgu sylweddol ar lefel uwch mewn ysgolion
• cymhwyster ôl-raddedig a/neu brofiad uniongyrchol sylweddol mewn addysg ymarferol  
• tystiolaeth o ddatblygiad proffesiynol parhaus
• dealltwriaeth o raglenni gwella ysgolion, gan gynnwys gwybodaeth am fecanweithiau pennu targedau
• profiad rheoli sylweddol mewn ysgol, coleg a/neu adran addysg AALl
• profiad sylweddol o annog newid drwy ddatblygu, gweithredu a gwerthuso mentrau pwysig.

Cyfleoedd yn y dyfodol
Ceir cyfle i weithio ar sawl lefel weithredol yn y gwasanaeth addysg, yn y maes cynghori a rheoli.  Y brif swydd yw'r Cyfarwyddwr Addysg.
Ceir hefyd gyfleoedd mewn prifysgolion a cholegau addysg, ac yn y sector preifat.

Rhagor o Wybodaeth a Gwasanaethau
Yr Adran Addysg a Sgiliau www.dfes.gov.uk
Swyddi addysg www.eteach.com
Cyngor Addysgu Cyffredinol Cymru www.gtcw.org.uk
Graduate Teacher Training Registry www.gttr.ac.uk
Hyfforddiant Athrawon ac Addysg yng Nghymru www.teachertrainingcymru.org

Mae modd cael rhagor o wybodaeth am y maes hwn trwy wefan Gyrfaoedd Cymru (www.careerswales.com/) y llyfrgell leol, swyddfa gyrfaoedd eich bro neu lyfrgell eich ysgol.