Cyflwyniad
Gwaith cyfrifydd yw gofalu bod y cyngor yn rheoli arian yn dda ac
yn defnyddio arian y trethdalwyr yn y modd gorau. Mae tua
18,000 o gyfrifyddion ym myd llywodraeth leol y Deyrnas
Gyfunol. Maen nhw'n gweithio mewn awdurdodau o bob
math. Mae nifer sylweddol o brif weithredwyr yn gyfrifyddion
cymwysedig.
Amgylchiadau'r gwaith
Mae'r rhan fwyaf o'r gwaith yn mynd rhagddo yn y swyddfa, er y
gallai fod angen teithio i gyfarfodydd weithiau.
Gweithgareddau beunyddiol
Mae rheolaeth ariannol gadarn yn hanfodol i reoli gwasanaethau
awdurdod lleol yn dda. Felly, dylai cyfrifydd gadw llygad
barcud ar y modd mae arian y trethdalwyr yn cael ei
ddefnyddio. Mae'r cyfrifoldeb hwn yn cwmpasu sawl gorchwyl
megis pennu cyllidebau adrannol a llunio argymhellion am brosiectau
mawr (er enghraifft, adeiladu ffyrdd). Mae cyfrifyddion yn
gyfrifol am reoli adnoddau'n effeithiol a gofalu bod pob perygl
ariannol yn cael ei adnabod a'i leddfu, hefyd.
- Asesu a chynghori ynglŷn ag amcangyfrifon am ariannu prosiectau
a chostau cynnal parhaus.
- Rheoli cyllidebau cyfalaf a chyllid pob adran.
- Paratoi cyfrifon blynyddol i'w rhoi gerbron archwilydd.
- Archwilio mewnol megis adolygu cyflogau neu wirio bod awdurdod
lleol yn neilltuo arian yn briodol.
- Gweithredu'n ddolen gyswllt rhwng yr adran ariannol a
gwasanaethau eraill.
Medrau a diddordebau
Mae rhifedd a medrau cyfathrebu ardderchog yn hanfodol, yn ogystal
â'r gallu i drin a thrafod gwybodaeth a data. Gan fod angen
cydweithio ag amrywiaeth eang o bobl megis proffesiynolion eraill,
cynghorwyr a gweithwyr cynorthwyol, dylai cyfrifyddion allu trin a
thrafod pobl, hefyd. Ar ben hynny, mae angen meddwl
creadigol, craff a chwilfrydig. Mae'r gallu i gynnig cyngor
gwrthrychol wrth drin a thrafod gwybodaeth gyfrinachol yn
bwysig.
Meini prawf derbyn
Ar ôl ennill dwy dystysgrif Safon Uwch a phum TGAU (A-C), gan
gynnwys Saesneg a mathemateg, mae tair prif ffordd o ymgymhwyso'n
gyfrifydd:
- Dilyn cwrs sylfaenol cyn astudio ar gyfer arholiad y Sefydliad
Breiniol dros Gyfrifeg a Chyllid Cyhoeddus (CIPFA).
- Ennill gradd berthnasol a sefyll arholiad Cymdeithas y
Technegwyr Cyfrifeg (does dim rhaid i aelodau o'r gymdeithas wneud
cwrs sylfaenol CIPFA).
- Ennill gradd mewn pwnc nad yw'n ymwneud â'r maes hwn a gorffen
rhannau o gwrs sylfaenol CIPFA cyn astudio ar gyfer yr arholiadau
proffesiynol.
Does dim cymwysterau academaidd penodol i ymgeiswyr dros 21
oed. Mae cynllun hyfforddi Cymdeithas y Technegwyr Cyfrifeg
yn agored i bawb (dwy flynedd amser llawn a thair blynedd
rhan-amser). Mae cymwysterau galwedigaethol cenedlaethol ar
lefelau 2, 3 a 4. Mae'r rhan fwyaf o gyfrifyddion yn astudio
ar gyfer arholiadau'r Sefydliad Breiniol dros Gyfrifeg a Chyllid
Cyhoeddus (CIPFA) neu Gymdeithas Freiniol y Cyfrifyddion
Ardystiedig (ACCA).
Gobeithion a chyfleoedd yn y dyfodol
Mae'r cynghorau'n cyflogi llawer o gyfrifyddion a thechnegwyr
cyfrifeg. Mae'n bosibl cael eich dyrchafu fel a ganlyn: uwch
gyfrifydd; prif gyfrifydd; dirprwy gyfarwyddwr ariannol;
cyfarwyddwr ariannol. Mae llawer yn cyrraedd lefel prif
weithredwr. Bydd y rhan fwyaf o gyfrifyddion yn symud i
gynghorau eraill i gael dyrchafiad yn ystod eu gyrfaoedd, ond gan
fod cyfrifyddion yn gweithio mewn cynghorau o bob math, mae'n
bosibl na fydd angen symud allan o'ch rhanbarth chi.
Rhagor o wybodaeth a gwasanaethau
Cymdeithas Technegwyr Cyfrifeg: www.aat.co.uk
Sefydliad Breiniol Cyfrifyddion Rheoli: www.cimaglobal.com
Sefydliad Cyfrifyddion Breiniol Cymru a Lloegr: www.icaew.com
Cymdeithas Cyfrifyddion Breiniol Ardystiedig: www.acca.co.uk
Sefydliad Breiniol Cyfrifeg a Chyllid Cyhoeddus: www.cipfa.org.uk
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/