Cyflwyniad
Mae mwy a mwy o gydnabyddiaeth bod arnon ni gyfrifoldeb am bobl
sydd heb allu ymdopi â bywyd arferol o achos nam ar y corff neu'r
synhwyrau. Derbynnir bod gan bawb hawl i fyw'n fodlon yn y
gymuned beth bynnag fo'i anfantais. Mae hynny'n berthnasol i
hen bobl, pobl anabl, y rhai sy'n ei chael yn anodd symud, y rhai
ac arnyn nhw anableddau dysgu a'r rhai sy'n dioddef trwy nam ar y
clyw neu'r golwg.
At hynny mae gan bobl eraill megis ffoaduriaid a'r rhai sy'n
gofyn am loches hawl i fynnu i'r gwasanaethau cymdeithasol eu helpu
i ymaddasu i fywyd ym Mhrydain. Mae uwch reolwyr a chydlynwyr
yn gyfrifol am weinyddu trefniadau cymorth sy'n diwallu anghenion
pob math o bobl sydd o dan anfantais.
Amgylchiadau'r gwaith
Byddwch chi'n gweithio mewn swyddfa gan amlaf er bod angen teithio
i gyfarfodydd a chynadleddau lleol, rhanbarthol a gwladol
weithiau. 37 awr yw'r wythnos safonol gan gynnwys oriau
anghymdeithasol. Rhaid treulio tipyn o amser wrth
gyfrifiadur.
Gweithgareddau beunyddiol
Diben y swydd yw gofalu bod gofal cymdeithasol priodol ac amserol
ar gael i bawb a chanddo nam ar y corff neu'r synhwyrau. Rôl
rheolwr y gwasanaeth yw gofalu bod hynny'n digwydd ar y cyd â
gweithwyr cymdeithasol, proffesiynolion iechyd, rheolwyr
gwasanaethau eraill a mudiadau megis Age Concern a Chyngor y
Ffoaduriaid. Bydd cydlynydd anableddau'n gwneud y canlynol
bob dydd:
- goruchwylio rheolwyr timau'r gwasanaeth;
- pennu trywydd strategol y gwasanaeth a llunio polisïau;
- gofalu bod trefn asesu a rheoli gofal;
- paratoi a monitro cyllidebau;
- ysgrifennu adroddiadau;
- paratoi cytundebau;
- llywio cyfarfodydd;
- monitro cynnydd y gwasanaeth.
Wrth ddatblygu'r gwasanaeth, bydd y rheolwr yn ysgwyddo
cyfrifoldeb am faterion o bwys megis:
- cynlluniau iechyd a lles i ffoaduriaid (tai a budd-daliadau, er
enghraifft);
- prosiectau hyfforddi a chyflogi pobl anabl.
Bydd cydlynydd yn gweithio trwy gyfrwng timau rheoli anableddau
a gwasanaethau ac o'i ben ei bastwn ei hun. Mae'n waith
ymestynnol sy'n rhoi tipyn o foddhad serch hynny.
Medrau a diddordebau
Mae angen y canlynol:
- agwedd dringar;
- gallu rheoli prosiectau;
- gallu trin a thrafod ffigurau;
- hyder;
- gallu cyd-dynnu â phobl o sawl cefndir;
- medrau cyfathrebu da - ar lafar ac ar bapur fel ei gilydd;
- gallu dadansoddi deunydd cymhleth.
Meini prawf derbyn
Mae cymhwyster ym maes gwaith cymdeithasol megis diploma neu radd
yn hanfodol. Bydd angen rhai blynyddoedd o brofiad yn
weithiwr cymdeithasol ac yn rheolwr tîm, hefyd. Bydd
hyfforddiant yn y gwaith yn rhan o'r datblygu proffesiynol
parhaus.
Gobeithion a chyfleoedd yn y dyfodol
Dyma faes eithaf cyfyng heb lawer o lwybrau dyrchafu. Ar ôl
rhagor o hyfforddiant a chymwysterau, fodd bynnag, mae modd cael
dyrchafiad yn bennaeth gwasanaethau i oedolion, cyfarwyddwr
cynorthwyol gwasanaethau cymdeithasol a chyfarwyddwr. At
hynny, mae cyfleoedd i weithio mewn prosiectau arbenigol fyddai'n
arwain at y math o brofiad sy'n angenrheidiol ar gyfer
dyrchafu. Y tu allan i faes llywodraeth leol, mae cyfleoedd
yn y sector gwirfoddol.
Rhagor o wybodaeth a gwasanaethau
Age Cymru: www.ageuk.org.uk/cymru
Cyngor Gofal Cymru: www.ccwales.org.uk
Gofal Cymunedol: www.communitycare.co.uk
Gwirfoddolwyr Gwasanaeth Cymunedol:
www.csv.org.uk/socialhealthcare
Adran Iechyd San Steffan: www.dh.gov.uk
Hawliau Pobl Anabl y Deyrnas Gyfunol:
http://disabilityrightsuk.org/
Cyngor Galwedigaethau Iechyd a Gofal: www.hpc-uk.org
Asiantaeth Cartrefi a Chymunedau:
www.homesandcommunities.co.uk
Medrau er Gofal: www.skillsforcare.org.uk
Cymdeithas Gofal Cymdeithasol:
www.socialcareassociation.co.uk
Cyngor Pobl Anabl y Deyrnas Gyfunol: www.ukdpc.net/site
Cyngor Ffoaduriaid Cymru: http://welshrefugeecouncil.org.uk
Mae rhagor o wybodaeth gan Gyrfaoedd Cymru
(www.careerswales.com/), y llyfrgell leol a swyddfa/llyfrgell
materion gyrfaoedd eich ysgol.