Cyflwyniad
Dyma'r math o swydd lle mae arddangos yn bwysig yn ogystal â rhoi
cyfarwyddyd. Nid oes yn rhaid i chi fod yn ddawnsiwr
proffesiynol i addysgu dawns, ond disgwylir i chi fod wedi cael
hyfforddiant yn y maes hwn ac fod wedi cyrraedd lefel
uchel. Mae'r swydd yn bodoli mewn rhai awdurdodau
lleol, ysgolion, colegau a chanolfannau hamdden. Ceir
cyfleoedd hefyd mewn ysgolion dawns preifat ac ar gyfer gwaith
llawrydd.
Amgylchedd Gwaith
Fel arfer byddwch yn gweithio mewn campfa, neuadd neu stiwdio
ddawns lle bydd angen i chi daflu eich llais: gall dosbarthiadau
fod yn swnllyd a gall y cyfleusterau fod yn sylfaenol. Rhaid
gwisgo'n briodol, sef yn y rhan fwyaf o achosion, esgidiau ymarfer
a thracwisg/crys chwaraeon/siorts. Bydd rhaid gwneud
gwaith desg hefyd, ac addysgu theori yn yr ystafell
ddosbarth. Gall yr oriau amrywio o sesiwn 1.5 awr yr wythnos
i waith llawn amser, a bydd yn aml yn cynnwys gwaith ar y
penwythnos a chyda'r nos - yn enwedig yn y cyfnod cyn
perfformiad.
Gweithgareddau Dyddiol
Fel arfer mae gan athrawon dawns ymrwymiadau a chyfrifoldebau
eraill. Gall y rheini sy'n gweithio mewn ysgol addysgu pwnc arall
a/neu ddal rôl reoli neu weithio fel athrawon ymarfer corff.
Mae athrawon dawns yn gweithio gydag unigolion a grwpiau. Maent
yn dechrau paratoi ar gyfer dosbarthiadau drwy gynllunio gwersi ac
ystyried y maes llafur sydd i'w ddilyn. Gellir gwneud hyn
gartref neu yn ystod cyfnodau rhydd.
Eu nod yw annog dysgwyr i ddatblygu eu cryfder, stamina a
sgiliau dawns corfforol, a rhaid iddynt allu arddangos technegau
penodol - p'un a yw'r ffocws ar jazz, dawnsfeydd neu fale.
Mewn llawer o achosion byddant yn addysgu amrywiaeth eang o
arddulliau dawns gwahanol. Byddai dysgwyr yn cynhesu i
fyny ar ddechrau pob dosbarth ac yn cyflawni ymarfer ymlacio ar y
diwedd. Drwy hyn, byddant yn dysgu sut i osgoi anafiadau neu
straen.
Bydd yn rhaid gwneud gwaith papur, gan gynnwys: asesiadau
cychwynnol; cofnodi presenoldeb; cynllunio gwersi; cynlluniau dysgu
unigol; cadw cofnodion a marcio gwaith ysgrifenedig.
Sgiliau a Diddordebau
Mae gallu ymarferol, profiad a hyfforddiant i lefel uchel ym maes
dawns a cherddoriaeth yn hanfodol, yn ogystal â diddordeb mewn
addysgu. Mae hyn yn gofyn am:
- amynedd a sgiliau cyfathrebu da
- brwdfrydedd a gwybodaeth am y pwnc
- y gallu i gefnogi ac annog eraill i lwyddo
- y gallu i weithio gyda phobl o alluoedd
gwahanol
- sgiliau arsylwi a manwl gywirdeb
- hyder
- sgiliau rheoli dosbarth effeithiol, gan gynnwys gweithio gyda
dysgwyr heriol
Gofynion Ymgeisio
Rhaid i chi feddu ar statws athro cymwys (SAC). I gael mynediad i
gwrs gradd â SAC byddai ymgeiswyr fel arfer yn meddu ar 5 gradd
TGAU (A-C) gydag o leiaf 2 radd Safon Uwch/4 gradd H. Gellid derbyn
Lefel 2 GNVQ/SVQ uwch ar gyfer gradd â SAC, ond efallai y byddai
pynciau ychwanegol yn ofynnol, megis Safon Uwch mewn pwnc o'r
Cwricwlwm Cenedlaethol. Mae angen gradd TGAU/S gradd C (3)
mewn Saesneg a Mathemateg hefyd. Gall oedolion sydd â
phrofiad a gallu perthnasol wneud cais. Nid oes uchafswm
oedran, ond mae angen i ymgeiswyr allu ymdopi â gofynion corfforol
y swydd.
Hyfforddiant
Mae dosbarthiadau rhan amser ar gael mewn ysgolion dawns preifat
lle mae'n bosibl sefyll arholiadau sylfaenol mewn dawns cyn ennill
cymhwyster athro dawns.
Os nad yw gradd yn cynnwys SAC (sy'n angenrheidiol ar gyfer
ysgolion y wladwriaeth), mae'n bosibl gwneud cais am dystysgrif
ôl-radd mewn addysg (TAR) a fydd yn cynnwys SAC.
Cyfleoedd yn y dyfodol
Ceir cyfleoedd am gyflogaeth mewn ysgolion a cholegau ym mhob rhan
o'r wlad, ynghyd ag ysgolion annibynnol, stiwdios a chanolfannau
hamdden. Mae hunangyflogaeth yn opsiwn. Mae rhai athrawon yn
penderfynu dilyn maes addysgu arbenigol fel coreograffi neu therapi
dawns. I wneud hyn, bydd angen astudio ymhellach. Nid oes
llawer o gyflogaeth mewn meysydd arbenigol. Dyma rai o'r
dewisiadau y gallwch eu gwneud i ddatblygu eich gyrfa.
Rhagor o Wybodaeth a Gwasanaethau
Asiantaeth Hyfforddi Athrawon www.teach.gov.uk
Cyngor Addysgu Cyffredinol Cymru www.gtcw.org.uk
Cyngor Dawns Prydain www.british-dance-council.org
Swyddi addysg www.eteach.com
Y Cyngor Addysg a Hyfforddiant Dawns www.cdet.org.uk
Mae modd cael rhagor o wybodaeth am y maes hwn trwy wefan
Gyrfaoedd Cymru (www.careerswales.com/) y
llyfrgell leol, swyddfa gyrfaoedd eich bro neu lyfrgell eich
ysgol.