Croeso

Cyflwyniad
Gall fod yn anodd mynd i mewn i adeiladau/cerbydau a dringo grisiau, hyd yn oed i bobl heini.  Os oes unrhyw anableddau arnoch chi, gall fod yn hunllef.  Mae gan awdurdodau o bob math (ar wahân i'r cynghorau sirol) swyddogion mynediad/trefn mynediad/materion anableddau bellach i ysgwyddo cyfrifoldeb am ofalu bod adeiladwyr a phenseiri'n cadw at safonau mynediad ym mhob un o adeiladau a ffyrdd y cyngor fel y gall pawb fynd a dod yn hawdd.  Nid dim ond pobl anabl sy'n elwa ar hynny.  Gall palmantau anwastad, ymylon dwfn a lleoedd parcio clôs fod yn beryglus i bawb - hen bobl, pobl afiach, y rhai nad ydyn nhw'n edrych ble maen nhw'n troedio ac ati.  Gan fod y swydd yn ymwneud â chynghorion adeiladu, gallai fod yn adran y gwasanaethau eiddo neu - mewn rhai achosion - yn adran y gwasanaethau cymdeithasol.

Amgylchiadau'r gwaith
Byddwch chi'n gweithio yn y swyddfa a'r tu allan fel ei gilydd.  Rhaid mynd i gyfarfodydd ac ymweld â safleoedd ar gyfer - er enghraifft - gwirio manylion ceisiadau am ganiatâd cynllunio a goruchwylio gwaith tirlunio ac adeiladu fyrdd, yn ogystal â theithio i adrannau eraill o'r cyngor ac asiantaethau allanol.  Gallai fod gofyn ichi weithio o bryd i'w gilydd ar safle unrhyw wasanaeth.  Efallai y bydd angen gwisgo dillad diogelu weithiau a gallai sŵn, mannau brwnt a thywydd gwael fod yn ystyriaethau, hefyd.  36 awr yw'r wythnos safonol er bod angen gweithio shifftiau anghymdeithasol ar adegau i gwrdd â grwpiau cymunedol a mudiadau gwirfoddol.  Mae rhai awdurdodau yn cynnig trefniadau amser hyblyg.

Gweithgareddau beunyddiol
Mae trefnu rhaglenni gwella mynediad i adeiladau'r cyngor yn ôl canllawiau mewnol a Deddf 'Gwahaniaethu ar sail Anabledd' yn amcan hirdymor lle mae angen cydweithio â chynghorwyr, rheolwyr, swyddogion eraill, mudiadau gwirfoddol (grwpiau cynhalwyr, Swyddfa 'Cyngor ar Bopeth', Age Concern, Access Alliance ac ati) a'r cyhoedd.  At hynny, rhaid cwrdd â phenseiri, syrfewyr, adeiladwyr, dylunwyr, contractwyr, staff gwasanaethau adeiladu a swyddogion iechyd a diogelwch i'w cynghori a thrafod telerau.  Mae swyddog mynediad yn hanfodol ynglŷn â llunio a hybu polisi mynediad y cyngor gan gynnwys rhoi hyfforddiant i'r staff, llunio canllawiau a phennu safonau.  Dyma'r prif ddyletswyddau:

• cadw cronfa ddata am ddylunwyr, adrannau ac archwiliadau gwladol;
• cynnal arolygon, astudio dichonoldeb, paratoi cynlluniau, pennu gofynion, llunio cytundebau a goruchwylio modd eu defnyddio;
• cael dyfynbrisiau ar gyfer cytundebau sydd ar gynnig;
• llunio rhaglenni addasu, gan gynnwys pennu cyllidebau, a monitro'r cynnydd;
• cyflwyno adroddiadau i reolwyr a chynghorwyr;
• ymateb i geisiadau, sylwadau a chwynion gan bawb sy'n ymwneud â mynediad i bobl anabl;
• ysgwyddo cyfrifoldeb am gynghori pobl ar faterion technegol a chyfreithiol;
• llunio a diweddaru canllawiau mynediad trwy raglenni cyhoeddi cyfrifiadurol;
• hybu polisïau mynediad y cyngor trwy daflenni, erthyglau, cyfarfodydd, lluniau, y we, y fewnrwyd a sesiynau hyfforddi;
• sefydlu trefniadau i ofalu bod pawb yn gweithio yn ôl yr arferion gorau yn unol ag anghenion defnyddwyr a mudiadau gwirfoddol lleol a chenedlaethol;
• monitro ceisiadau am ganiatâd cynllunio a chynghori swyddogion rheoli adeiladu ar ofynion y gyfraith ynglŷn â mynediad;
• rhoi cynghorion ar fynediad ynglŷn â chludiant, pafinau, ymylon y ffyrdd (lle maen nhw wedi'u niweidio), croesfannau, cynlluniau priffyrdd, arafu trafnidiaeth, parcio a dodrefn y strydoedd;
• defnyddio grantiau mynediad er lles grwpiau cymunedol ac ymgeiswyr caniatâd cynllunio.

Medrau a diddordebau
Dyma'r rhai hanfodol:

• medrau cyfathrebu da;
• gallu trin a thrafod cyfrifiaduron (gan gynnwys rhaglenni dylunio);
• gallu cydweithio a negodi ar amryw lefelau yn y cyngor;
• gallu gweithio o'ch pen a'ch pastwn eich hun ac yn rhan o dîm;
• gallu deall anghenion amryfal pobl sy'n profi anawsterau mynediad o achos anabledd neu resymau eraill, a chydymdeimlo â nhw;
• gallu cadw cofnodion eglur a diweddaru cronfeydd data;
• gwybod Deddf 'Gwahaniaethu ar sail Anabledd' yn dda;
• gwybod sut mae grwpiau mynediad a mudiadau gwirfoddol eraill yn gweithio.

Bydd profiad o drefnu seminarau a hyfforddiant a llunio deunydd cyhoeddusrwydd o fantais, hefyd.

Meini prawf derbyn
Bydd angen gradd neu gymhwyster cyfwerth ynglŷn â phensaernïaeth, tirfesur neu faes cysylltiedig, fel arfer.  Byddai hyfforddiant am faterion mynediad o gryn fantais, ac mae'r profiad canlynol yn hanfodol:

• o leiaf tair blynedd ym maes pensaernïaeth, tirfesur neu waith adeiladu arall;
• dylunio safleoedd hygyrch;
• cynnal arolygon o fynediad;
• rheoli prosiectau a'u cwblhau yn ôl eu cyllidebau a'u hamserlenni;
• paratoi cynlluniau pensaernïol a phennu gofynion;
• goruchwylio gwaith ar safleoedd adeiladu.

At hynny, gallai profiad personol o anawsterau mynediad o achos anabledd neu resymau eraill, yn ogystal â phrofiad o reoli cyllidebau, fod o fantais.

Gobeithion a chyfleoedd yn y dyfodol
Gan fod y gymdeithas yn rhoi mwy a mwy o sylw i gyfleoedd cyfartal a hawliau mynediad, dyma faes sydd ar gynnydd.  Mae sawl awdurdod lleol wedi arwain materion mynediad i bobl anabl ac mae hynny wedi'i adlewyrchu yn y gwelliannau mewn cyfleusterau preifat - swyddfeydd, dociau, meysydd awyr, canolfannau hamdden, atyniadau gwyliau ac ati.  Gan fod y wladwriaeth ac Undeb Ewrop yn cyflwyno mwy a mwy o ddeddfau yn y maes hwn, mae'n debygol y bydd llawer mwy o gyfleoedd i ddatblygu gyrfa ynddo.  Mae digon o gyfleoedd yn nhimau eraill y gwasanaethau adeiladu ac eiddo, hefyd.
 
Rhagor o wybodaeth a gwasanaethau
Sefydliad Breiniol y Technegwyr Pensaernïol: www.ciat.org.uk
Medrau Adeiladu: www.citb.co.uk
Sefydliad Diogelwch ac Iechyd Galwedigaethol: www.iosh.co.uk
Cymdeithas Mynediad: www.accessassociation.co.uk
Sefydliad Breiniol Adeiladu: www.ciob.org.uk
Sefydliad Brenhinol y Syrfewyr Breiniol: www.rics.org

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.