Cyflwyniad
Mae diogelwch yn fwyfwy pwysig yn yr oes ansicr hon - i feysydd
awyr, gwestyau mawr, llysgenadaethau, banciau a chynghorau
lleol! Mae'r cynghorau'n berchen ar lawer o dir ac adeiladau
ac mae swyddogion diogelwch yn gyfrifol am y safleoedd hynny a
diogelwch y bobl sy'n gweithio yno. Mae swyddogion diogelwch
mewn awdurdodau o bob math, er y gallai rhai berthyn i gwmnïau
preifat.
Amgylchiadau'r gwaith
Mae eisiau cadw golwg ar amryw safleoedd drwy gydol y dydd a'r nos
gan gynnwys canolfannau dinesig, amgueddfeydd, canolfannau hamdden,
meysydd chwaraeon, mynwentydd, swyddfeydd hysbysu ymwelwyr - yn
wir, pob adeilad a darn o dir sy'n eiddo i'r cyngor a lle gallai
fod perygl. Gall y gwaith fod yn ddiflas pan nad yw dim byd
yn digwydd ac yn gyffrous pan ddaw rhywbeth i'r amlwg. Mae disgwyl
gweithio mewn gwisg unffurf ac mae dillad diogelu ar gael yn ôl yr
angen. Gallai fod eisiau mynd i safleoedd pan nad ydych chi
ar ddyletswydd - er enghraifft, lle mae larwm wedi canu neu lle mae
rhywbeth wedi digwydd ar un o safleoedd y cyngor.
Gweithgareddau beunyddiol
Gall fod angen diogelu safle yn gyffredinol gan wirio adeiladau,
monitro ymwelwyr, defnyddio offer megis camerâu a larymau, cyflawni
gorchwylion cynnal a chadw a symud offer a chelfi. Mewn sawl
ffordd, gall swyddog diogelwch weithredu'n warden neu'n gludwr mewn
sefyllfa o'r fath. Prif rôl y swyddog, fodd bynnag, yw gofalu
bod yr adeilad a phopeth sydd ynddo yn ddiogel. Gallai nifer
o weithwyr llai profiadol fod o dan ei adain. Fe fyddwch
chi'n ymwneud â'r cyhoedd weithiau megis wrth brif fynedfa'r
ganolfan ddinesig. Felly, rhaid bod yn gwrtais ac yn barod
eich cymwynas bob amser, gan amlygu agwedd gadarn heb wylltio
byth.
Medrau a diddordebau
Mae angen y canlynol:
- profiad o drin a thrafod y cyhoedd;
- gallu osgoi cynhyrfu wrth ymateb i ymholiadau;
- agwedd gwrtais a helpgar;
- agwedd gwrtais dros y ffôn;
- bod yn heini;
- natur sefydlog ac aeddfed;
- parodrwydd i wisgo dillad unffurf pan fo'n briodol;
- medrau sylfaenol o ran defnyddio cyfrifiadur.
Meini prawf derbyn
Does dim meini prawf penodol, ond disgwylir addysg o safon
dda. Weithiau, mae gofyn i ymgeiswyr ddangos profiad o
weithio ym maes diogelwch ac ysgrifennu cofnodion cywir a
darllenadwy. Mae 'cadw cofnod' yn rhan o'r swydd, yn aml.
Gobeithion a chyfleoedd yn y dyfodol
Mae sawl cyfle i gael swydd o'r fath ym myd llywodraeth leol yn
ogystal â'r sector preifat. Gan fod natur y gwaith yn
amrywio'n fawr o'r naill safle i'r llall, mae sawl gwahanol ffordd
o fynd ymlaen - er enghraifft, trwy astudio ar gyfer cymwysterau
proffesiynol mewn maes megis iechyd a diogelwch trwy gyrsiau
rhan-amser, gyda'r nos ac ati neu wella'ch cyrhaeddiad addysgol yn
gyffredinol.
Rhagor o wybodaeth a gwasanaethau
Sgiliau Ased: www.assetskills.org
Cymdeithas Diwydiant Diogelwch Prydain: www.bsia.co.uk
Sefydliad y Ddinas a'r Urddau: www.city-and-guilds.co.uk
Cymdeithas Rheolwyr Teledu Cylch Cyfyng Cyhoeddus: www.pcma.org.uk
Medrau er Diogelwch: www.skillsforsecurity.org.uk
Fe gewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.