Cyflwyniad
Yn wahanol i fynwentydd, lle mae modd gosod carreg ar fedd rhywun
sydd wedi'i gladdu yno, mae amlosgi'n llai amlwg. Dyna pam
mae'r awdurdodau lleol yn cynnig amryw gynlluniau sy'n helpu pobl i
fynegi eu galar. Mae swyddogion cofebion yn ymwneud â
gwerthu, cofnodi a chynnal/cadw amryw drefniadau er cof am rywun -
blodau, llech neu rodd i elusen - yn ogystal â gosod cofebion a
gwasgaru llwch corff sydd wedi'i losgi. Mae swyddogion o'r
fath ym mhob awdurdod lleol - ymhlith staff gwasanaethau
profedigaeth cyfadran y gwasanaethau cymdeithasol, fel arfer.
Amgylchiadau'r gwaith
Byddwch chi'n gweithio mewn swyddfa ar safle amlosgfa a mynwent,
gan amlaf. 37 awr yw'r wythnos safonol. Gallai fod
angen gweithio ar ddydd Sadwrn, hefyd. Rhaid gwisgo'n briodol
ac efallai y bydd gwisg swyddogol ddu ar gael.
Gweithgareddau beunyddiol
I roi cymorth i bobl sy'n galaru, rhaid i swyddogion cofebion
wneud y canlynol:
- gwerthu cynlluniau cofio yn ôl cyfarwyddiadau a gwybodaeth
clientiaid, gan gynnwys pennu prisiau a chasglu'r arian;
- casglu'r ffurflenni priodol a'u cyflwyno i ganolwr meddygol fel
y gall y llosgi fynd rhagddo yn ôl y bwriad;
- helpu clientiaid i ddewis cofeb o blith amrywiaeth o gynlluniau
cofio naill ai trwy'r post, dros y ffôn neu'n bersonol;
- cofnodi ac adnewyddu cynlluniau a thynnu cofebion ar ôl iddyn
nhw ddyddio;
- archebu cofebion o gwmnïau arbenigol a'u dodi yn y mannau
priodol neu eu gosod â hoelion troi yn ôl cyfarwyddiadau'r
client;
- mynd gyda'r galarwyr i Ardd y Cofio a'u helpu i gladdu neu
wasgaru'r llwch;
- cyflawni unrhyw orchwylion gweinyddu ar ôl y seremoni.
Medrau a diddordebau
Rhaid wrth agwedd dringar gan wybod pryd y dylech chi fod yn
gynnil ond yn effeithlon fel na fydd galarwyr yn gorfod trin a
thrafod materion gweinyddol. Felly, bydd eisiau:
- medrau cyfathrebu da ar lafar ac ar bapur;
- gallu defnyddio cyfrifiadur;
- gallu gweithio'n effeithiol ac yn fanwl gywir o dan
bwysau;
- gallu cadw a chanfod gwybodaeth;
- gallu cynllunio;
- agwedd ystyriol, amynedd a dealltwriaeth;
- medrau trefnu.
Meini prawf derbyn
Bydd hynny'n dibynnu ar natur y rhinweddau personol sydd wedi'u
disgrifio uchod, er y bydd angen TGAU yn y Gymraeg/Saesneg a
mathemateg, fel arfer. Bydd profiad yn bwysicach na hynny,
fodd bynnag. Byddai rhai blynyddoedd o brofiad o weithio gyda
phobl sy'n mynd trwy brofedigaeth ac ymdrin â'r cyhoedd yn bersonol
a thros y ffôn yn ddefnyddiol. At hynny, byddai disgwyl ichi
fod yn brofiadol ynglŷn â chadw cofnodion papur a chyfrifiadurol yn
ogystal â chyflawni gorchwylion ariannol. Byddai o gymorth pe
baech chi'n deall rhywfaint am arferion amryw grefyddau, hefyd.
Gobeithion a chyfleoedd ar gyfer y
dyfodol
Dyma faes eithaf cyfyng ond mae modd cael eich dyrchafu'n
oruchwyliwr amlosgfa, swyddog gwasanaethau profedigaeth neu
arolygydd mynwentydd ar ôl cael rhagor o gymwysterau a
phrofiad. Mae cyfleoedd gyda threfnwyr angladdau preifat,
hefyd.
Rhagor o wybodaeth a gwasanaethau
Ffederasiwn Awdurdodau Claddu ac Amlosgi: www.fbca.org.uk
Sefydliad Rheoli Mynwentydd ac Amlosgfeydd: www.iccm-uk.com
Gallai fod rhagor o wybodaeth ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.