Swyddog allgymorth a chynghorion

Cyflwyniad
I rai pobl, gallai'r syniad o fynd i adeilad crand a gofyn i swyddogion am wybodaeth fod yn dipyn o her.  Dyna pam mae gan rai cynghorau (yn arbennig yn y dinasoedd) gyfleusterau allgymorth sy'n rhoi cynghorion a chyfarwyddyd am yrfaoedd, swyddi, addysg a hyfforddiant i drigolion lleol.  Swyddogion allgymorth a chynghorion sy'n rheoli 'siopau unstop' o'r fath.  Ar gyfer cymunedau difreintiedig mae'r gwasanaeth, yn bennaf.

Mae swyddogion allgymorth a chynghorion yn hyfforddi staff grwpiau cymunedol fel y gallan nhw ddatblygu eu gwasanaethau gwybodaeth, cynghorion a chyfarwyddyd eu hunain i helpu i leddfu ynysu cymdeithasol, gwella iechyd, creu swyddi a diogelu'r amgylchedd - elfennau hanfodol adfywio trefol.  Mae swyddogion o'r fath ym mhob math o awdurdodau lleol.

Amgylchiadau'r gwaith
Mae gwybodaeth a chynghorion allgymorth ar gael mewn amryw fannau yn ardal y cyngor.  Gallai'r gwasanaethau weithredu mewn canolfannau pwrpasol neu'n rhan o ganolfannau cymunedol lleol, cylchoedd rhieni, meithrinfeydd, llyfrgelloedd, hostelau, canolfannau iechyd, swyddfeydd materion tai, gwyliau yn y stryd, ffeiriau hyfforddi a swyddi ac achlysuron lleol.  Mae'r swyddfeydd/stondinau'n anffurfiol ac yn gyfeillgar.  37 awr yw'r wythnos safonol (dydd Llun - dydd Gwener) ac mae eisiau gweithio dros y Sul a chyda'r nos, hefyd.

Gweithgareddau beunyddiol
Mae angen gwasanaeth personol i gynnig gwybodaeth, cynghorion a chyfarwyddyd allgymorth i'r sy'n eu mynnu.  Mae'n arbennig o fuddiol i bobl o gefndir economaidd-gymdeithasol difreintiedig megis y rhai sy'n perthyn i dras leiafrifol, rhieni sengl, ffoaduriaid, pobl ddigartref a'r rhai sydd heb waith ers amser maith.  Mae llawer o'r rheiny'n dibynnu ar fudd-daliadau gwladol.  Wrth eu cynghori, rhaid i'r swyddogion wybod ychydig am Gredyd Treth Teuluoedd Gweithiol a Bargen Newydd Cynlluniau Rhieni Sengl.  Dylen nhw fod yn gyfarwydd â'r hyn sy'n rhwystro pobl rhag dod o hyd i swydd hefyd, gan gynnwys pobl anabl a'r rhai dros 55.  Dyma'r prif nodau:

  • rhoi gwybodaeth a chynghorion allgymorth (gan gynnwys chwilio am swyddi a helpu i lunio CV) am gyflogaeth, gyrfaoedd, addysg a hyfforddiant;
  • cyfeirio clientiaid at sefydliadau eraill lle bo'n briodol;
  • cynnig gwasanaeth wyneb yn wyneb, dros y ffôn a thrwy ffacs ac ebost yn ôl yr angen i glientiaid unigol a grwpiau cymunedol;
  • chwilio am y rhai mae'r angen mwyaf arnyn nhw yn hytrach na disgwyl iddyn nhw ddod atoch chi;
  • manteisio ar sefydliadau sydd wedi ennill eu plwyf ym maes gyrfaoedd a hyfforddiant;
  • tynnu sylw at swyddi gwag a cheisio cysylltu clientiaid di-waith â chyfleoedd i gael swydd neu brofiad o weithio;
  • trefnu deunydd marchnata i hysbysebu'r gwasanaeth, gan gynnwys cyflwyno deunydd i'w gyhoeddi mewn cylchlythyrau a phapurau newydd lleol;
  • llunio cronfa adnoddau ynglŷn â swyddi, gyrfaoedd, hyfforddiant ac addysg;
  • cadw deunydd am ffeiriau gyrfaoedd/hyfforddiant a swyddi gwag i'w ledaenu a'i arddangos yn adeiladau cymunedol y gymdogaeth;
  • llunio a datblygu hyfforddiant, gwaith fesul grŵp a sesiynau cyflwyniadau ar gyfer mudiadau cymunedol;
  • monitro cynnydd clientiaid;
  • cadw a diweddaru cofnodion am glientiaid, yn ôl amodau cyfrinachedd;
  • gweinyddu cronfa fynediad.

Medrau a diddordebau
Dyma'r rhai hanfodol:

  • cyfathrebu'n eglur ac yn effeithiol wyneb yn wyneb, dros y ffôn ac ar bapur;
  • gweithio gyda phobl o bob lliw a llun mewn modd tringar a phroffesiynol;
  • ymdopi â sefyllfaoedd anodd o dan bwysau;
  • paratoi a chynnal sesiynau hysbysu a chyflwyniadau ar gyfer grwpiau;
  • cydweithio â phartneriaid a meithrin rhwydwaith o gysylltiadau;
  • trin a thrafod adnoddau prin;
  • cadw cofnodion;
  • llunio deunydd cyhoeddusrwydd a marchnata deniadol trwy gyfryngau TG;
  • dangos bod natur feddylgar gyda chi.

Meini prawf derbyn
Gradd prifysgol mewn pwnc perthnasol, cymhwyster cyfwerth neu dair blynedd o brofiad.  Bydd profiad o hysbysu a chynghori pobl am faterion dinesig a helpu pobl i chwilio am swydd yn bwysig.  Mae modd cael profiad o'r fath trwy weithio mewn cyfleuster dinasol neu amlddiwylliannol - gan ddod i adnabod hanfod amddifadedd ac anghenion ac anawsterau pobl ddi-waith.  Rhaid gwybod am faterion gyrfaoedd, cyflogaeth, hyfforddiant ac addysg, hefyd.

Gobeithion a chyfleoedd yn y dyfodol
Gan fod canol sawl dinas yn cael ei adfywio a bod mwy a mwy o gymunedau'n ceisio ysgwyddo cyfrifoldeb am eu lles eu hunain, mae swyddi o sawl math yn y maes hwn.  Mae cyfleoedd i gael dyrchafiad trwy gynlluniau cyllideb adfywio sengl a phrosiectau cronfa adnewyddu cymdogaethau (dan nawdd gwladol) er enghraifft, a thrwy ragor o hyfforddiant a chymwysterau ym maes gwaith cymdeithasol.  Mae partneriaethau'r awdurdodau lleol gyda chwmnïau masnachol yn cynnig cyfleoedd ychwanegol i reoli prosiectau adfywio, hefyd.

Rhagor o wybodaeth a gwasanaethau
Rhwydwaith Sefydliadau Hyfforddi Awdurdodau Lleol a Rhanbarthol Ewrop: www.ento.org/portal
Cymdeithas Gofal Cymdeithasol: www.socialcareassociation.co.uk
Canolfan Byd Gwaith: www.dwp.gov.uk/jobcentreplus
Cyngor ar Bopeth: http://www.citizensadvice.org.uk/

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Related Links