Croeso

Cyflwyniad
Y cynghorau lleol sy'n gyfrifol am drefnu pob etholiad yn y Deyrnas Gyfunol megis etholiadau'r Cynulliad, Senedd San Steffan a Senedd Ewrop, etholiadau llywodraeth leol ac unrhyw is-etholiadau.  Rheolwyr etholiadau sy'n gyfrifol am gynnal cofrestr yr etholwyr a gofalu bod proses ethol yn mynd rhagddi'n esmwyth.

Amgylchiadau'r gwaith
Mewn swyddfa y byddwch chi'n gweithio gan amlaf.  37 awr yw'r wythnos safonol er y gallai fod angen gweithio oriau ychwanegol cyn etholiad ac ar ddiwrnod pleidleisio.

Gweithgareddau beunyddiol
Mae rheolwyr etholiadau'n cydweithio â'u staff nhw a gwasanaethau cyfreithiol y cyngor yn ogystal â chysylltu â rhai o adrannau eraill y cyngor, aelodau seneddol, cynghorwyr, adrannau gwladol, cyrff cyhoeddus ac asiantaethau allanol.  Dyma eu prif gyfrifoldebau:

• cysylltu â phawb sy'n defnyddio'r gwasanaeth ynglŷn ag unrhyw faterion sy'n ymwneud â gwasanaethau etholiadol, i'w cynghori a'u cyfarwyddo nhw am bynciau deddfwriaethol a gweithdrefnol;
• bod yn gyfrifol am lunio a lledaenu'r dogfennau statudol priodol;
• paratoi adroddiadau i'r cyngor, cabinet y cyngor, pwyllgorau craffu'r cyngor ac amryw bwyllgorau eraill;
• cyflwyno adroddiadau cywir i'r Swyddfa Gartref yn brydlon ar ôl etholiadau San Steffan a Senedd Ewrop;
• gofalu bod trefniadau cadw a dileu deunydd ar ôl etholiadau lleol a threfnu i ddogfennau gael eu hanfon at Glerc y Goron ar ôl etholiadau San Steffan;
• rheoli safleoedd pleidleisio a ffiniau etholaethau;
• cofnodi manylion ymgeiswyr a'u hasiantau ar gyfer etholiad;
• goruchwylio proses enwebu ymgeiswyr ar gyfer etholiad.

At hynny, gallai rheolwr etholiadau fod yn gyfrifol am staff etholiadau yn ogystal â chyflawni dyletswyddau corfforaethol ehangach megis:

• arwain ynglŷn â goblygiadau trefnau adolygu ac arolygu;
• materion rheoli pobl megis cyfleoedd cyfartal, absenoldeb oherwydd salwch, denu a dewis staff, hyfforddi a datblygu, disgyblu a chwynion am anffafrio;
• dyrannu adnoddau yn yr adran.

Medrau a diddordebau
Dyma'r rhai hanfodol:

• diddordeb mewn gwleidyddiaeth;
• gallu gweithio yn ôl amserlenni;
• gallu gweithio mewn tîm;
• gallu trin a thrafod pobl o bob lliw a llun yn y cyngor a'r tu allan iddo;
• medrau technoleg gwybodaeth;
• gallu deall a defnyddio gwybodaeth newydd yn gyflym;
• gallu dirprwyo gorchwylion heb golli rheolaeth gyffredinol;
• gallu datrys amrywiaeth helaeth o broblemau etholiadol cymhleth;
• gallu llunio adroddiadau;
• gallu trafod telerau;
• gallu mynegi syniadau'n eglur;
• gallu ymaddasu yn ôl y sefyllfa a rhoi newidiadau ar waith;
• bod yn effro i bynciau llosg a natur gyfrinachol y gwaith.

Meini prawf derbyn
Mae eisiau Tystysgrif 'Gweinyddu Etholiadol' Cymdeithas y Gweinyddwyr Etholiadol yn ogystal â phrofiad sylweddol o drefnu a rheoli etholiadau megis:

• paratoi cofrestr etholwyr;
• trefnu etholiadau'r cyngor lleol, y Cynulliad, San Steffan a Senedd Ewrop;
• adolygu ffiniau etholaethau a safleoedd pleidleisio.

Gobeithion a chyfleoedd yn y dyfodol
Gallai fod cyfleoedd i gael dyrchafiad yn rhai o adrannau eraill y cyngor lleol megis y gwasanaethau democrataidd, gwaith llunio polisïau neu swyddi cyfreithiol (ar ôl cael rhagor o hyfforddiant).

Rhagor o wybodaeth a gwasanaethau
Cymdeithas Gweinyddwyr Etholiadol: www.aea-elections.co.uk
Sefydliad Breiniol Gweithredwyr Cyfreithiol: www.cilex.org.uk
Sefydliad Arwain a Rheoli: http://www.i-l-m.com
Cymdeithas Llywodraeth Leol Cymru: www.wlga.gov.uk
Cymdeithas y Gyfraith: www.lawsociety.org.uk

Efallai bod rhagor am hyn ar wefan Gyrfaoedd Cymru (www.careerswales.com/), yn llyfrgell eich bro neu yn swyddfa/llyfrgell gyrfaoedd eich ysgol.