Cyflwyniad
Nid gwarden trafnidiaeth mo hwn ond rhyw fath o weithiwr gwarchod
cymdogaethau. Yn wir, gwarden cymdogaethau yw ei enw mewn
rhai awdurdodau. Gwaith gwarden strydoedd yw helpu i leddfu
ofn troseddau a gwella bywydau trigolion, cwmnïau ac
ymwelwyr. Dyma swydd newydd na fydd ym mhob cyngor. Lle
mae gweithwyr o'r fath, byddan nhw ym mhob math o awdurdodau ar
wahân i'r cynghorau sirol.
Amgylchiadau'r gwaith
Mae'n anochel y bydd angen gweithio yn yr awyr agored ar strydoedd
a heolydd yr ardal, gan amlaf. Mae llawer o gerdded ym mhob
math o dywydd. 35 awr yw'r wythnos safonol, ac mae rhaid
gweithio shifftiau ac oriau anghymdeithasol. Gallai fod modd
trefnu llai o oriau neu rannu swydd. Mae tuedd i groesawu
gweithwyr rhan-amser fel arfer, yn arbennig ar gyfer gwaith gyda'r
nos. Efallai y bydd y swydd yn gweddu i bobl a hoffai weithio
gyda'r nos am fod cyfrifoldebau eraill arnyn nhw yn ystod y
dydd. Mae rhai cynghorau am ddenu rhagor o ferched achos nad
oes digon ohonyn nhw yn y maes hwn.
Gweithgareddau beunyddiol
Nod gwarden strydoedd yw gwella'r fro trwy gael gwared ar rai o'r
problemau rydyn ni'n gorfod eu goddef. Trwy helpu i feithrin
partneriaethau lleddfu ofn troseddau ac ymddygiad
gwrthgymdeithasol, gall cymuned fod yn un fwy diogel a dymunol i
fyw ynddi. Os yw gangiau'n aflonyddu arnoch chi neu os yw hen
oergelloedd yn cael eu gadael yn eich gardd, efallai mai gwarden y
strydoedd fydd yr un cyntaf y gallwch chi droi ato. Bydd
cynllun amddiffyn cymdogaethau'n cynnwys y canlynol:
- helpu'r byd masnachol a'r trigolion;
- meithrin hyder yn y gymuned;
- helpu i fynd i'r afael ag ymddygiad gwrthgymdeithasol a
throseddu;
- rhoi gwybodaeth am droseddwyr i'r heddlu a'r cyngor;
- hybu cydberthynas dda ymhlith pobl a pherthynas dda â'r cyngor
lleol.
I wneud hynny, bydd angen cryn dipyn o hyblygrwydd o ran sut a
phryd y byddwch chi'n gweithio. Dyma rai o ddyletswyddau
gwarden ar gyfer y nodau uchod:
- cerdded trwy'r fro (yn ystod y prynhawn, y nos a'r penwythnos,
gan amlaf);
- helpu pobl fregus (yr hen ddyn drws nesaf, y fenyw anabl ar
draws yr heol, y ffoaduriaid o Irac ac ati);
- cymryd rhan yng ngweithgareddau'r gymuned;
- tynnu sylw'r heddlu, y cyngor ac awdurdodau perthnasol eraill
at droseddau, ymddygiad gwrthgymdeithasol a materion
amgylcheddol;
- cadw llygad ar adeiladau gwag;
- helpu asiantaethau eraill megis yr heddlu, gwardeiniaid
trafnidiaeth, gweithwyr gwirfoddol sy'n gwarchod cymdogaethau,
gwasanaethau cymdeithasol, eglwysi, mudiadau i hen bobl a chlybiau
ieuenctid;
- gweithio gyda phobl ifanc;
- cadw llygad ar fwlio - unrhyw le.
Medrau a diddordebau
Dyma'r rhai hanfodol:
- ymroddiad i gyfrifoldeb dinesig ac awydd i wella byd pobl;
- natur dringar;
- y gallu i gyd-dynnu â phobl o bob lliw a llun;
- craffter - does dim hawl gyda chi i ddefnyddio dulliau bôn
braich;
- awydd i hybu cyfiawnder;
- corff eithaf iach a heini.
Meini prawf derbyn
Does dim gofynion ffurfiol, ond byddai cyrsiau hyfforddi a
datblygu sy'n arwain at gymhwyster cydnabyddedig. Y disgwyl
yw y byddai'r rhan fwyaf o'r rhinweddau uchod gyda chi.
Gobeithion a chyfleoedd yn y dyfodol
Gallech chi anelu at ddyrchafiad yn ddirprwy brif warden y
strydoedd lle byddai angen rhywfaint o allu goruchwyliol. Mae
dwy neu dair swydd o'r fath mewn awdurdod, fel arfer, yn ogystal â
swydd prif warden y strydoedd.
Rhagor o wybodaeth a gwasanaethau
Sefydliad Diogelwch ac Iechyd Galwedigaethol: www.iosh.co.uk
Bwrdd Arholi Cenedlaethol Diogelwch ac Iechyd Galwedigaethol: www.nebosh.org.uk
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.