Cyflwyniad
Mae gan bob awdurdod lleol fuddsoddiad sylweddol mewn eiddo tiriog
- tir, eiddo ac adeiladau - ac mae angen iddo gael ei reoli gan y
syrfëwr siartredig. Pan fydd galwad am fynediad i gadeiriau olwyn
mewn adeilad cyhoeddus neu gais am ganiatâd cynllunio er mwyn
adeiladu archfarchnad ar dir cyhoeddus, bydd y syrfëwr wrth wraidd
y mater. Ceir syrfëwr arbenigol ar gyfer pob un o'r swyddogaethau
canlynol:
- adeiladau;
- meintiau;
- mesur tir;
- prisio;
- cynllunio a datblygu;
- arolygon technegol i gefnogi'r syrfëwr siartredig.
Mae'r cyntaf o'r rhain, syrfewyr adeiladau, yn gyfrifol am
gynnal a chadw, atgyweirio a gwella holl eiddo'r cyngor ac mae'r
swydd i'w chanfod ym mhob math o awdurdod. Maent yn rhan o'r
Gwasanaethau Ymgynghori Adeiladau.
Amgylchedd Gwaith
Mae syrfewyr yn treulio tua hanner eu hamser ar safleoedd yn yr
awyr agored ac yn mynd i gyfarfodydd allanol, ac maent hefyd yn
gweithio mewn swyddfa yn ysgrifennu adroddiadau, gwneud gwaith
gweinyddol a pharatoi cynlluniau. Darperir dillad amddiffynnol
ar gyfer ymweliadau â safleoedd.
Gweithgareddau Dyddiol
Mae syrfewyr adeiladau yn gweithio mewn tîm, yn monitro ac yn
cynnal a chadw eiddo'r cyngor. Maent yn arbenigo mewn cynnal a
chadw eiddo'r cyngor a sicrhau bod yr holl asedau cyhoeddus mewn
cyflwr da, eu bod addas at ddiben darparu gwasanaeth a'u bod yn
cydymffurfio â'r ddeddfwriaeth. Maent yn atebol i bennaeth y
gwasanaethau ymgynghori adeiladau ac yn gweithio dan arweiniad y
prif syrfëwr i sicrhau gwasanaeth effeithiol a darbodus i drigolion
yr ardal leol. Bydd hyn yn cynnwys rhoi cyngor am ddeddfwriaeth
gysylltiedig o fewn fframwaith o fodlonrwydd cwsmeriaid. Mae
defnyddio meddalwedd cyfrifiadurol yn rhan fawr o'r gwaith. Mae gan
syrfewyr adeiladau gyfrifoldeb llawn am y canlynol:
- asesu cyflwr adeilad a darparu manylebau manwl ar gyfer gwaith
cysylltiedig;
- archwilio gwaith adeiladu a chymryd camau ynglŷn â: rheoli
contractau; cydymffurfiad â deddfwriaeth; gwaith dymchwel;
sgaffaldiau a ffensys; tân/ynni, neu faterion diogelwch cyhoeddus
eraill; mynediad i bobl anabl;
- marchnata a hyrwyddo'r gwasanaeth;
- ysgrifennu cofnodion ac adroddiadau manwl a chywir;
- gweithredu mentrau newydd sydd wedi eu cynllunio i wella
ansawdd y gwasanaeth;
- cymryd rhan mewn gwerthusiadau datblygu staff;
- hyfforddi staff newydd mewn swyddi syrfewyr adeiladau neu
swyddi technegwyr;
- bod wrth law i ddarparu unrhyw wasanaeth 'y tu allan i oriau
swyddfa' i ymdrin ag argyfyngau mawr.
Sgiliau a Diddordebau
I wneud y swydd hon yn dda rhaid i chi:
- fod yn berson deinamig a threfnus iawn sy'n gallu rheoli eich
amser eich hun a llwythi gwaith a bodloni terfynau
amser;
- bod â sgiliau rhyngbersonol da, a gallu gweithio ar eich liwt
eich hun;
- bod â sgiliau cyfathrebu a sgiliau ymdrin â
chwsmeriaid;
- gallu gweithio dan bwysau;
- bod â sgiliau bysellfwrdd da;
- bod â gwybodaeth ymarferol dda am reoliadau adeiladu a
deddfwriaeth gysylltiedig;
- bod â gwybodaeth ymarferol am gronfeydd data;
- bod yn frwdfrydig, hyblyg, cwrtais, yn barod i gynorthwyo
cwsmeriaid ac yn gallu cymell eich hun;
- bod â dull rhagweithiol o ddatblygu technegau
newydd;
- gallu gweithio'n gytûn mewn tîm.
Gofynion Mynediad
Y gofynion mynediad isaf yw BTEC/SQA HNC/D mewn pwnc perthnasol
megis eiddo, yr amgylchedd adeiledig neu adeiladu. Neu, dylai
fod gennych radd BSc mewn pwnc cysylltiedig ag adeiladu neu
gymhwyster cydnabyddedig cysylltiedig ag adeiladu, neu fod yn
gweithio tuag at radd neu gymhwyster o'r fath. Dylai fod
gennych o leiaf blwyddyn o brofiad o weithio mewn swyddfa arolygu
adeiladau a bod yn hyderus i ddefnyddio rhaglenni Microsoft Office.
Yn ddelfrydol, bydd gennych brofiad o AutoCAD ac NBS. Mae
rhai colegau yn cynnig Prentisiaethau mewn Arolygu Adeiladu.
Cyfleoedd a gobeithion yn y dyfodol
Cyflogir syrfewyr yn eang drwy lywodraeth leol ac mae llawer o
gyfleoedd i arbenigo mewn canghennau eraill o'r swydd, yn enwedig
mewn awdurdodau mwy. Gallwch fynd i fyny'r graddau o fewn y swydd
gyda rhagor o gymwysterau a phrofiad. Y cam nesaf i fyny yw prif
syrfëwr. Mae hyfforddiant proffesiynol yn arwain at aelodaeth
gorfforaethol o Sefydliad Brenhinol y Syrfëwyr Siartredig
(RICS). Swyddi eraill i anelu atynt yw Technegydd Arolygu,
Pensaer a Thechnolegydd Pensaernïol.
Swyddi Perthynol
Dilynwch y ddolen hon i weld rhestr o'r holl alwedigaethau
perthynol yn Building Your Community. Neu, dilynwch y ddolen
hon i weld yr holl broffiliau gyrfa sydd wedi eu gosod yn y maes
swyddi hwn.
Mwy o Wybodaeth a Gwasanaethau
Sefydliad Brenhinol y Syrfëwyr Siartredig (RICS) www.rics.org
Sefydliad Prydeinig y Technolegwyr Pensaernïol www.ciat.org.uk
Sgiliau Adeiladu www.citb.co.uk
Gwybodaeth am brentisiaethau www.apprenticeships.org.uk
Mae modd cael rhagor o wybodaeth am y maes hwn trwy wefan
Gyrfaoedd Cymru (www.careerswales.com/) y
llyfrgell leol, swyddfa gyrfaoedd eich bro neu lyfrgell eich
ysgol.
Mae Gyrfa Cymru wedi cynhyrchu Sbotolau erthygl ar yrfaoedd mewn
STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/ ac
adeiladu: https://www.careerswales.com/cy/golwg-ar-adeiladu/