Croeso

Cyflwyniad
Mae cyfrifiaduron yn bwysig iawn ynglŷn â chadw a chanfod gwybodaeth ym mhob un o adrannau'r cynghorau lleol.  Mae technoleg gwybodaeth yn helpu'r cynghorau i gadw trefn ar yr holl ddata y bydd eu hangen arnyn nhw i gynnig gwasanaethau yn effeithlon.  Un swyddogaeth mae angen data cywir ar ei chyfer yw paratoi ceisiadau am arian cronfeydd.  Diben swyddog y rheoli data yw cydlynu, casglu a dadansoddi data penodol a defnyddio sustemau priodol ar gyfer eu cadw ar ran uned sy'n llunio ceisiadau'r cyngor.  Bydd yn cynghori clientiaid am ddod o hyd i ddata a ffynonellau arian perthnasol wrth baratoi ceisiadau a datblygu prosiectau gan ofalu y bydd pob prosiect yn cyd-fynd â'r arian sydd ar gael.  Mae'r rôl yn y rhan fwyaf o gynghorau.

Amgylchiadau'r gwaith
Mae swyddogion rheoli data'n gweithio'n rhan o dîm ac ynddo bennaeth yr uned, rheolwyr datblygu ariannu a rheolwyr prosiectau.  At hynny, maen nhw'n ymwneud yn fynych â phrif swyddogion, uwch swyddogion ym mhob adran a staff TG megis y rhai sy'n goruchwylio gwaith paratoi data.  Rhaid meithrin cysylltiadau allanol hefyd â gweision gwladol, partneriaethau rhanbarthol a lleol a'r rhai sy'n rhoi grantiau.  Yn y swyddfa y byddwch chi'n gweithio er bod angen ymweld ag amryw wasanaethau'r cyngor a mynd i gyfarfodydd allanol yn ôl yr angen.  37 awr yw'r wythnos safonol, a bydd angen gweithio gyda'r nos a thros y Sul weithiau, hefyd.  Bydd angen gweithio o dan lawer o bwysau yn y swydd hon.

Gweithgareddau beunyddiol
Dyma'r prif orchwylion:

• datblygu a chynnal cronfa ddata gynhwysfawr gan roi ffynonellau ynghyd â phartneriaid mewnol ac allanol;
• sefydlu a chynnal cronfa ddata i fonitro hynt ceisiadau a modd eu gweithredu;
• rheoli ymholiadau'r rhai sy'n chwilio am arian trwy gronfa ddata Grantfinder i ddod o hyd i ffynonellau arian ar gyfer partneriaid mewnol ac allanol;
• gofalu bod gwefannau'r Rhyngrwyd a'r Mewnrwyd yn gyfoes;
• meithrin cysylltiadau â swyddogion ymchwil a gwybodaeth eraill yn adrannau'r cyngor ac asiantaethau allanol megis y GIG;
• dadansoddi elfennau economaidd a chymdeithasol cyfnewidiol allai effeithio ar ariannu gwladol;
• rheoli a gweinyddu cronfa partneriaethau'r cyngor gan gysylltu â chynghorwyr, adrannau a'r cyhoedd;
• sefydlu gweithdrefnau archwilio a chael gafael ar arian cyfatebol;
• trefnu a chynnal cyfarfodydd a seminarau am weithdrefnau cyflwyno cais;
• cynghori clientiaid am ddiwyg ac ehangder gweithdrefnau o'r fath ynglŷn â'r arian sydd ar gael;
• helpu partneriaid i ddefnyddio cronfeydd data priodol i gadw llygad ar geisiadau a hynt prosiectau;
• cynrychioli'r uned a'r cyngor mewn rhwydweithiau gwybodaeth mewnol ac allanol;
• llunio protocolau rhannu data a gofalu bod gwaith yr uned yn cyd-fynd â gofynion Deddf Diogelu Data. 

Medrau a diddordebau
Dyma'r rhai hanfodol:

• gallu gweithio o dan bwysau yn ôl targedau ac amserlenni;
• medrau cyfathrebu effeithiol ar lafar ac ar bapur fel ei gilydd;
• brwdfrydedd a chymhelliant cryf;
• hyder;
• medrau da ym maes technoleg gwybodaeth;
• gallu cyd-dynnu â phobl o sawl lliw a llun;
• gallu defnyddio cyfrifiadur am o leiaf 12 awr yr wythnos.

Meini prawf derbyn
Bydd gradd neu gymhwyster cyfwerth yn hanfodol (economeg neu ystadegau fyddai orau).  Ar ben hynny, bydd angen o leiaf dair blynedd o brofiad ynglŷn â rheoli data a chynnal ymchwil berthnasol.

Gobeithion a chyfleoedd ar gyfer y dyfodol
Mae modd cael dyrchafiad yn rheolwr datblygu ariannu a rheolwr prosiectau (mentrau cymunedol ac ariannu allanol) yn yr uned.  Mae modd cael dyrchafiad yn rheolwr sustemau technoleg gwybodaeth a gweinyddu cronfeydd data yn ogystal â symud i feysydd eraill sy'n ymwneud â rheoli data ac arian.

Rhagor o wybodaeth a gwasanaethau
Sefydliad Breiniol Archwilwyr Allanol: www.iia.org.uk
e-skills UK www.e-skills.com
Cymdeithas Rheoli Technoleg Gwybodaeth: www.socitm.gov.uk
Sefydliad Breiniol Technoleg Gwybodaeth: www.bcs.org.uk
Sefydliad Rheoli Sustemau Gwybodaeth: www.imis.org.uk

Gallai fod rhagor o wybodaeth ar wefan Gyrfaoedd Cymru (www.careerswales.com/), yn llyfrgell eich bro neu swyddfa/llyfrgell gyrfaoedd eich ysgol.