Cyflwyniad
Mae Swyddogion Gofal Dydd yn cynnig cymorth mewn canolfannau dydd
i bobl hŷn. Maent hefyd yn cynnig cymorth i'r rheini sy'n byw
ag anableddau dysgu a/neu gorfforol neu anghenion iechyd meddwl.
Hefyd, gallant gynnig gofal seibiant - gan ofalu am gleientiaid fel
y gall gofalwyr gael saib. Cyflogir Swyddogion Gofal
Dydd gan wasanaethau oedolion awdurdodau lleol yng Nghymru. Eu rôl
yw helpu pobl i gadw eu hannibyniaeth ac arwain bywyd mor llawn â
phosibl. Mae llawer o gleientiaid yn byw ar eu pen eu hunain,
ac maent ond yn cael cyfle i gwrdd â phobl eraill yn y ganolfan,
felly mae gweithgareddau cymdeithasol yn chwarae rhan fawr yn y
rhaglenni gofal.
Amgylchedd Gwaith
Mae Swyddogion Gofal Dydd yn gweithio mewn canolfannau dydd. Mae
rhai o'r rhain ar agor 7 diwrnod yr wythnos ac eraill ar agor 5
diwrnod yr wythnos. Gall canolfannau dydd amrywio o rai bach
sy'n darparu ar gyfer grŵp cleientiaid penodol i rai amlbwrpas mawr
sy'n darparu ar gyfer pobl o oedrannau amrywiol ac anableddau neu
anawsterau dysgu.
Mae Swyddogion Gofal Dydd yn gweithio fel rhan o dîm, gan
oruchwylio cynorthwywyr gofal ac adrodd i reolwr. Gall oriau
amrywio gan fod rhai Swyddogion Gofal Dydd yn gweithio diwrnodau
sesiynol - dim ond boreau neu brynhawniau; gall eraill weithio o
9am i 5pm bob dydd (37 awr) neu am ran o'r wythnos. Yn
dibynnu ar y ganolfan, gallai fod angen gweithio ar y penwythnos
weithiau. Mae rhai cynghorau yn cynnig cyfleoedd rhannu swyddi a
gweithio hyblyg. Darperir dillad ac offer diogelwch fel
menig, tabardau a larymau diogelwch personol mewn rhai
achosion.
Gweithgareddau Dyddiol
Cyfrifoldeb y Swyddogion Gofal Dydd yw sicrhau bod y ganolfan
ddydd yn rhedeg yn ddidrafferth. Maent yn cysylltu â'r gyrwyr sy'n
cludo cleientiaid i'r ganolfan ac oddi yno a'r staff arlwyo sy'n
cyflenwi ciniawau a lluniaeth arall. Maent hefyd yn goruchwylio ac
yn trefnu llwyth gwaith cynorthwywyr gofal. Gallant gymryd rhan yn
y gwaith o baratoi a chynnig gweithgareddau, ac yng ngofal personol
cleientiaid pan fo'n briodol. Mae gofal personol cleientiaid
yn cynnwys defnyddio'r toiled, defnyddio'r bath, golchi dillad ac,
mewn rhai achosion, help i fwyta.
Gall y rhaglen o weithgareddau cymdeithasol gynnwys therapi
symudedd/corfforol fel gemau bwrdd a phêl, ac ysgogiadau meddyliol
fel cwisiau, croeseiriau a gemau geiriau/rhifau eraill. Gall
gweithgareddau eraill gynnwys celf a chrefft neu ddelio â
chleientiaid ar sail un i un. Mae rhai canolfannau'n trefnu i
gleientiaid fynd ar dripiau i'r theatr neu fannau o
ddiddordeb. Mae'r Swyddog Gofal Dydd yn chwarae rôl arweiniol
yn y gwaith o ddylunio rhaglenni gofal unigol i gleientiaid, gan
weithio'n agos gyda'r rheolwr a'r gofalwr a chysylltu â
therapyddion galwedigaethol neu weithwyr cymdeithasol. Mae
gwaith papur hefyd yn rhan fawr o ddiwrnod gwaith y Swyddog Gofal
Dydd. Mae llawer o ffurflenni gwahanol i'w llenwi ac adroddiadau
i'w hysgrifennu i fonitro ac adolygu proses y cleient. Bydd Swyddog
Gofal Dydd hefyd yn cwrdd yn rheolaidd â'r rheolwr a chynorthwywyr
gofal i asesu cleientiaid.
Sgiliau a Galluoedd
- Mae amynedd a sensitifrwydd yn hanfodol - yn arbennig wrth
ddelio â rhywun sydd â chlefyd Alzheimer neu broblemau iechyd
meddwl eraill.
- Mae dychymyg a chreadigrwydd hefyd o fudd - i sicrhau bod y
rhaglenni gweithgarwch yn ysgogol ac yn diwallu anghenion
cleientiaid.
- Bydd unrhyw un sy'n gallu cynnig cymorth mewn ffordd sensitif i
staff a chleientiaid, ac sy'n meddu ar sgiliau trefnu da, yn addas
ar gyfer y swydd hon.
Gofynion Ymgeisio
Nid oes unrhyw ofynion ymgeisio penodol. Fel arfer caiff
nodweddion personol eu hystyried yn fwy na chymwysterau. Gall
profiad blaenorol o weithio gyda phobl mewn lleoliad gofal
cymdeithasol/cymorth fod yn ddefnyddiol iawn. Gall rhai
cynghorau gynnig cyfle i weithio tuag at NVQ/SVQ mewn modiwlau
Gofal Uniongyrchol.
Cyfleoedd yn y Dyfodol
Mae'n debygol y bydd angen cymwysterau a phrofiad o waith
cymdeithasol neu ofal ar swyddi uwch, megis Uwch Swyddog Gofal Dydd
neu Reolwr Gofal Cynorthwyol.
Rhagor o Wybodaeth a Gwasanaethau
Cyngor Gofal Cymru www.ccwales.org.uk
Gwirfoddolwyr Gwasanaeth Cymunedol www.csv.org.uk/socialhealthcare
Cyngor Iechyd a Phroffesiynau Gofal www.hpc-uk.org
Gwybodaeth am yrfaoedd Gweithwyr Cymdeithasol www.socialcarecareers.co.uk
Gallwch ddod o hyd i ragor o wybodaeth am y maes gwaith hwn drwy
Yrfa Cymru yn www.gyrfacymru.com neu yn
eich llyfrgell leol, swyddfa gyrfaoedd neu lyfrgell gyrfaoedd eich
ysgol.