Cyflwyniad
Dyma swydd i'w hystyried ar ôl cael digon o brofiad ym maes TG gan
gynnwys rheoli data, llunio gwefannau a sustemau gwybodaeth.
Mewn rhai awdurdodau lleol, mae'r swydd yn ymwneud â rheoli
mwyafrif y swyddogaethau hynny'n gyffredinol. Felly, y cam
nesaf ar ôl rheolwr gwybodaeth yw hi. Mae'r swydd hon i'w
chael mewn sawl adran ac awdurdod ond, gan amlaf, yn swyddfa'r prif
weithredwr. Mae technoleg gwybodaeth yn berthnasol i bob
gweithiwr a'r cyngor yn ei gyfanrwydd.
Mae gan bob cyngor wefan i roi gwybod i bobl y fro am ei
wasanaethau yn ôl meini prawf effeithlonrwydd a darbodaeth.
Mae gofyn statudol i wasanaethau'r cyngor i gyd fod ar gael trwy'r
we. I gael gwybod pa fudd-daliadau mae modd i'w mynnu, fe
gewch chi ddod o hyd i'r wybodaeth honno trwy gyfrifiadur
bellach. Cyn bwysiced â hynny yw'r sustem gyfathrebu fewnol -
y mewnrwyd - a rheolwr y gwasanaethau gwybodaeth sy'n bennaf
cyfrifol am honno.
Amgylchiadau'r gwaith
Mewn swyddfa y byddwch chi'n gweithio er y bydd angen teithio i
adrannau eraill o'r cyngor ac, weithiau, i swyddfeydd cynghorau
eraill. 37 awr yw'r wythnos safonol heb angen gweithio
shifftiau. Efallai y byddwch chi'n gweithio y tu allan i'r
oriau arferol er nad oes gofyn swyddogol i wneud hynny.
Gweithgareddau beunyddiol
Diben y swydd hon yw rheoli gwasanaethau technegol, gwasanaethau i
gwsmeriaid a gwasanaethau gwybodaeth fel a ganlyn:
- cyfarwyddo technoleg gwybodaeth a chyfathrebu yn ôl polisïau'r
cyngor;
- llunio sustemau i alluogi'r cyngor i gyfathrebu'n well â phawb
sy'n ymwneud ag e megis pobl y fro, cyflenwyr nwyddau a
gwasanaethau, Asiantaeth yr Amgylchedd, yr heddlu a mudiadau
gwirfoddol - gan gynnwys trin a thrafod galwadau ffôn ac adlunio
prosesau gweinyddu cysylltiedig;
- llunio gwefannau'r rhyngrwyd a'r mewnrwyd.
Yn ei gyfrifoldebau bob dydd, bydd rheolwr gwasanaethau
gwybodaeth gweinyddol a chorfforaethol yn ymwneud â chydlynu a
datblygu trefn rheoli gwybodaeth. Hanfod hynny yw
cyfarwyddo'r rhai sy'n llunio tudalennau ar gyfer y
rhyngrwyd/mewnrwyd, trefnu gweithgareddau hyfforddi a chynghori
staff y cyngor a phenderfynu ar ffyrdd o ddatrys problemau i
alluogi'r cyngor i gyfathrebu'n well â phartneriaid a thrigolion ei
ardal. Rhaid cadw golwg ar ddatblygiadau technolegol a helpu
i lunio strategaeth y cyngor ynglŷn â gwasanaethau
electronig. Ar y cyfan, y swyddogaeth allweddol yw rheoli'r
rhai sy'n gyfrifol am gynnig gwasanaethau gwybodaeth eu hadrannau i
staff y cyngor a'r cyhoedd fel ei gilydd. Bydd rheolwr
gwasanaethau gwybodaeth yn cynnal cysylltiadau â'r cynghorau lleol
eraill, cyrff rhanbarthol a gwladol a chwmnïau preifat ar draws
holl gyfrifoldebau'r cyngor: gwasanaethau cymdeithasol, adeiladu ac
eiddo, iechyd amgylcheddol, trafnidiaeth, addysg a hamdden.
Medrau a diddordebau
Bydd angen y canlynol arnoch chi:
- gallu gweithio o'ch pen a'ch pastwn eich hun;
- gallu rheoli prosiectau;
- medrau ymarferol;
- manwl gywirdeb;
- medrau rhagorol ym maes technoleg gwybodaeth;
- gallu trin a thrafod ffigurau;
- hyder;
- gallu cyd-dynnu â phobl o sawl cefndir;
- medrau rhagorol ym maes rheoli;
- medrau rhagorol ym maes cyfathrebu - ar lafar ac ar bapur fel
ei gilydd.
Meini prawf derbyn
Mae angen gradd neu gymhwyster cyfatebol. Y pynciau hanfodol
yw astudiaethau busnes a gwyddorau technoleg gwybodaeth.
Tybir y bydd gyda chi brofiad helaeth o sustemau
cyfrifiadurol. Mae profiad ynghylch technoleg gwybodaeth,
hyfforddiant rhyngweithiol am gyfrifiaduron a llunio gwefannau yn
ddefnyddiol, hefyd.
Gobeithion a chyfleoedd yn y dyfodol
Bydd cyfleoedd yn dibynnu ar faint o bwysigrwydd mae'r cyngor yn
ei roi i'r swydd. Daw dyrchafiad yn ôl eich gallu ac mae
gobeithion rhesymol o ran datblygu'ch gyrfa. Prif weithredwr
yw'r swydd uchaf. Mae cyfleoedd y tu allan i faes llywodraeth
leol, hefyd.
Rhagor o wybodaeth a gwasanaethau
Computing Magazine: www.computing.co.uk
Computer Weekly: www.computerweekly.com
Cymdeithas Rheoli TG: www.socitm.net
Cymdeithas Cyfrifiaduron Prydain: www.bcs.org.uk
e-skills UK www.e-skills.com
Sefydliad Rheoli Sustemau Gwybodaeth: www.imis.org.uk
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y llyfrgell gyhoeddus,
swyddfa'r gyrfaoedd neu lyfrgell gyrfaoedd eich ysgol.