Cyflwyniad
Mae plymwyr yn gosod sustemau ac offer dŵr, draenio, carth,
gwresogi a nwy mewn tai ac adeiladau cyhoeddus. Gallen nhw
weithio mewn amryw adrannau yn y cyngor megis adran cynnal a chadw
adeiladau, gwasanaethau eiddo, tai neu'r amgylchedd. Fel
arfer, byddan nhw'n gweithio mewn timau o grefftwyr o dan adain
goruchwyliwr gwasanaethau adeiladu.
Amgylchiadau'r gwaith
Bydd y rhan fwyaf o'r gwaith yn digwydd o dan do - yng nghartrefi
pobl, yn aml. Fe allai fod angen gweithio yn yr awyr agored i
gyflawni gorchwylion megis atgyweirio sustemau glaw a draenio, fodd
bynnag. Gallai fod angen gweithio ar fannau uchel, hefyd -
naill ai ar ysgol neu sgaffaldiau - yn ogystal â gweithio mewn
mannau cul megis toeau ac ystafelloedd ymolchi. 37 awr yw'r
wythnos safonol, a rhaid bod yn fodlon gweithio oriau ychwanegol ac
ymateb i argyfyngau y tu allan i oriau gwaith.
Gweithgareddau beunyddiol
Mae plymwyr yn cyflawni amryw orchwylion yn ôl natur y gwaith
neu'r adran maen nhw'n perthyn iddi. Dyma rai
nodweddiadol:
- gosod pibellau a sustemau draenio yn ôl cynlluniau;
- gosod pibellau, toiledau, rheiddiaduron, tanciau dŵr oer,
cyfarpar cegin ac ystafell ymolchi, sustemau gwresogi canolog,
unedau cael gwared ar wastraff ac ati;
- chwilio am achos problemau a dadansoddi gwallau;
- pennu'r deunyddiau a'r dulliau mwyaf priodol ym mhob
sefyllfa;
- atgyweirio neu amnewid pibellau a falfiau sy'n colli dŵr, ac
agor pibellau a draeniau sy'n orlawn;
- defnyddio amryw arfau llaw a thrydan i dorri, plygu a chysylltu
(naill ai trwy eu weldio neu eu sodro) pibellau metel a
phlastig;
- gwirio a phrofi'r gwaith i gyd i ofalu ei fod wedi'i wneud yn
ôl y rheoliadau;
- atgyweirio sustemau yn ôl yr angen, gan ymateb i argyfyngau
weithiau;
- gofalu eich bod yn ymateb i alwadau yn brydlon;
- cyflawni gorchwylion gwaith papur a gofalu bod dalenni gwaith a
dogfennau eraill yn cael eu cyflwyno'n gywir ac yn brydlon.
Medrau a diddordebau
Mae angen y canlynol:
- natur ymarferol a dwylo medrus;
- gallu gweithio yn ôl cynlluniau;
- bod yn gryf ac yn heini;
- gonestrwydd a chwrteisi, yn arbennig wrth weithio yng
nghartrefi pobl;
- hyblygrwydd a'r gallu i weithio mewn tîm ac o'ch pen a'ch
pastwn eich hun;
- trwydded yrru;
- ymwybodol o reoliadau iechyd a diogelwch;
- gallu blaenoriaethu gorchwylion a gweithio yn ôl
amserlenni.
Meini prawf derbyn
Yn aml, bydd angen cymwysterau megis Tystysgrif Sefydliad y Ddinas
a'r Urddau neu Gymhwyster Galwedigaethol Cenedlaethol. Gallai
fod angen peth profiad o weithio mewn gwasanaethau adeiladu,
hefyd. At hynny, efallai y bydd angen tystysgrifau TGAU neu
gymhwyster cyfwerth mewn pynciau megis mathemateg a
thechnoleg. Mae rhai cynghorau'n mynnu achrediad gan Gyngor y
Gosodwyr Nwy Cofrestredig (CORGI). Bydd angen trwydded yrru,
yn ôl pob tebyg. Mae rhai cynghorau'n cyflogi gweithwyr dan
hyfforddiant neu brentisiaid. Efallai y bydd cyfle i astudio
ar gyfer Cymhwyster Galwedigaethol Cenedlaethol, hefyd.
Gobeithion a chyfleoedd yn y dyfodol
Gall plymwyr profiadol fynd yn oruchwylwyr neu'n rheolwyr yn y
gwasanaethau adeiladu. Ar ôl hyfforddiant, gallai fod modd
symud i faes peirianneg, hefyd.
Rhagor o wybodaeth a gwasanaethau
Cyngor Cyflogwyr Plymwyr Prydain: www.bpec.org.uk
Sefydliad Breiniol y Peirianwyr Plymwaith a Gwresogi: www.ciphe.org.uk
Medrau Adeiladu: www.citb.co.uk
Cofrestr Diogelwch Nwy: www.gassaferegister.co.uk
SummitSkills www.summitskills.org.uk
Mae Gyrfa Cymru wedi cynhyrchu erthygl Sbotolau ar yrfaoedd ym
maes adeiladu: https://www.careerswales.com/cy/golwg-ar-adeiladu/
Cewch chi ragor o wybodaeth am y maes hwn trwy gysylltu â
Gyrfaoedd Cymru (www.careerswales.com/), y
llyfrgell gyhoeddus, swyddfa'r gyrfaoedd neu lyfrgell gyrfaoedd
eich ysgol.