Cyflwyniad
Mae penseiri'r awdurdodau lleol yn rhoi holl amrywiaeth y
gwasanaethau pensaernïol yn ôl anghenion y cyngor ac, weithiau,
clientiaid preifat. Mae natur y gwaith hwn yn amrywio'n fawr
gan gynnwys: llunio a phrynu adeiladau newydd; newid ac adnewyddu
rhai cyfredol; cadwraeth; arolygon; astudiaethau dichonoldeb;
cynghori am gyflwr, dibenion a materion cynnal a chadw adeiladau
cyfredol; gweinyddu cytundebau; ysgrifennu adroddiadau. Mae
penseiri ym mhob cyngor sirol a bwrdeistref sirol.
Amgylchiadau'r gwaith
Bydd pensaer yn treulio'r rhan fwyaf o'r dydd mewn swyddfa er bod
angen ymweld â safleoedd, hefyd. 37 awr yw'r wythnos safonol,
fel arfer.
Gweithgareddau beunyddiol
Mae penseiri'r awdurdodau lleol yn cydweithio ag amrywiaeth
helaeth o adrannau megis tai, addysg, hamdden, gwasanaethau
cymdeithasol ac eiddo yn ogystal â'r heddlu, y gwasanaeth tân a'r
llysoedd mewn rhai achosion. Dyma rai gorchwylion:
- derbyn cyfarwyddiadau client, gan gynnwys unrhyw waith
ymchwil;
- llunio adeilad yn ôl y cyfarwyddiadau hynny;
- cynnal trafodaethau gyda swyddogion cynllunio a rheoli
adeiladu, lle bo'n briodol, i astudio dichonoldeb y prosiect;
- paratoi cynllun a gwybodaeth berthnasol;
- pennu faint o ddeunyddiau y bydd eu hangen, a rhoi cytundeb ar
gynnig;
- goruchwylio cytundebau adeiladu;
- helpu i drin a thrafod yr anfonebau terfynol;
- cynghori clientiaid am bolisïau;
- cyflwyno adroddiadau am brosiectau gerbron rhai o bwyllgorau'r
cyngor;
- gofalu bod contractwyr yn rhoi gwerth yr arian ac yn cadw at
safonau uchel.
Medrau a diddordebau
Dyma'r rhai hanfodol:
- natur arloesol a chreadigol;
- gwybod rheoliadau ac egwyddorion adeiladu a pheirianneg yn
dda;
- medrau negodi a chyflwyno da;
- medrau trefnu gwaith a rheoli prosiectau;
- gallu deall arferion pensaernïol, cyfreithiol a thechnegol
newydd;
- gallu trin a thrafod cyfrifiadur a defnyddio meddalwedd llunio
adeiladau.
Meini prawf derbyn
Mae'r rhan fwyaf o benseiri'r awdurdodau lleol wedi ymgymhwyso
trwy ennill gradd a diploma mewn ysgol bensaernïaeth. I
astudio ar gyfer y cymwysterau hynny, fe fydd angen Tystysgrif
Safon Uwch (neu rywbeth cyfwerth) mewn dau bwnc a TGAU mewn o leiaf
bum pwnc gan gynnwys Cymraeg/Saesneg, mathemateg a phynciau priodol
eraill megis ffiseg a chemeg. Bydd sawl ysgol bensaernïaeth
yn derbyn cymwysterau galwedigaethol cyffredinol cenedlaethol,
Bagloriaeth Ryngwladol, tystysgrifau Cyngor Busnes a Thechnoleg
Prydain, cwrs mynediad a diplomâu addysg bellach, hefyd.
I ymgymhwyso'n bensaer, rhaid dilyn hyfforddiant am o leiaf saith
mlynedd (neu'n hirach mewn cyrsiau rhan-amser) a chwblhau'r tri
cham isod:
- rhaglen bum mlynedd mewn cwrs mae Sefydliad Brenhinol Penseiri
Prydain wedi'i ddilysu yn ôl gofynion Bwrdd Cofrestru'r
Penseiri;
- o leiaf dwy flynedd o brofiad proffesiynol;
- arholiad arferion a rheoli proffesiynol Sefydliad Brenhinol
Penseiri Prydain.
Gobeithion a chyfleoedd yn y dyfodol
Gallai fod modd cyrraedd swydd rheolwr. Gyda rhagor o
hyfforddiant a/neu brofiad, gallai fod cyfle i symud i adran arall
yn y cyngor megis cynllunio, rheoli adeiladu ac adfywio.
Rhagor o wybodaeth a gwasanaethau
Bwrdd Cofrestru'r Penseiri: www.arb.org.uk
Sefydliad Breiniol Technolegwyr Pensaernïol: www.ciat.org.uk
Medrau Adeiladu: www.citb.co.uk
Cyngor Archeoleg Prydain: www.britarch.ac.uk
Medrau Creadigol a Diwylliannol: www.cciskills.org.uk
Sefydliad Brenhinol Penseiri Prydain: www.architecture.com
Mae Gyrfa Cymru wedi cynhyrchu erthygl Sbotolau ar yrfaoedd ym
maes adeiladu: https://www.careerswales.com/cy/golwg-ar-adeiladu/ ac
diwydiannau creadigol:
https://www.careerswales.com/cy/golwg-ar-diwydiannau-creadigol/
Gallai fod rhagor o wybodaeth ar wefan Gyrfaoedd Cymru
(www.careerswales.com/), yn llyfrgell eich bro neu yn
swyddfa/llyfrgell gyrfaoedd eich ysgol.