Cynorthwywr gwybodaeth y llyfrgell

Cyflwyniad
 Roedd bywyd yn y llyfrgell yn arfer mynd yn ara' deg.  Fe fyddai pawb yn chwilio'r silffoedd neu'r archifau am lyfr o ddiddordeb neu ystadegau ar gyfer ymchwil, ac yn disgwyl treulio tipyn o amser wrth wneud hynny.  Roedd diffyg hast yn rhan o naws y llyfrgell.  Gan fod cyfleusterau'r we yno bellach, fodd bynnag, mae'n haws casglu a chyflwyno gwybodaeth, er bod modd pori deunydd o hyd.  Mae goblygiadau mewnol ac allanol yn sgîl hynny.  Mae cynorthwywyr gwybodaeth yn helpu rheolwr y llyfrgell i gynnig sustemau electronig ym mhob rhan o'r gwasanaeth.

Amgylchiadau'r gwaith
 Yn y llyfrgell y byddwch chi'n gweithio, ac mae peth cyswllt â'r cyhoedd.  Rhaid ichi ddefnyddio offer TG i raddau helaeth.

Gweithgareddau beunyddiol
 Mae cynorthwywyr gwybodaeth yn gyfrifol am gynnig gwasanaethau'r we ac amryw ddeunyddiau hyrwyddo - gan gynnwys ar ffurfiau electronig - yn ôl amserlenni caeth yn aml, ac er cymorth i gynorthwywyr y llyfrgell.  Rhaid pennu blaenoriaethau bob dydd - gan ddod i benderfyniadau ynglŷn â dylunio deunyddiau hyrwyddo a llunio cynnwys digidol creadigol i weithwyr a rheolwyr gwasanaethau.  Mae'r gwaith hwnnw yn ymwneud â chysylltu ag adran argraffu'r cyngor ynglŷn â pharatoi rhai deunyddiau - rhywbeth ar gyfer Wythnos y Llyfrau, er enghraifft - ac adran TG y cyngor ynglŷn â llunio gwefannau.  At hynny, mae cynorthwywyr yn gyfrifol am reoli stoc trwy gysylltu â chyflenwyr lleol sy'n cynnig meddalwedd a nwyddau eraill.  Dyma brif gyfrifoldebau cynorthwywr gwybodaeth:

  • helpu i gynnig sustemau technoleg a gwybodaeth mewn adrannau;
  • gweithio y tu ôl i'r cownter gan roi a derbyn llyfrau ar fenthyg, cofnodi hynny ar gyfrifiadur, casglu dirwyon am ddod â llyfrau yn ôl yn hwyr, neilltuo llyfrau, cofrestru darllenwyr newydd ac adnewyddu aelodaeth rhai cyfredol;
  • llunio, paratoi a chynnal amryw ddeunyddiau hyrwyddo;
  • llunio a pharatoi ffurflenni electronig a phapur ar gyfer y gwasanaeth;
  • rheoli gorchwylion llunio a chynnal y wefan bob dydd;
  • helpu i ddatblygu prosiectau digidol;
  • cadw rhestr o offer TG;
  • cynnig gwasanaeth lamineiddio a rhwymo i'r cyhoedd;
  • cadw digon o nwyddau TG megis inc a disgiau;
  • helpu rheolwyr i hyfforddi staff am weithdrefnau ac arferion TG;
  • cadw golwg ar yr hyn mae gwasanaeth gwybodaeth y cyngor yn ei gyflawni.

Medrau a diddordebau
 Gallu trin a thrafod pobl a chyfathrebu'n dda.  Felly, rhaid bod yn un amyneddgar, cyfeillgar a hyderus sy'n hoffi helpu pobl - byddwch chi'n ymwneud â phobl o bob lliw a llun.  Mae cof da, meddwl ymchwilgar a ffordd drefnus o weithio'n bwysig wrth gynnal ymchwil.  Mae angen medrau sylfaenol o ran trin a thrafod cyfrifiaduron a dylech chi allu gweithio'n rhan o dîm.  Fe fyddai gwir ddiddordeb mewn llyfrau a chronfeydd gwybodaeth o fantais.

Mae creadigrwydd yn hanfodol, yn ogystal â rhai medrau ym maes TG:

  • medrau cyfathrebu da - ar lafar a thrwy lythyr fel ei gilydd;
  • gwybod am ddylunio tudalennau gwefannau, cyhoeddi pen desg, prosesu geiriau a chronfeydd data;
  • gallu gweithio'n rhan o dîm;
  • deall dadansoddiadau o anghenion defnyddwyr.

Meini prawf ymgeisio
 Bydd angen o leiaf 4 TGAU (A-C), gan gynnwys Saesneg, fel arfer.  I rai swyddi, fe fydd angen Safon Uwch neu gymhwyster cyfwerth megis tystysgrif/diploma Cyngor Addysg Busnes a Thechnoleg, neu Uwch Gymhwyster Galwedigaethol Cenedlaethol (lefel III).  Yn y gwaith y bydd y rhan fwyaf o'r hyfforddiant, dan oruchwyliaeth staff profiadol.  Mae rhai llyfrgelloedd yn annog gweithwyr i astudio ar gyfer Cymhwyster Galwedigaethol Cenedlaethol (lefelau 2, 3 a 4) ym maes 'Gwasanaethau Llyfrgell a Gwybodaeth'.  Mae Sefydliad y Ddinas a'r Urddau ac Awdurdod Cymwysterau'r Alban yn cynnig cyrsiau ym maes gwyddoniaeth llyfrgell a gwybodaeth, naill ai'n rhan amser neu o hirbell, i'r rhai sy'n gweithio yn y llyfrgelloedd.  Gallai prentisiaethau ym maes gwasanaethau llyfrgell a gwybodaeth fod ar gael, hefyd.

Bydd cymhwyster priodol ym maes TG o fantais - IBT neu CGLI ynglŷn â phrosesu geiriau, cronfeydd data a thaenlenni.  Mae profiad o ddefnyddio sustemau megis Microsoft Office yn y gwaith yn hanfodol.  Byddai profiad o dechnoleg gwybodaeth, hyfforddi staff, addysgu defnyddwyr a phrosiectau digidol yn ddefnyddiol, hefyd.

Gobeithion a chyfleoedd yn y dyfodol
 Gan fod menter wladol yn cynnig hyfforddiant i staff y llyfrgelloedd ynglŷn â thrin a thrafod cyfrifiaduron a'r we, bydd sawl cyfle i wella'ch cymwysterau chi a chael eich dyrchafu yn y maes hwn.  O bosibl, y cam nesaf fyddai swyddog gwybodaeth ac, ar ôl hynny, rheolwr cyfleusterau electronig.  Mae cyfleoedd y tu allan i fyd llywodraeth leol yn y byd diwydiannol ac mewn prifysgolion a cholegau.

Rhagor o wybodaeth a gwasanaethau
 Sefydliad Breiniol Proffesiynolion Llyfrgelloedd a Gwybodaeth: www.cilip.org.uk 
Sefydliad Rheoli Sustemau Gwybodaeth: www.imis.org.uk 
Cymdeithas Llyfrgelloedd yr Ysgolion: www.sla.org.uk 
Sefydliad Breiniol TG: www.bcs.org.uk

Mae Gyrfa Cymru wedi cynhyrchu erthygl Sbotolau ar yrfaoedd yn y diwydiannau creadigol: https://www.careerswales.com/cy/golwg-ar-diwydiannau-creadigol/

Mae modd cael rhagor o wybodaeth am y maes hwn trwy wefan Gyrfaoedd Cymru (www.careerswales.com/) y llyfrgell leol, swyddfa gyrfaoedd eich bro neu lyfrgell eich ysgol. 

Related Links