Syrfëwr meintiau

Cyflwyniad
Mae pob awdurdod lleol wedi buddsoddi'n sylweddol mewn tir, eiddo ac adeiladau ac mae syrfëwr arbenigol ar gyfer pob un o'r swyddogaethau canlynol:

  • adeiladu;
  • meintiau;
  • mesur tir;
  • prisio;
  • cynllunio a datblygu;
  • arolygon technegol er cymorth i'r syrfëwr siartredig.

Mae syrfewyr meintiau'n ymwneud ag agwedd ariannol adeiladu a pheirianneg ac mae'r swydd hon mewn awdurdodau lleol o bob math ar wahân i gynghorau sirol.  Mae'r syrfewyr yn rhan o'r gwasanaeth ymgynghorol dros adeiladu ac, mewn rhai awdurdodau, gallen nhw fod yn rhan o garfan y gwasanaethau technegol o dan arweiniad uwch syrfëwr meintiau.

Amgylchiadau'r gwaith
Mae syrfewyr yn treulio amser ar safleoedd yn yr awyr agored ac mewn cyfarfodydd allanol, ond yn y swyddfa mae syrfewyr meintiau'n gweithio fel arfer, gan ysgrifennu adroddiadau, cyflawni gorchwylion gweinyddol, paratoi cynlluniau a phennu costau.  37 awr yw'r wythnos safonol a does dim oriau anghymdeithasol, gan amlaf.  Dim ond wrth ymweld â safleoedd y bydd rhaid gwisgo dillad diogelu megis hetiau caled.

Gweithgareddau beunyddiol
Mae syrfewyr meintiau'n gweithio mewn prosiectau ar ran cyfadran y gwasanaethau eiddo ac adrannau ac asiantaethau eraill.  Maen nhw'n monitro ac yn amcangyfrif y costau ac yn ymwneud â phrosiectau adeiladu o'r cynllunio hyd y diwedd.  Mae eu hyfforddiant wedi rhoi gwybodaeth gadarn iddyn nhw ynglŷn â dulliau adeiladu, yn ogystal â materion ariannol a chyfrifeg.  Fel arfer, fe fydd yr awdurdod yn rhoi pob cytundeb ar gyfer gwaith ar gynnig, ac un o orchwylion syrfewyr yw pwyso a mesur y cynigion a chynghori'r awdurdod ar agweddau technegol y prosiect.  Ar ben hynny, byddan nhw'n cyflwyno ar ran yr awdurdod geisiadau am gymorth ariannol allai fod ar gael ar gyfer gwelliannau penodol (trwy Undeb Ewrop, er enghraifft) yn ogystal â chynghori trigolion lleol ar baratoi ceisiadau am grantiau i wella eu cartrefi.  Dyma'r prif ddyletswyddau:

  • pennu dichonoldeb a chostau;
  • rheoli cytundebau penodol a gweithredu'n brif ymgynghorydd ar eu cyfer;
  • paratoi dogfennau ar gyfer cytundebau sydd i'w rhoi ar gynnig;
  • pennu costau cyfamserol prosiectau a rhoi tystysgrifau cyfamserol sy'n caniatáu i adeiladwyr fwrw ymlaen â'r gwaith;
  • trin a thrafod unrhyw amrywio yn y cytundebau;
  • gofalu bod anfonebau'n cael eu talu yn ôl amserlenni ac amodau eraill;
  • rheoli/goruchwylio syrfewyr llai profiadol yn ystod prosiectau;
  • annog pawb sy'n ymwneud ag adeiladu i fod yn ymwybodol o gostau. 

Mae syrfewyr meintiau'n atebol i uwch syrfewyr meintiau, gan weithio ar y cyd â nhw yn ystod prosesau cynnig/rhoi cytundebau a mesur meintiau ym mhob prosiect.

Medrau a diddordebau
Mae angen y canlynol:

  • gallu mathemategol;
  • diddordeb ym maes adeiladu;
  • gwybod y Dull Mesur Safonol;
  • deall ffurflenni safonol Tribiwnlys y Cytundebau;
  • gallu gweithio o'ch pen a'ch pastwn eich hun ac mewn tîm;
  • gallu goruchwylio pobl;
  • gallu defnyddio sustemau cyfrifiadurol;
  • gwybod gweithdrefnau iechyd a diogelwch;
  • gallu trin a thrafod pobl o bob lliw a llun;
  • manwl gywirdeb;
  • medrau rheoli prosiectau a'r gwydnwch i'w gorffen yn foddhaol.

Meini prawf derbyn
Mae gradd neu gymhwyster cyfwerth ym maes mesur meintiau'n hanfodol.  Fel arfer, mae angen ymgymhwyso'n syrfëwr siartredig, hefyd.

Mae angen o leiaf flwyddyn o brofiad ar ôl graddio, gan gynnwys gweinyddu nifer o gytundebau canolig eu maint hyd at yr anfoneb derfynol (pennu costau, amcangyfrif meintiau ac ati).

Gobeithion a chyfleoedd yn y dyfodol
Mae syrfewyr yn gweithio ledled byd llywodraeth leol ac mae sawl cyfle i arbenigo, yn arbennig yn yr awdurdodau mwyaf.  Y cam nesaf yn eich gyrfa ar ôl cael rhagor o brofiad fyddai uwch syrfëwr meintiau.

Mae hyfforddiant proffesiynol yn arwain at aelodaeth gorfforaethol o Sefydliad Brenhinol y Syrfewyr Siartredig.

Rhagor o wybodaeth a gwasanaethau
Medrau Adeiladu: www.citb.co.uk
Sefydliad Brenhinol Syrfewyr Siartredig: www.rics.org
Ymgynghoriaeth Adeiladu: www.thebuildingconsultancy.com

Cewch chi ragor o wybodaeth am y maes hwn trwy gysylltu â Gyrfaoedd Cymru (www.careerswales.com/), y llyfrgell gyhoeddus, swyddfa'r gyrfaoedd neu lyfrgell gyrfaoedd eich ysgol.

Mae Gyrfa Cymru wedi cynhyrchu Sbotolau erthygl ar yrfaoedd mewn STEM (gwyddoniaeth, technoleg, peirianneg a mathemateg): https://www.careerswales.com/cy/golwg-ar-stem/ ac adeiladu: https://www.careerswales.com/cy/golwg-ar-adeiladu/

Related Links